Read Magandang Balita Biblia Mga Panaghoy 5 Bible Online

Mga Panaghoy 5 - Magandang Balita Biblia bible

Mga Panaghoy 5

¹Gunitain mo, Yahweh, ang nangyari sa amin; masdan mo ang sinapit naming kahihiyan!

²Ang aming mana ay ibinigay sa mga dayuhan, at ang aming mga tahanan nama'y ipinagkaloob sa mga taga-ibang bayan.

³Ang aming mga ama'y pinatay ng mga kaaway; kaya't aming mga ina, wala nang kaagapay.

⁴Kailangang bayaran namin ang tubig na iinumin, pati ang panggatong ay binibili na rin.

⁵Pinagtrabaho kaming parang mga hayop, hindi man lamang pinagpapahinga.

⁶Para lang magkaroon ng sapat na pagkain, nakipagkasundo kami sa Egipto at Asiria.

⁷Nagkasala nga ang aming mga ninuno, at dahil sa kanila kami ay nagdurusa.

⁸Mga alipin ang namamahala sa amin; walang makapagligtas sa amin mula sa kanilang mga kamay.

⁹Sa paghahanap ng pagkain, nanganganib ang aming buhay, sapagkat naglipana ang aming mga kaaway.

¹⁰Dahil sa matinding gutom, nag-aapoy ang aming katawan, para kaming nakalagay sa mainit na pugon.

¹¹Ang aming mga asawa ay ginahasa sa Zion, ang mga dalaga nama'y pinagsasamantalahan sa mga bayan ng Juda.

¹²Ginagapos at ibinibitin ang mga pinuno; at ang matatanda ay hindi na nirespeto.

¹³Ang mga kabataang lalaki'y pinagtatrabahong parang alipin; nakukuba sa bigat ng pasan nilang kahoy ang mga batang lalaki.

¹⁴Ayaw nang magpulong ang matatanda ng bayan, ayaw nang tumugtog ng mga kabataan.

¹⁵Naparam ang kagalakan sa aming puso; ang aming pagsasaya ay naging pagluluksa.

¹⁶Walang natira sa aming ipinagmamalaki; “tayo'y nagkasala kaya tayo'y nagdurusa!”

¹⁷Nanlupaypay kami, at nagdilim ang aming paningin,

¹⁸pagkat iniwan ng tao ang Bundok ng Zion, mga asong-gubat na lang ang naninirahan doon.

¹⁹Ngunit ikaw, O Yahweh, ang hari magpakailanman, ang iyong luklukan ay walang katapusan.

²⁰Kay tagal mo kaming pinabayaan. Kailan mo kami aalalahaning muli?

²¹Ibalik mo kami, O Yahweh, sa dati naming kaugnayan sa iyo!

²²Talaga bang itinakwil mo na kami? Sukdulan na bang talaga ang galit mo sa amin?