Read Magandang Balita Biblia Ecclesiastico 21 Bible Online

Ecclesiastico 21 - Magandang Balita Biblia bible

Ecclesiastico 21

¹Ang Kasalanan Anak, nakagawa ka ba ng kasalanan? Huwag mo nang ulitin ito at humingi ka agad ng tawad.

²Layuan mo ang kasalanan na parang ahas; kapag lumapit ka'y tutuklawin ka niyan. Ang kanyang mga ngipin ay simbagsik ng ngipin ng leon at nakamamatay.

³Ang paglabag sa batas ay parang tabak na magkabila'y talim, ang masugatan nito'y wala nang paggaling.

⁴Ang palalo at mayabang ay mawawalan ng kayamanan; aalisin ito sa kanya ng paggalang at karahasan.

⁵Dinidinig agad ng Panginoon ang daing ng maralita, at agad na ibinibigay ang katarungan.

⁶Landas ng makasalanan ang tinutunton ng ayaw tumanggap ng pangaral, ngunit ang may paggalang sa Panginoon ay nagsisisi nang buong puso.

⁷Bantog sa lahat ng dako ang taong magaling magsalita, ngunit halata agad siya ng marunong kapag nagkamali.

⁸Ang nagpapatayo ng bahay sa pamamagitan ng salaping inutang, ay parang nag-iipon ng bato para sa sariling libingan.[56]

⁹Ang kalipunan ng masamang tao ay parang bunton ng kusot, hindi magtatagal at ito'y magliliyab.

¹⁰Parang nilatagan ng bato ang daan ng makasalanan, ngunit ang tinutungo nito'y ang daigdig ng mga patay. Karunungan at Kahangalan

¹¹Ang sumusunod sa Kautusan ay nagsisikap na supilin ang kanyang mga hilig; at ang karunungan ang siyang kabuuan ng paggalang sa Panginoon.

¹²Mahirap turuan ang taong kulang sa katalinuhan, ngunit kung minsan, ang katalinuhan ay nagbubunga ng kapaitan.

¹³Ang kaalaman ng marunong ay lumalaking parang baha, at ang kanyang mga payo ay parang batis ng tubig na buháy.

¹⁴Ang isipan ng hangal ay parang sisidlang basag, hindi ito malalagyan ng karunungan.

¹⁵Kapag marunong ang nakarinig ng isang magandang aral, pinupuri niya iyon at dinaragdagan pa; ngunit kung hangal ang nakarinig, nililibak niya iyon at tinatalikuran agad.

¹⁶Mahirap na talaga ang makinig sa hangal, para kang naglalakad na may kargang mabigat. Sa kabilang dako, kawili-wili ang makinig sa marunong.

¹⁷Malugod na pinakikinggan ng kalipunan ang bawat salita ng marunong; pinagbubulay-bulayan ng bawat makarinig ang kanyang mga sinabi.

¹⁸Ang karunungan ng hangal ay parang bahay na nakahilig, ang nalalaman niya'y isang tambak na kasabihang hindi naman niya nauunawaan.

¹⁹Para sa hangal ang pag-aaral ay isang tanikala sa kanyang mga paa, parang posas na nakagapos sa kanyang mga kamay.

²⁰Ngunit para sa matalino, ang pag-aaral ay isang gintong hiyas, isang pulseras na nakasuot sa kanyang bisig. Ang hangal, kung matuwa'y humahalakhak, ngunit ang marunong ay mahinhing ngumingiti lamang kung hinihingi ng pagkakataon.

²²Ang hangal ay kaagad sumusugod na papasok sa isang bahay, ngunit ang may karanasan ay mapitagang naghihintay sa labas.

²³Ang lapastangan ay sumisilip sa loob ng bahay mula sa pintuan, ngunit ang may magandang asal ay naghihintay muna sa labas ng bahay.

²⁴Labag sa kagandahang-asal ang makinig sa kabila ng pinto, mahihiyang gumawa nang gayon ang taong matino.

²⁵Walang ginagawa ang madaldal kundi ipamalita ang bawat marinig, ngunit tinitimbang muna ng marunong ang bawat sasabihin.

²⁶Sinasabi ng hangal ang bawat maisipan, ngunit ang marunong ay nag-iisip muna bago magsalita.

²⁷Kapag sinumpa ng makasalanan ang kanyang kaaway,[57] para na ring sinumpa niya ang kanyang sarili.

²⁸Dinudungisan ng madaldal ang sariling pangalan, at kinapopootan siya ng mga kapitbahay.