Read Magandang Balita Biblia Mga Panaghoy 3 Bible Online

Mga Panaghoy 3 - Magandang Balita Biblia bible

Mga Panaghoy 3

¹Naranasan ko kung gaano kahirap ang maparusahan ng Diyos.

²Itinaboy niya ako sa lugar na wala kahit bahagyang liwanag.

³Walang awa niya akong hinahampas sa buong maghapon.

⁴Tadtad ng sugat ang buo kong katawan at bali-bali ang aking mga buto.

⁵Ibinilanggo niya ako sa kalungkutan at pagdurusa.

⁶Isinadlak niya ako sa kadiliman, laging nasa bingit ng kamatayan.

⁷Ginapos niya ako para hindi makatakas, pinalibutan ako ng pader na mataas.

⁸Nanambitan man ako at humingi ng tulong, hindi niya dininig ang aking dalangin.

⁹Susuray-suray ako sa tindi ng hirap, at kahit saan ako bumaling ay may pader na nakaharang.

¹⁰Siya'y parang osong nag-aabang sa akin; at parang leong nag-aantay.

¹¹Hinabol niya ako saka niluray; at iniwang nakahandusay.

¹²Iniakma niya ang kanyang pana, at ako ang ginawang tudlaan.

¹³Tinamaan ako sa aking puso ng kanyang mga palaso.

¹⁴Buong araw ako'y pinagtatawanan; sa mga kwentuhan ako ay biruan.

¹⁵Pawang kapaitan at kalungkutan ang ipinalasap niya sa akin.

¹⁶Inginudngod niya sa lupa ang aking mukha at idinikdik sa bato ang aking bibig.

¹⁷Naglaho sa akin ang bakas ng kalusugan, maging kapayapaan at kaligayahan man.

¹⁸Kaya't sinasabi ko, “Nawala na ang aking lakas at ang aking pag-asa kay Yahweh.”

¹⁹Simpait ng apdo ang alalahanin sa aking paghihirap at kabiguan.

²⁰Lagi ko itong naaalaala, at ako'y labis na napipighati.

²¹Gayunma'y nanunumbalik ang aking pag-asa kapag naalala kong:

²²Pag-ibig mo, Yahweh, ay hindi nagmamaliw; kahabagan mo'y walang kapantay.

²³Ito ay laging sariwa bawat umaga; katapatan mo'y napakadakila.

²⁴Si Yahweh ay akin, sa kanya ako magtitiwala.

²⁵Si Yahweh ay mabuti sa mga nananalig at umaasa sa kanya,

²⁶kaya't pinakamainam ang buong tiyagang umasa sa ating kaligtasang si Yahweh ang may dala.

²⁷At mabuti sa isang tao na siya'y matutong magtiyaga mula sa kanyang kabataan.

²⁸Kung siya'y palasapin ng kahirapan, matahimik siyang magtiis at maghintay;

²⁹siya'y magpakumbaba sa harapan ni Yahweh, at huwag mawalan ng pag-asa.

³⁰Tanggapin ang lahat ng pananakit at paghamak na kanyang daranasin.

³¹Mahabagin si Yahweh at hindi niya tayo itatakwil habang panahon.

³²Bagaman siya'y nagpaparusa, hindi naman nawawala ang kanyang pag-ibig.

³³Hindi niya ikatutuwang tayo'y saktan o pahirapan.

³⁴Hindi nalilingid kay Yahweh kung naghihirap ang ating kalooban,

³⁵maging ang ating karapatan, kung tayo'y pagkaitan.

³⁶Kung ang katarungan ay hayagang tinutuya, siguradong si Yahweh ay hindi magpapabaya.

³⁷Walang anumang bagay na mangyayari, nang hindi sa kapahintulutan ni Yahweh.

³⁸Nasa kapangyarihan ng Kataas-taasang Diyos ang masama at mabuti.

³⁹Bakit tayo magrereklamo kapag tayo'y pinaparusahan kung dahil naman ito sa ating mga kasalanan?

⁴⁰Siyasatin nati't suriin ang ating pamumuhay, at tayo'y manumbalik kay Yahweh!

⁴¹Dumulog tayo sa Diyos at tayo'y manalangin:

⁴²“Kami'y nagkasala at naghimagsik, at hindi mo kami pinatawad.

⁴³“Sa iyong matinding galit ay hinabol mo kami at walang awang pinatay.

⁴⁴Ang galit mo'y tila makapal na ulap na hindi malampasan ng aming mga dalangin.

⁴⁵Ginawa mo kaming tambakan ng kasamaan ng sanlibutan.

⁴⁶“Kinukutya kami ng aming mga kaaway;

⁴⁷nagdaan na kami sa pagkawasak at kapahamakan, naranasan namin ang mabingit sa panganib at manginig sa takot.

⁴⁸Hindi mapigil ang pagbalong ng aking mga luha, dahil sa kapahamakang sinapit ng aking bayan.

⁴⁹“Walang tigil ang pagdaloy ng aking mga luha,

⁵⁰hanggang si Yahweh ay tumunghay mula sa langit at kami'y lingapin.

⁵¹Nagdadalamhati ako dahil sa sinapit ng mga kababaihan sa aking lunsod.

⁵²“Para akong ibong binitag ng aking mga kaaway, gayong wala silang dahilan upang kamuhian ako.

⁵³Ako'y inihulog nila nang buháy sa isang balon, at tinakpan ng bato ang bunganga nito.

⁵⁴Lumubog ako sa tubig, at nasabi ko, ‘Wala na akong pag-asang mabuhay pa.’

⁵⁵“O Yahweh, tinawag ko ang iyong pangalan nang ako'y nasa kailaliman ng balon;

⁵⁶narinig mo ang aking samo, ‘Huwag mong takpan ang iyong pandinig sa aking paghingi ng tulong!’

⁵⁷Nilapitan mo ako nang ika'y tawagan ko; sinabi mo sa akin, ‘Huwag kang matakot!’

⁵⁸“Tinulungan mo ako, Yahweh, at iniligtas mo ang aking buhay.

⁵⁹Hindi kaila sa iyo ang kasamaang ginawa nila sa akin; bigyan mo ako ng katarungan.

⁶⁰Nakita mo ang kanilang paghihiganti at masasamang balak laban sa akin.

⁶¹“Narinig mo, Yahweh, ang pangungutya nila't mga pakana laban sa akin.

⁶²Nagsasalita at nag-iisip laban sa akin ang mga kaaway ko.

⁶³Mula umaga hanggang gabi kanilang panunuya'y walang pasintabi.

⁶⁴“O Yahweh, parusahan mo sila, ayon sa kanilang ginawa.

⁶⁵Pahirapan mo sila, at iyong sumpain; habulin mo sila at iyong lipulin!”