Read Magandang Balita Biblia Ecclesiastico 3 Bible Online

Ecclesiastico 3 - Magandang Balita Biblia bible

Ecclesiastico 3

¹Tungkulin sa Magulang Mga anak, ako'y inyong ama, kaya makinig kayo. Gawin ninyo ito, at di kayo mapapahamak.

²Sapagkat ang mga ama ay binigyan ng Panginoon ng kapangyarihan sa mga anak, at iniuutos niya na sundin ng mga anak ang kanilang ina.

³Ang gumagalang sa kanyang ama'y nagbabayad na sa kanyang kasalanan,

⁴at ang nagpaparangal sa kanyang ina'y parang nag-iimpok ng kayamanan.

⁵Ang gumagalang sa kanyang ama'y paliligayahin naman ng kanyang mga anak, at ang panalangin niya'y agad diringgin ng Panginoon.

⁶Pahahabain ng Diyos ang buhay ng nagpaparangal sa kanyang mga magulang— siya na sumusunod sa Panginoon.

⁷Ang may paggalang sa Panginoong Diyos ay gumagalang sa kanyang mga magulang, at pinaglilingkuran niya ang kanyang magulang na parang panginoon niya.

⁸Igalang mo ang iyong ama sa salita at sa gawa, upang sumaiyo ang kanyang pagpapala.

⁹Pinatatatag ng pagpapala ng isang ama ang pamumuhay ng mga anak, ngunit ito ay sinisira ng sumpa ng isang ina.

¹⁰Huwag mong ipagkakalat ang kahihiyan ng iyong ama, sapagkat ang kanyang kahihiyan ay hindi mo ikararangal.

¹¹Ikararangal ng sinuman ang gumalang sa kanyang ama, at kahihiyan ng mga anak ang di gumalang sa kanilang ina.

¹²Anak, kalingain mo ang iyong ama kapag siya'y matanda na, at huwag mo siyang dudulutan ng sama ng loob habang nabubuhay.

¹³Pagpaumanhinan mo siya kapag nanlalabo na ang kanyang isip; huwag mo siyang lalapastanganin ngayong nasa kasibulan ka na ng iyong lakas.

¹⁴Ang paglingap mo sa iyong ama ay di malilimutan, iyan ay magiging kabayaran sa iyong mga kasalanan.

¹⁵Ang ginawa mo sa iyong ama ay aalalahanin ng Panginoon, at ang mga kasalanan mo'y matutunaw na parang yelo pagdating ng tag-init.

¹⁶Ang sinumang magpabaya sa kanyang ama ay para nang lumapastangan sa Diyos, at ang gumagawa ng ikagagalit ng ina'y susumpain ng Panginoon. Ang Kababaan ng Loob

¹⁷Anak, maging mapagpakumbaba ka sa pagtupad ng tungkulin, at mamahalin ka ng mga malapit sa Diyos.[12]

¹⁸Habang ika'y dumadakila, lalo ka namang magpakumbaba; sa gayo'y kalulugdan ka ng Panginoon.[13]

²⁰Sapagkat kahanga-hanga ang kapangyarihan ng Panginoon at dinadakila siya ng mga nagpapakumbaba.

²¹Huwag mong hangaring maunawaan ang mga bagay na lampas sa iyong kakayahan, huwag mong saliksikin ang hindi mo kayang malaman.

²²Sundin mo ang Kautusang bigay sa iyo ng Panginoon; huwag mong pagkaabalahan ang inilihim niya sa iyo.

²³Huwag mong pakialaman ang di mo saklaw, sapagkat marami sa mga itinuro sa iyo ay lampas sa pang-unawa ng tao.

²⁴Maraming naliligaw dahil sa kanilang pabigla-biglang hatol; napilipit ang kanilang isipan ng kanilang maling palagay.[14]

²⁶Ang matigas ang ulo'y daranas ng pasakit sa bandang huli; ang mahilig sa panganib ay ipapahamak nito.

²⁷Ang matigas ang ulo'y laging nasusubo sa ligalig; ang nawili na sa kasalana'y palaging magkakasala.

²⁸Walang katapusan ang kapighatian ng palalo; nag-ugat na ang kasamaan sa kanyang puso.

²⁹Pinahahalagahan ng matalino ang mga talinghaga; nakikinig ang marunong pagkat nais niyang matuto. Ang Pagtulong sa Maralita

³⁰Kung ang tubig ay pumapatay ng apoy, ang pagkakawanggawa ay pumapawi ng kasalanan.

³¹Ang gumagawa ng mabuti sa kapwa ay naghahanda para sa kinabukasan, sapagkat kapag siya naman ang nagipit, mayroon siyang masasandalan.