Read Magandang Balita Biblia Baruc 3 Bible Online

Baruc 3 - Magandang Balita Biblia bible

Baruc 3

¹“Panginoong Makapangyarihan sa Lahat, Diyos ng Israel, kami po ay tumatawag sa inyo sa gitna ng aming pagdurusa.

²Dinggin ninyo kami at kahabagan, O Panginoon, sapagkat nagkasala kami sa inyo.

³Kayo po ang naghahari magpakailanman, samantalang kami'y namamatay at tuluyan nang naglalaho.

⁴Panginoong Makapangyarihan sa lahat, Diyos ng Israel, dinggin ninyo ang aming panalangin. Kami po'y para nang mga patay. Nagkasala sa inyo ang aming mga ninuno nang sila'y hindi tumalima sa inyo, at kami ang nagdurusa dahil sa kanilang kasalanan.

⁵Huwag na po ninyong alalahanin ngayon ang kasalanan ng aming mga ninuno, kundi ang inyong pangalan at kapangyarihan.

⁶Sapagkat kayo lamang ang Panginoon naming Diyos, at kayo lamang ang lagi naming pupurihin.

⁷Ipinunla ninyo sa aming mga puso ang takot sa inyo upang kami ay tumawag sa inyong pangalan. Sa aming pagkabihag, pupurihin namin kayo, sapagkat tinalikuran na namin ang mga pagkakasalang ginawa sa inyo ng aming mga ninuno.

⁸Kami ngayon ay nasa gitna ng mga bansang pinagtapunan ninyo sa amin. Kinukutya at hinahamak nila kami. Pinaparusahan ninyo kami, Panginoon naming Diyos, dahil sa kasamaan ng aming mga ninuno na tumalikod sa inyo.”

⁹Dinggin mo, Israel, ang mga kautusang nagbibigay-buhay; makinig ka at nang ikaw ay matuto.

¹⁰Israel, bakit ka nasa lupain ng iyong mga kaaway? Bakit ka tumanda sa ibang lupain? Bakit itinakwil kang parang patay

¹¹at ibinilang na sa mga nasa Hades?

¹²Nangyari ito sapagkat itinakwil mo ang bukal ng Karunungan.

¹³Kung lumakad ka lang sa landas ng Diyos, sana'y namumuhay kang matiwasay sa habang panahon.

¹⁴Hanapin mo ang bukal ng pang-unawa, lakas at kaalaman, at malalaman mo kung nasaan ang mahabang buhay, ang liwanag na sa iyo'y papatnubay, at ang kapayapaan.

¹⁵May nakatuklas na ba kung saan nakatira ang Karunungan, o nakapasok sa kanyang taguan ng yaman?

¹⁶Nasaan ngayon ang mga tagapamahala ng mga bansa, at namamahala sa mababangis na hayop?

¹⁷Nasaan ang mga naglibang sa panghuhuli ng mga ibon? Nasaan ang mga nagtipon ng pilak at gintong pinagkatiwalaan ng tao, at kailanma'y di nasiyahan sa kanilang naimpok?

¹⁸Nasaan ang mga nagsisikap magkamal ng salapi ngunit wala namang iniwang bakas ng kanilang pinagpaguran?

¹⁹Pumanaw na silang lahat, lumipat na sila sa daigdig ng mga patay, at may pumalit na sa kanila.

²⁰May lumitaw ngang mga bagong lahi at nanirahan sa lupain. Nakita nga nila ang liwanag ng araw ngunit hindi nila nakita ang daan ng kaalaman. Hindi rin nila natuklasan ang landas ng Karunungan at hindi rin nila ito nakamtan.

²¹Naligaw ring tulad nila ang kanilang mga anak.

²²Ang Karunungan ay hindi narinig ng mga Canaanita; hindi ito nakita ng mga taga-Teman.

²³Hindi rin ito natagpuan ng mga anak ni Hagar at ng mga mangangalakal ng Meran at Teman. Pawang nabigo rin ang mga nagkukuwento ng alamat at nagsasaliksik ng karunungan.

²⁴O Israel, anong laki ng sanlibutang pinaninirahan ng Diyos, at anong lawak ng kanyang nasasakupan.

²⁵Ito'y walang hangganan at di masusukat ang lapad at taas.

²⁶Noong unang panahon, isinilang ang mga higante, malalaki't malalakas at batikang mandirigma.

²⁷Ngunit hindi sila pinili ng Diyos, hindi itinuro sa kanila ang landas ng kaalaman.

²⁸Pumanaw sila dahil sa kawalan ng karunungan, nalipol sila dahil sa kanilang kamangmangan.

²⁹May nakaakyat na ba sa kalangitan at nakapagbaba ng Karunungan mula sa mga ulap?

³⁰Mayroon na bang nagtawid-dagat upang bumili ng Karunungan sa pamamagitan ng ginto?

³¹Walang nakakaalam ng daan patungo sa kanya, o nakatuklas ng paraan ng paglapit sa kanya.

³²Ang Diyos na nakakaalam ng lahat ng bagay ang tanging nakakakilala sa Karunungan. Nauunawaan din niya ito sa pamamagitan ng kanyang kaalaman. Siya ang lumikha at naglagay dito ng lahat ng uri ng mga hayop.

³³Nag-utos siya at lumitaw ang liwanag; nanginginig ito sa takot kapag siya'y tumatawag.

³⁴Tinawag din niya ang mga bituin at madali silang nagsitugon, “Narito kami.” Lumagay sila sa kani-kanilang lugar at masayang nagniningning para bigyang-lugod ang lumikha sa kanila.

³⁵Ito ang ating Diyos! Walang makakapantay sa kanya.

³⁶Alam niya ang daan ng Karunungan, at ito'y ipinagkaloob niya sa lingkod niyang si Jacob, kay Israel na kanyang minamahal.

³⁷Mula noon, nakita na sa daigdig ang Karunungan, at nanatili sa sangkatauhan.