Read Magandang Balita Biblia Ecclesiastico 5 Bible Online

Ecclesiastico 5 - Magandang Balita Biblia bible

Ecclesiastico 5

¹Ang Labis na Pagtitiwala sa Sarili Huwag kang manalig sa iyong kayamanan at huwag mong sabihing, “Wala na akong kailangan.”

²Huwag kang padadala sa labis na hangarin, na makamtan lamang ang gusto'y gagawin ang lahat.

³Huwag mong sabihing wala kang kinikilalang kapangyarihan, sapagkat darating ang panahong paparusahan ka ng Panginoon.

⁴Huwag mo ring sabihin, “Wala namang nangyari sa akin, matapos akong magkasala!” Dahil ang Panginoon ay hindi madaling magalit.

⁵Huwag kang masanay sa paggawa ng kasalanan dahil sa pag-asang lagi ka niyang patatawarin.

⁶Huwag mong sabihin, “Walang katapusan ang kanyang habag. Patatawarin niya ako, gaano man karami ang aking kasalanan.” Sapagkat kung siya'y marunong maawa, marunong din siyang magalit, at ang kanyang galit ay nakatuon sa mga makasalanan.

⁷Magbalik-loob ka na agad sa Panginoon; huwag mong ipagpabukas ang pakikipagkasundo sa kanya, sapagkat biglang darating ang araw ng paghihiganti, at mamamatay ka sa kanyang pagpaparusa.

⁸Huwag kang manalig sa kinamkam mong kayamanan, sapagkat hindi mo ito papakinabangan sa araw ng kapighatian. Katapatan at Pagpipigil sa Sarili

⁹Huwag mong basta-bastang pagbigyan ang lahat, at huwag kang sumang-ayon sa bawat sabihin ninuman. Ganyan ang gawa ng mga taong sinungaling.

¹⁰Magpakatatag ka sa iyong mga patakaran, at panindigan mo ang iyong sinabi.

¹¹Lagi kang manabik sa pakikinig, at maging maingat ka sa pagsagot.

¹²Kung nauunawaan mo ang pinag-uusapan, sumagot ka; ngunit kung hindi, itikom mo ang iyong bibig.

¹³Ang pananalita'y maaaring ikarangal o ikapahiya; ang dila ng isang tao'y maaaring ikapahamak niya.

¹⁴Huwag kang pabalitang isang tsismoso, at huwag kang magkakalat ng balitang makakapinsala sa sinuman. Kung paanong ang mga magnanakaw ay mapapahiya, ang sinungaling naman ay kamumuhian.

¹⁵Pag-ingatan mong huwag magkulang sa malaki o maliit mang bagay, at huwag kang maging kaaway sa halip ay manatiling isang kaibigan.