Read Magandang Balita Biblia Ecclesiastico 37 Bible Online

Ecclesiastico 37 - Magandang Balita Biblia bible

Ecclesiastico 37

¹Dalawang Uri ng Kaibigan “Magkaibigan tayo,” sabi ng alinmang kaibigan, ngunit may mga kaibigang sa pangalan lamang.

²Mapait pa kaysa kamatayan ang kalungkutang daranasin kung ang pinakamatalik mong kaibigan ay maging kaaway.

³O isipang masama, paano kang nakapasok sa daigdig upang ang lupa'y punuin ng panlilinlang?

⁴May kaibigang malapit lamang sa iyo habang ikaw ay sagana, ngunit iiwan ka niya sa panahon ng kagipitan.

⁵Ang tapat na kaibiga'y handang makipaglaban para sa iyo at magsisilbing kalasag mo laban sa kaaway.[87]

⁶Huwag mong kalilimutan ang kaibigang nakipaglaban para sa iyo, huwag mo siyang itatakwil kapag ikaw ay sumagana. Tungkol sa Payo

⁷Lahat ng tagapayo'y may kanya-kanyang ipapayo, ngunit mayroong nagpapayo para sa sariling kapakinabangan.

⁸Mag-iingat ka kapag may nagpapayo sa iyo, tingnan mo muna kung ano ang papakinabangin niya. Sapagkat kung ang payo niya ay makakabuti sa kanya, baka ikaw ay kinakasangkapan lamang niya.

⁹Marahil sasabihin niya: “Mahusay! Tamang-tama ang ginawa mo.” At pagkatapos ay malugod na lamang niyang panonoorin ang mangyayari sa iyo.

¹⁰Huwag kang hihingi ng payo sa taong walang tiwala sa iyo, at huwag ka namang magbibigay ng payo sa mga naiinggit sa iyo.

¹¹Huwag kang magtatanong sa isang babae tungkol sa kanyang karibal, sa isang duwag tungkol sa digmaan, sa mangangalakal tungkol sa halaga ng bilihin, sa mamimili tungkol sa iyong ipinagbibili, sa kuripot tungkol sa pagtanaw ng utang na loob, sa malupit tungkol sa paglingap sa kapwa, sa taong tamad tungkol sa anumang uri ng gawa, sa isang pansamantalang manggagawa tungkol sa pagtatapos ng isang gawain, o sa isang aliping tamad tungkol sa isang malaking gawain; huwag kang hihingi ng payo sa sinuman sa mga ito.

¹²Sa halip, lumapit ka sa taong may takot sa Diyos, sa taong kilala mong masunurin sa Kautusan. Magtanong ka sa isang katulad mo ang kaisipan, na maaawa sa iyo kung ikaw ay magkamali.

¹³At sa wakas, pakinggan mo ang itinitibok ng iyong puso, sapagkat wala kang dapat pagtiwalaan nang higit sa riyan.

¹⁴Kalimitan, higit ang masasabi ng sariling kaisipan, kaysa pitong bantay na nasa isang mataas na tore.

¹⁵Higit sa lahat, dumalangin ka sa Kataas-taasan, upang akayin ka niya sa katotohanan sa lahat mong gagawin. Karunungan at Pagtitiwala

¹⁶Lahat ng panukala'y kailangang pag-usapan muna, at anumang gawai'y kailangan munang isipin.

¹⁷Sa isipan binabalangkas ang lahat ng panukala ng tao, at ang mga ito'y sa apat nauuwi:

¹⁸sa mabuti o sa masama, sa buhay o sa kamatayan, subalit ang lahat ng ito'y dila ang naghahayag.

¹⁹Mayroong tao na sa karununga'y nakakapagturo sa iba, ngunit hangal naman sa sariling kapakanan;

²⁰Mayroon namang napakagaling magsalita, ngunit sa halip na makaakit, marami ang nasusuya, kaya't sa wakas ay kinakapos pa sa ikabubuhay.

²¹Ganyan ang mangyayari sa taong walang pakisama, na di pinagkalooban ng Panginoon ng kaalaman sa pakikitungo sa kapwa.

²²Kapag ang isang tao'y magandang magpalakad ng sariling kapakanan, ang kanyang katalinuha'y nakikita sa kanyang pananalita.

²³Kung ang karunungan ng isang tao'y pinakikinabangan ng bayan, ang kanyang katalinuha'y dapat pagtiwalaan.

²⁴Ang tunay na marunong ay pupurihin ng karamihan, at siya'y ituturing na mapalad ng bawat makakita sa kanya.

²⁵Ang buhay ng isang tao ay maikli lamang, ngunit hindi mabibilang ang mga araw ng bansang Israel.

²⁶Ang tunay na marunong ay pinagtitiwalaan ng kanyang bayan, at mananatili kailanman ang kanyang pangalan. Ang Pagtitimpi

²⁷Anak ko, sa buong buhay mo'y lagi mong aalagaan ang iyong sarili, at huwag kang kakain ng anumang makakapinsala sa iyo.

²⁸Sapagkat hindi lahat ng pagkain ay makakabuti sa lahat ng tao, at hindi rin nasasarapan ang lahat ng tao sa lahat ng pagkain.

²⁹Huwag mong hangaring matikman ang lahat ng pagkain, at huwag kang magpakalabis sa anumang ihain sa iyo.

³⁰Nagdudulot ng sakit ang pagkain nang labis, at ang katakawan ay nauuwi sa sakit ng tiyan.

³¹Marami na ang namatay sa katakawan, iwasan mo ito at hahaba ang iyong buhay.