Read Magandang Balita Biblia Ecclesiastico 6 Bible Online

Ecclesiastico 6 - Magandang Balita Biblia bible

Ecclesiastico 6

¹Ang kasiraang-puri ay nagdudulot ng kahihiyan at pagkawala ng tiwala, na siyang marapat sa isang makasalanang sinungaling.

²Huwag kang patatangay sa matinding alab ng damdamin, baka suwagin ka niya na parang torong baliw,

³o baka ubusin niya ang mga dahon mo at sirain ang iyong bunga, at maiwan kang parang tuyot na punongkahoy.

⁴Ipapahamak ka ng iyong masasamang pagnanasa, hanggang sa pagtawanan ka ng iyong mga kaaway. Ang Pakikipagkaibigan

⁵Ang magiliw na tinig ay nakakaakit ng maraming kaibigan, at ang matamis na pananalita'y susuklian ng magandang sagot.

⁶Makipagbatian ka sa maraming tao, ngunit isa lamang sa sanlibo ang hihingan mo ng payo.

⁷Bago ka makipagkaibigan kaninuman, subukin mo muna siya, at huwag mo siyang pagtitiwalaan agad.

⁸Sapagkat may mga kaibigang mapagsamantala na di mo maaasahan sa oras ng pangangailangan.

⁹May kaibigang hindi nagtatagal at nagiging kaaway mo, at ibubunyag pa niya ang pagkakagalit ninyo, palalabasin ka pa niyang kahiya-hiya.

¹⁰Mayroon ding kaibigang kasalu-salo mo sa pagkain, ngunit pababayaan ka sa oras ng kagipitan.

¹¹Sa kasaganaan, didikit siya sa iyo na parang anino, uutusan niya pati ang mga katulong mo;

¹²ngunit sa kasawia'y pababayaan ka niya, pagtataguan ka, at di mo na siya makikita.

¹³Lumayo ka sa kaaway, at mag-ingat ka sa kaibigan.

¹⁴Ang matapat na kaibiga'y parang matibay na kanlungan, kapag nakatagpo ka ng tulad niya'y para kang nakahukay ng kayamanan.

¹⁵Walang kasinghalaga ang matapat na kaibigan; hindi siya matutumbasan ng gaano mang salapi.

¹⁶Ang matapat na kaibiga'y parang gamot na nagbibigay-buhay, at siya'y matatagpuan lamang ng mga may paggalang sa Panginoon.

¹⁷Ang may paggalang sa Panginoo'y makakatagpo ng tapat na kaibigan, at ang mga kaibigan niya'y tulad niyang may paggalang sa Panginoon. Matuto ka sa Karunungan

¹⁸Anak, mula pa sa iyong kabataan pahalagahan mo na ang Karunungan, at kapag tumanda ka'y patuloy mo siyang makakamtan.

¹⁹Linangin mo ang Karunungan gaya ng ginagawa ng magsasaka sa kanyang bukirin, at mag-aani ka nang masagana; magpagod kang sumandali sa pag-aalaga sa kanya, at lalasap ka ng masarap niyang bunga.

²⁰Mahirap siyang kamtan ng ayaw mag-aral, hindi magtitiyaga sa kanya ang may mahinang kalooban.

²¹Para sa mangmang, ang Karunungan ay batong mabigat na di magtatagal at kanyang ibabagsak.

²²Ang Karunungan[19] ay talagang mahirap kamtan, iilan lamang ang tunay na nakakakilala sa kanya.

²³Makinig ka, anak ko't narito ang aking tagubilin, huwag mong tanggihan itong aking payo.

²⁴Bayaan mong gapusin ng Karunungan ang iyong mga paa, at isuot sa iyong leeg ang pamatok niya.

²⁵Yumuko ka at nang makasakay siya sa iyong balikat, at huwag kang maghimagsik sa kanyang kapangyarihan.

²⁶Buong puso mo siyang suyuin, at sundin nang buo mong lakas ang kanyang mga tuntunin.

²⁷Hanapin mo siya at siya'y iyong matatagpuan, at minsang mahawakan ay huwag mo nang pakakawalan.

²⁸Sa wakas, malalasap mo ang ginhawang dulot niya, at siya ay magiging kaligayahan mo.

²⁹Ang mga tanikala niya'y magiging sandata mo, at ang kanyang pamatok ay maharlikang kasuotan.

³⁰Ang pamatok niya'y magiging isang gintong hiyas, at ang tali niya'y pamigkis na bughaw.

³¹Isusuot mo siyang parang damit na marilag, at ipuputong siya sa iyo bilang korona ng kagalakan.

³²Kung nais mo'y magiging marunong ka; magsikap ka lamang, ikaw ay magiging matalino.

³³Kung mawilihin kang makinig, ikaw ay matututo; at kung pahahalagahan mo ang iyong narinig, ikaw ay dudunong.

³⁴Kapag dumalo ka sa kapulungan ng matatanda, piliin mo kung sino sa kanila ang marunong at sa kanya ka pumanig.

³⁵Maging masigasig ka sa pakikinig ng aral ng mga makadiyos, at huwag mong kaliligtaan ang mga makahulugang talinghaga.

³⁶Kapag nakatagpo ka ng isang matalino, agapan mo ang pagdalaw sa kanya; at puntahan mo siya nang malimit hanggang sa ikaw na lamang ang makapudpod sa pasukan ng kanyang bahay.

³⁷Sundin mo ang mga batas ng Panginoon, lagi mong pag-aralan ang kanyang Kautusan, at palilinawin niya ang iyong pag-iisip, at kakamtan mo ang karunungang iyong minimithi.