Read Magandang Balita Biblia Ecclesiastico 18 Bible Online

Ecclesiastico 18 - Magandang Balita Biblia bible

Ecclesiastico 18

¹Ang Kadakilaan ng Diyos Ang Diyos na nabubuhay magpakailanman ang siyang lumikha ng sanlibutan.

²Ang Panginoon lamang ang makatarungan. Walang ibang Diyos liban sa kanya.[47]

⁴Walang makakapaghayag ng mga ginawa ng Panginoon, at wala ring makakaunawa ng kanyang mga panukala.

⁵Sinong makakasukat ng kanyang karangalan? Sinong makakapagsalaysay ng kanyang habag?

⁶Walang maidadagdag o mababawas sa mga ito ang tao. Talagang di kayang maabot ng kanyang isipan ang mga kahanga-hangang gawa ng Panginoon.

⁷Kapag nabaybay niya ang lahat, siya'y nagsisimula pa lamang, at pagtigil niya'y lito ang kanyang isip. Ang Kaliitan ng Tao

⁸Ano ba ang tao, at ano ang kanyang katuturan? Ano ang halaga ng kabutihan o kasamaang nagagawa niya?

⁹Tingnan mo na lamang ang haba ng kanyang buhay: Mahaba na ang sandaang taon.[48]

¹⁰Parang isang patak ng tubig mula sa dagat, o buhangin sa dalampasigan— ganyan ang buhay ng tao, kung ipaparis sa panahong walang hanggan.

¹¹Kaya naman pinagpapaumanhinan ng Diyos ang mga tao, at ibinubuhos sa kanila ang kanyang habag.

¹²Nakikita at nauunawaan niya ang kahabag-habag nilang wakas; dahil dito'y lalo niyang dinadagdagan ang kanyang pagpapatawad.

¹³Ang pagkahabag ng tao ay para sa kanyang kapwa lamang, ngunit kinaaawaan ng Panginoon ang lahat ng may buhay. Inaakay niya sila sa tumpak na landas, itinutuwid ang kamalian, sinusupil kung kailangan, tinuturuan, at ibinabalik kapag naliligaw, gaya ng ginagawa ng pastol sa kanyang kawan.

¹⁴Kinahahabagan niya ang tumatanggap ng pangaral at nagsisikap makatupad ng kanyang mga utos. Paghahanda sa Hinaharap

¹⁵Anak, gumawa ka ng mabuti na walang halong panunumbat; huwag mong bayaang ang kaloob mo'y mabahiran ng masakit na pangungusap.

¹⁶Hindi ba ang hamog ay nakakapagpalamig sa init ng araw? Kung gayo'y higit pa sa kaloob ang magandang salita.

¹⁷Ang magandang pangungusap ay higit na mahalaga kaysa isang regalong mamahalin, at ang dalawang ito ay kapwa ipinagkakaloob ng may tunay na magandang kalooban.

¹⁸Ang hangal ay mapanumbat at masungit, ang bigay na mapait sa kalooban ng nagbigay ay mahapdi sa mata ng binigyan.

¹⁹Mag-aral ka muna bago ka magsalita, at pangalagaan ang sarili bago pa dumapo ang sakit.

²⁰Suriin mo ang sarili bago sumapit ang paglilitis, at pagdating ng pagsisiyasat, magtatamo ka ng patawad.

²¹Magpakumbaba bago dapuan ng sakit at magbalik-loob agad bago malulong sa kasalanan.

²²Huwag mong ipagpaliban ang pagtupad ng panata; huwag mong hintaying mabingit ka pa sa kamatayan bago tuparin iyon.

²³Bago ka gumawa ng panata, ihanda mo muna ang sarili; huwag mong tularan ang tumutukso sa Panginoon.

²⁴Isipin mo: Gusto mo bang magalit siya sa iyo sa oras ng kamatayan? Kapag hahatulan ka na niya, nais mo bang talikuran ka niya?

²⁵Alalahanin mo ang gutom kapag ikaw ay nasa kasaganaan, isipin mo ang karukhaan at pangangailangan sa panahong ikaw ay mayaman.

²⁶Gaano karaming pagbabago ang nagaganap sa maghapon? Ganyan kabilis magbago ang lahat ng bagay sa harap ng Panginoon.

²⁷Ang marunong ay maingat sa lahat ng bagay, at lalong nangingilag madungisan kapag lumulubha ang panganib na magkasala.

²⁸Ang matalinong tao'y madaling makakilala ng karunungan, at iginagalang niya ang sinumang nag-aangkin nito.

²⁹Ang nakakaunawa ng mga kasabihan ay maibibilang na rin sa marurunong, at ang mga pangungusap niya'y magiging batis ng karunungan.[49] Ang Pagpipigil sa Sarili

³⁰Huwag kang padadala sa masasama mong hilig, bagkus pigilan mo ang iyong mga pagnanasa.

³¹Kapag sinunod mo ang iyong masasamang hilig, pagtatawanan ka ng iyong mga kaaway.

³²Huwag kang mawili sa panandaliang aliw na ang ibinubunga'y ibayong paghihirap.

³³Kung wala kang sariling pera, huwag mong asamin ang magarbong pag-aanyaya. Kapag ang handa mo ay uutangin pa, sa malao't madali'y mamumulubi ka.[50]