Read Magandang Balita Biblia Ecclesiastico 27 Bible Online

Ecclesiastico 27 - Magandang Balita Biblia bible

Ecclesiastico 27

¹Maraming nandaraya sa hangad na tumubo at upang yumaman, nagiging walang puso.

²Ang pandaraya'y mahirap mawala sa pagbibilihan; para itong kahoy na nakatusok sa pagitan ng dalawang bato.

³Ang sambahayan ng isang tao'y madaling babagsak, kung hindi matibay ang kanyang paggalang sa Diyos. Ang Pagsasalita

⁴Kapag niliglig mo ang bistay, maiiwan ang magaspang; kapag ang tao'y nagsalita, kapintasa'y lumilitaw.

⁵Ang gawa ng magpapalayok ay sa hurno nasusubok, ang pagkatao ng sinuma'y makikita sa kanyang pangangatuwiran.

⁶Sa bunga ng punongkahoy nakikilala ang ginagawang pag-aalaga; sa pangungusap ng isang tao, damdamin niya'y nahahalata.

⁷Huwag mo munang pupurihin ang isang tao hanggang hindi nagsasalita, sapagkat doon mo pa makikilala ang tunay niyang puso't diwa. Ang Katapatan

⁸Kung ang hangad mo'y katarungan, ito'y iyong makakamtan, at maisusuot mo pa ito, gaya ng mamahaling balabal.

⁹Ang ibong magkakatulad, sama-sama sa hapunan; ang katapatan ay nagbubunga ng katapatan.

¹⁰Ang kasalana'y naghihintay sa gumagawa ng masama, parang leong nag-aabang ng anumang masisila. Ang Usapang Walang Kabuluhan

¹¹Ang pangungusap ng makadiyos ay palaging may katuturan, ngunit ang sinasabi ng hangal ay pabagu-bagong parang buwan.

¹²Kapag ang kausap mo'y mga hangal, magmadali kang umalis; ngunit kapag marurunong, manatili kang nakikinig.

¹³Masakit sa pandinig ang usapan ng mga hangal, wala na silang napapag-usapan kundi puro kalaswaan.

¹⁴Nakakapanindig ng balahibo ang kanilang pagmumurahan; at kung sila'y nagtatalo, tainga ninyo'y inyong takpan.

¹⁵Humahantong sa pagdanak ng dugo ang pag-aaway ng mga palalo. Nakakasakit pakinggan ang kanilang pagmumurahan. Ang Pagbubunyag ng Lihim

¹⁶Ang di marunong mag-ingat ng lihim ay hindi mapagkakatiwalaan, at hindi siya makakakita ng tunay na kaibigan.

¹⁷Mahalin mo ang kaibigan mo at maging tapat ka sa kanya; ngunit kung naibunyag mo ang kanyang lihim, huwag ka nang lalapit sa kanya.

¹⁸Sapagkat pinatay mo na ang inyong pagkakaibigan, gaya ng pagpatay ng isang tao sa kanyang kaaway.

¹⁹Pinalayo mo ang iyong kaibigan, parang ibong nakawala sa iyong mga kamay. Hindi mo na siya mahuhuli uli magpakailan pa man.

²⁰Huwag mo na siyang sundan, malayo na siya ngayon; nagmamadali siya nang pagtakas, parang usang nakaalpas sa bitag.

²¹Ang sugat ay maaari pang gamutin, ang kasalana'y maaari pang mapatawad; ngunit ang pagsisiwalat ng lihim ay wala nang nalalabing lunas. Ang Pagpapaimbabaw

²²Ang taong malikot ang tingin ay masama ang binabalak, at walang makakahadlang sa kanyang iniisip.

²³Anong tamis niyang mangusap kapag siya'y kaharap, kunwari'y hangang-hanga sa iyong sinasabi. Ngunit sa talikura'y agad siyang nag-iiba, at ang bawat sinabi mo'y pinauuwi sa masama.

²⁴Wala akong kinamumuhiang tulad ng gayong tao, at kasuklam-suklam din siya sa harap ng Panginoon.

²⁵Kung bumato siya nang paitaas, sa ulo rin niya ang bagsak. Kapag siya ay nanaksak, siya rin ay mapapahamak.

²⁶Ang naghuhukay ng patibong ay malamang na mahulog doon, ang nag-uumang ng bitag ay malamang na siyang mahuli.

²⁷Ang taong gumagawa ng masama ay ginagantihan din ng masama, at hindi niya alam kung saan ito magmumula.

²⁸Ang palalo ay mahilig sa panunuya at panlalait. Ang ganting laan sa kanya'y parang leong nag-aabang.

²⁹Ang natutuwa sa kasawian ng makadiyos ay mahuhulog sa bitag; at bago sumapit ang kamatayan, malilibing sila sa hirap. Ang Galit

³⁰Ang poot at pagngingitngit ay dapat ding kamuhian; ngunit sa makasalanan, iyan ay pangkaraniwan.