Read Magandang Balita Biblia Ecclesiastico 20 Bible Online

Ecclesiastico 20 - Magandang Balita Biblia bible

Ecclesiastico 20

¹Wastong Paggamit ng Dila May pangaral na hindi napapanahon, kaya may taong nananahimik kahit siya'y marunong.

²Mabuti pa ang manaway kaysa mag-apoy sa galit.

³Ang tumatanggap ng kamalian ay nakaligtas sa kahihiyan.

⁴Parang lalaking kapon na nagtatangkang makuha ang pagkababae ng isang dalaga, ang gumagamit ng dahas upang mapalabas ang matuwid.

⁵Mayroong taong ipinapalagay na marunong sapagkat siya'y tahimik, at mayroong kinayayamutan dahil sa kanyang kadaldalan.

⁶May taong nananahimik sapagkat walang malamang sabihin, at mayroon namang ayaw magsalita sapagkat hindi pa napapanahon.

⁷Ang marunong ay naghihintay ng tamang pagkakataon, ngunit ang hangal ay walang tigil ng kadadaldal.

⁸Ang mahabang magsalita ay kinaiinipan, at ang nagmamarunong ay kinaiinisan.[53] Mga Kabalintunaan

⁹Mayroong kabiguang nauuwi sa mabuti, at mayroon namang tagumpay na humahantong sa kapahamakan.

¹⁰Kung minsan, may pagmamagandang-loob na di mo papakinabangan, ngunit mayroon naman na dalawang ulit ang tatanggapin mong ganti.

¹¹May mga bagay na nawawala dahil sa karangalan, ngunit mula sa abang pinanggalingan, marami ang umaakyat sa tugatog ng tagumpay.

¹²May nakakabili nang mura, ngunit nang magsiyasat siya'y pitong doble pala ang bayad niya.

¹³Magsalita lamang ang marunong, marami na ang natutuwa, ngunit anumang papuri ang sabihin ng hangal, wala ring maniwala.

¹⁴Wala kang papakinabangan sa regalo ng isang hangal pagkat ang gantimpalang hintay niya'y pitong ulit ng kanyang bigay.

¹⁵Bawat munting kaloob niya'y may kasamang panunumbat, at kung siya'y magsalita, mahihiya ang trumpeta. Kapag ngayo'y umutang ka, bukas ay sisingilin ka agad niya. Sinong hindi magagalit sa kanyang kahangalan?

¹⁶Lagi niyang hinanakit: “Mga kaibigan ko'y hindi tapat, mga walang utang na loob, di marunong magpasalamat. Matapos na pakainin ko, kung anu-ano pa ang isinusumbat!”

¹⁷Kaya't siya'y laging kukutyain ng mga tao.[54] Di Wastong Pangungusap

¹⁸Mabuti pang madulas ang paa kaysa madulas ang dila; ito ang malimit maging sanhi ng pagbagsak ng masamang tao.

¹⁹Ang taong may magaspang na ugali ay parang malaswang balita, lagi na lamang pinag-uusapan ng mga taong masama ang tubo ng dila.

²⁰Walang makikinig sa magandang aral kung galing sa hangal, sapagkat sinasabi niya iyon nang wala sa lugar.

²¹Ang taong hindi makagawa ng masama dahil sa karukhaan, ay di liligaligin ng kanyang budhi pagdating ng gabi.

²²May nagpapatiwakal dahil sa maling kahihiyan; kikitlin niya ang kanyang buhay dahil sa kahangalan.

²³May nangangako sa kaibigan dahil lamang sa hiyang tumanggi, kaya lumilikha siya ng kaaway nang walang tunay na dahilan.

²⁴Isang maitim na batik sa isang tao ang magsinungaling, ngunit ang ganitong gawain ay mamamalagi sa labi ng mga hangal.

²⁵Mas mabuti pa ang magnanakaw kaysa sa sanay magsinungaling, subalit kapwa sila hahantong sa kapahamakan.

²⁶Ang pagsisinungaling ay ugaling kasuklam-suklam, at ang kasiraang-puri ng sinungaling ay panghabang-panahon. Ang Pagiging Katiwala ng Karunungan

²⁷Ang magaling magsalita higit na sasagana, at nakukuha ng matalino ang kalooban ng may kapangyarihan.

²⁸Pagbutihin mo ang pagbubungkal nang mag-ani ka nang sagana, kapag nakuha mo ang kalooban ng may kapangyarihan, patatawarin ka sa iyong mga pagkukulang.

²⁹Kahit sa matalino'y nakakasilaw ang panunuyo at regalo, nagiging busal na pumipigil sa kanya na magpahayag ng saway.

³⁰Ang karunungang di ginagamit ay tulad ng nakatagong kayamanan; hindi ito papakinabangan ninuman.

³¹Mabuti pang di hamak ang hangal na nagtatago ng kanyang kamangmangan, kaysa isang marunong na ayaw gumamit ng kanyang karunungan.[55]