Read Magandang Balita Biblia Ecclesiastico 49 Bible Online

Ecclesiastico 49 - Magandang Balita Biblia bible

Ecclesiastico 49

¹Si Josias Parang mabangong insenso ang pangalan ni Josias, insenso na tinimpla ng mahusay na manggagawa ng pabango; parang pulot na kinawiwilihan ng lahat, parang malambing na tugtugin sa isang handaan.

²Kinamuhian niya ang mga kasalanan ng bayan, at winasak ang kanilang mga kasuklam-suklam na diyus-diyosan.

³Naging matatag ang kanyang katapatan sa Diyos, at nanatiling maka-Diyos sa mga panahon ng kasamaan. Si Jeremias

⁴Liban kina David, Hezekias at Josias, nagpakasamang lahat ang mga hari ng Juda. Tinalikuran nila ang Kautusan ng Kataas-taasang Diyos, kaya't sa wakas, inalis sa kanila ang pagkahari.

⁵Inilipat ng Diyos sa iba ang kanilang kapangyarihan, at ang karangalan nila'y ibinigay sa isang bayang dayuhan.

⁶Sinunog ng mga ito ang banal na lunsod, at iniwang parang ilang ang kanyang mga lansangan. Ito'y ipinahayag na ni Jeremias noong una,

⁷sapagkat siya'y kanilang pinag-usig at inalimura, bagaman siya'y hinirang na propeta mula pa sa tiyan ng ina upang maggiba, magwasak at bumunot, at upang magtayo, magbuo at magtanim. Si Ezekiel

⁸Si Ezekiel ang nakakita ng kagila-gilalas na pangitain tungkol sa kaluwalhatian ng Diyos. Nakita niya iyon lulan ng isang karwahe na hila ng mga kerubin.

⁹Binanggit din niya si Job, ang lalaking nanatili sa landas ng katuwiran. Ang Labindalawang Propeta

¹⁰Tungkol naman sa labindalawang propeta, nawa'y muling manariwa ang buto nila sa libingan. Sapagkat dahil sa kanilang pananampalataya at pag-asa, inaliw nila at pinalakas ang loob ng bansang Israel. Si Zerubabel at si Josue

¹¹Paano natin mapaparangalan nang sapat si Zerubabel? Siya'y naging parang singsing na pantatak sa daliri ng Panginoon,

¹²at gayundin si Josue na anak ni Jozadak. Noong panahon nila muling ibinangon ang Templo. Ipinagtayo nila ang Panginoon ng isang tahanan na nakatalagang maging maluwalhati magpakailanman. Si Nehemias

¹³Kailangan ding alalahanin at parangalan si Nehemias; siya ang muling nagbangon ng ating mga guhong muog; siya ang naglagay ng mga pinto at tarangka niyon at nagtayo ng ating mga tahanan. Ang mga Patriarka

¹⁴Sa mga nabuhay sa daigdig, wala pang katulad si Enoc, sapagkat siya'y buháy na dinala sa langit.

¹⁵Wala pa ring isinilang na katulad ni Jose, ang pinakadakila sa kanyang mga kapatid at naging sandigan ng kanyang lahi; pati ang kanyang mga buto ay pinarangalan.[111]

¹⁶Dakila sina Shem, Set, at Enos,[112] ngunit si Adan ang nangunguna sa lahat ng nilikha.