Read Magandang Balita Biblia Ecclesiastico 30 Bible Online

Ecclesiastico 30 - Magandang Balita Biblia bible

Ecclesiastico 30

¹Ang Pagpapalaki sa Anak Ang nagmamahal sa anak ay malimit gumamit ng pamalo, upang ang anak ay maging kasiyahan niya paglaki nito.

²Ang mahigpit sa anak ay makikinabang sa huli; sa kanyang mga kaibigan, ito'y maipagmamalaki.

³May naipagmamalaki sa mga kaibigan ang mabuting magturo sa anak, at kinaiinggitan pa ng kanyang mga kaaway.

⁴Kahit na siya'y patay na, wari'y buháy pa rin siya, sapagkat ang kanyang naiwan ay tunay na larawan niya.

⁵Habang buháy siya sa daigdig, ang dulot ng anak ay kasiyahan, at pagsapit ng kamatayan, papanaw siyang walang agam-agam.

⁶Ang iniwan niyang anak ang maghihiganti sa kanyang mga kaaway, at ito rin ang magbabayad ng utang na loob niya sa mga kaibigan.

⁷Ang nagpapalayaw sa anak ay lubhang masasaktan, at magigimbal ang puso niya sa bawat daing.

⁸Ang kabayong hilaw-sa-turo ay mahirap na pigilin, ang anak na pinalayaw ay mahirap na supilin.

⁹Kapag pinalayaw mo ang anak, ikaw ang tatakutin; makipagbiro ka sa kanya at ikaw ang paluluhain.

¹⁰Huwag kang makipagtawanan sa kanya, kung hindi mo nais lumuhang kasama niya, at magngalit ang ngipin sa sama ng loob.

¹¹Huwag mo siyang pabayaang gawin ang lahat ng magustuhan, at huwag mong palalampasin ang kanyang mga pagkukulang.

¹²Disiplinahin mo siya habang bata pa; paluin mo kung kinakailangan[74] at kung hindi, lalaki siyang matigas ang ulo at suwail, at wala kang mahihintay kundi kapighatian.

¹³Disiplinahin mo ang iyong anak at turuang magtrabaho, kung hindi, pawang kahihiyan ang idudulot niya sa iyo. Ang Kalusugan

¹⁴Mabuti pa ang maging dukha ngunit malakas ang katawan kaysa maging mayaman na puro naman karamdaman.

¹⁵Mas mahalaga kaysa ginto ang kalusugan, ang lakas ng katawan[75] kaysa maraming kayamanan.

¹⁶Walang kayamanang maipapalit sa lusog ng katawan, walang kasiyahang hihigit pa sa ginhawa ng kalooban.

¹⁷Mabuti pa ang mamatay kaysa mabuhay sa gitna ng pagdurusa, mabuti pa ang mamayapa kaysa magkasakit nang matagal. Tungkol sa mga Pagkain

¹⁸Ang masarap na pagkaing dulot sa walang ganang kumain, ay parang pagkaing handog sa mga diyus-diyosan.[76]

¹⁹Anong kabuluhan ng pagkaing handog sa diyus-diyosan na hindi naman nakakakain o nakaaamoy? Ganyan ang taong pinarusahan ng Panginoon,

²⁰pinagmamasdan na lamang niya ang pagkain at napapabuntong-hininga, gaya ng kapon na yumayakap sa dalaga at naghihinagpis sa panghihinayang.[77] Ang Kasayahan at Kalungkutan

²¹Huwag kang patangay sa kalungkutan, at huwag mong pahirapan ang sarili sa malabis na pagdaramdam.

²²Ang kagalakan ng puso ang siyang nagpapasigla sa tao, at ang kaligayahan ang nagpapahaba ng buhay.

²³Magsaya ka at mag-aliw;[78] iwaksi mo nang malayo ang iyong mga kalungkutan. Marami na ang napahamak dahil sa alalahanin, at wala namang nakikinabang sa pamimighati.

²⁴Ang inggit at poot ay nakapagpapaikli ng buhay, at ang pag-aalala ay madaling nakapagpapatanda.

²⁵Ang may masaya at magandang kalooban ay maganang kumain at nasisiyahan dito.