Read Magandang Balita Biblia Awit ng Tatlong Kabataan 1 Bible Online

Awit ng Tatlong Kabataan 1 - Magandang Balita Biblia bible

Awit ng Tatlong Kabataan 1

¹Habang lumalakad ang tatlong kabataan—sina Hananias, Misael at Azarias—sa gitna ng apoy, umaawit sila ng papuri sa Diyos at dinadakila ang Panginoon.

²Huminto si Azarias at nanalangin nang malakas doon sa loob ng nagniningas na pugon,

³“Napakadakila mo, Panginoon, Diyos ng aming mga ninuno. Purihin nawa at parangalan ang iyong pangalan magpakailanman!

⁴Makatarungan ka at tapat sa lahat ng ginagawa mo; makatuwiran ang iyong landas; walang kinikilingan ang mga hatol mo.

⁵Makatarungan ang naging parusa mo sa amin at sa Jerusalem, ang banal na lunsod ng aming mga ninuno. Oo, makatarungan lamang ang hatol mo sa mga kasalanan namin.

⁶Talagang kami'y nagkasala, lumabag sa kautusan, at naghimagsik laban sa iyo.

⁷Hindi namin ginampanan ang iyong mga utos na para sa kapakanan din naming lahat.

⁸Kaya nga, makatarungan lamang ang mga parusang inilapat mo sa amin.

⁹Ipinabihag mo kami sa pinakamahigpit naming mga kaaway, lahing malulupit at kasuklam-suklam. Inalipin kami ng isang napakasamang hari, pinakamasama sa buong sanlibutan.

¹⁰At ngayon, nauutal ang aming dila sa laki ng kahihiyan. Kaming iyong mga alipin at tagasunod ay naging kasuklam-suklam.

¹¹Alang-alang sa iyong karangalan, huwag mo kaming itakwil habang panahon; huwag mong putulin ang iyong tipan sa amin.

¹²Muli mo kaming kahabagan, alang-alang kay Abraham na iyong minamahal, kay Isaac na iyong lingkod, at kay Israel na iyong ginawang banal.

¹³Ipinangako mong pararamihin ang kanilang lahi gaya ng mga bituin sa langit at ng buhanginan sa tabing-dagat.

¹⁴Subalit ngayon, Panginoon, kami ay naging pinakamaliit na bansa. Dahil sa aming mga kasalanan, kami ang pinakaaba ngayon sa sanlibutan.

¹⁵Wala kaming hari, mga propeta, o mga pinuno ngayon. Walang templong mapagdalhan sa mga handog na susunugin, mga hain at insenso; wala man lamang dakong mapaghandugan upang kami ay humingi ng awa mo.

¹⁶Ngunit lumalapit kami sa iyo ngayon na nagsisisi at nagpapakumbaba. Tanggapin mo na kami na parang nag-aalay ng mga barakong tupa at toro, at libu-libong matatabang tupa na susunugin bilang handog sa iyong harapan.

¹⁷Tanggapin mo ang aming pagsisisi bilang handog upang kami'y matutong sumunod sa iyo nang buong puso. Walang nagtiwala sa iyo na nabigo.

¹⁸Simula ngayon, buong puso kaming susunod sa iyo, sasamba at magpupuri sa iyo.

¹⁹Huwag mo kaming biguin. Sapagkat ikaw ay maamo at mapagkalinga, kahabagan mo kami at saklolohan.

²⁰Muli mong iparanas sa amin ang iyong kahanga-hangang pagliligtas upang muling dakilain ang iyong pangalan, Panginoon.

²¹“Mapahiya nawa ang lahat ng nananakit sa amin na iyong mga alipin; alisin mo ang kanilang kapangyarihan, at durugin ang kanilang lakas.

²²Ipakita mong ikaw lamang ang Panginoong Diyos na makapangyarihan at dakila sa buong sanlibutan.”

²³Ang mga alipin ng hari na naghagis sa tatlong kabataang lalaki sa pugon ay patuloy na naghahagis doon ng mga pampaningas: langis, alkitran, dayami at mga sanga ng kahoy,

²⁴anupa't tumaas nang mahigit dalawampu't dalawang metro ang apoy.

²⁵Lumabas ang ningas at nasunog ang mga taga-Babilonia na nakatayo malapit sa pugon.

²⁶Ngunit bumabâ ang isang anghel ng Panginoon at sinamahan ang tatlong kabataan. Itinulak ng anghel ang apoy papalayo sa tatlo

²⁷at ginawang sa paligid nila'y tila may umiihip na napakalamig na hanging parang hamog. Kaya't hindi sila nalapatan ng apoy o nasaktan dahil dito.

²⁸Habang naroon sa loob ng pugon, ang tatlong kabataan ay sama-samang nagpuri at nagparangal sa Diyos,

²⁹“Pinupuri ka namin, Panginoon; Diyos ng aming mga ninuno; karapat-dapat po kayong parangalan at dakilain magpakailanman!

³⁰Purihin po ang iyong marangal at banal na pangalan. Nararapat kang purihin at parangalan magpakailanman.

³¹Purihin ka sa iyong banal at marangal na tahanan; lubhang karapat-dapat kang awitan at dakilain magpakailanman.

³²Purihin ka mula sa iyong luklukan sa ibabaw ng mga kerubin, nakikita po ninyo ang kalaliman, ang daigdig ng mga patay. Karapat-dapat kang purihin at dakilain magpakailanman.

³³Purihin ka, na nakaupo sa maningning mong trono, karapat-dapat kang awitan at dakilain magpakailanman.

³⁴Purihin ka sa buong sangkalangitan; karapat-dapat kang awitan at dakilain magpakailanman.

³⁵“Purihin ninyo ang Panginoon, kayong lahat na mga nilikha; awitan siya ng papuri at dakilain magpakailanman.

³⁶Purihin ninyo ang Panginoon, kayong lahat, mga kalangitan; awitan siya ng papuri at dakilain magpakailanman.

³⁷Purihin ninyo ang Panginoon, kayong lahat na mga anghel ng Panginoon; awitan siya ng papuri at dakilain magpakailanman.

³⁸Purihin ninyo ang Panginoon, kayong lahat ng mga tubig sa ibabaw ng langit; awitan siya ng papuri at dakilain magpakailanman.

³⁹Purihin ninyo ang Panginoon, kayong lahat na bumubuo ng kanyang hukbo; awitan siya ng papuri at dakilain magpakailanman.

⁴⁰Purihin ninyo ang Panginoon, araw at buwan; awitan siya ng papuri at dakilain magpakailanman.

⁴¹Purihin ninyo ang Panginoon, mga bituin sa langit; awitan siya ng papuri at dakilain magpakailanman.

⁴²“Purihin ninyo ang Panginoon, mga ulan at hamog; awitan siya ng papuri at dakilain magpakailanman.

⁴³Purihin ninyo ang Panginoon, lahat ng hanging umiihip sa buong daigdig; awitan siya ng papuri at dakilain magpakailanman.

⁴⁴Purihin ninyo ang Panginoon, apoy at init; awitan siya ng papuri at dakilain magpakailanman.

⁴⁵Purihin ninyo ang Panginoon, matinding lamig at nakakapasong init; awitan siya ng papuri at dakilain magpakailanman.

⁴⁶Purihin ninyo ang Panginoon, mga hamog at yelong nalalaglag; awitan siya ng papuri at dakilain magpakailanman.

⁴⁷Purihin ninyo ang Panginoon, mga gabi at mga araw; awitan siya ng papuri at dakilain magpakailanman.

⁴⁸Purihin ninyo ang Panginoon, liwanag at kadiliman; awitan siya ng papuri at dakilain magpakailanman.

⁴⁹Purihin ninyo ang Panginoon, yelo at ginaw; awitan siya ng papuri at dakilain magpakailanman.

⁵⁰Purihin ninyo ang Panginoon, yelo at taglamig; awitan siya ng papuri at dakilain magpakailanman.

⁵¹Purihin ninyo ang Panginoon, mga kidlat at mga ulap; awitan siya ng papuri at dakilain magpakailanman.

⁵²“O lupa, dakilain mo ang Panginoon; awitan siya ng papuri at dakilain magpakailanman.

⁵³Purihin ninyo ang Panginoon, mga bundok at mga burol; awitan siya ng papuri at dakilain magpakailanman.

⁵⁴Purihin ninyo ang Panginoon, lahat ng tumutubo sa lupa; awitan siya ng papuri at dakilain magpakailanman.

⁵⁵Purihin ninyo ang Panginoon, mga dagat at mga ilog; awitan siya ng papuri at dakilain magpakailanman.

⁵⁶Purihin ninyo ang Panginoon, mga batis at mga bukal; awitan siya ng papuri at dakilain magpakailanman.

⁵⁷Purihin ninyo ang Panginoon, mga balyena at lahat ng nilikhang nasa tubig; awitan siya ng papuri at dakilain magpakailanman.

⁵⁸Purihin ninyo ang Panginoon, lahat ng ibon sa himpapawid; awitan siya ng papuri at dakilain magpakailanman.

⁵⁹Purihin ninyo ang Panginoon, mga kawan at maiilap na hayop; awitan siya ng papuri at dakilain magpakailanman.

⁶⁰“Purihin ninyo ang Panginoon, lahat ng tao sa daigdig; awitan siya ng papuri at dakilain magpakailanman.

⁶¹Purihin ninyo ang Panginoon, bansang Israel; awitan siya ng papuri at dakilain magpakailanman.

⁶²Purihin ninyo ang Panginoon, mga paring naglilingkod sa Panginoon; awitan siya ng papuri at dakilain magpakailanman.

⁶³Purihin ninyo ang Panginoon, mga lingkod ng Panginoon; awitan siya ng papuri at dakilain magpakailanman.

⁶⁴Purihin ninyo ang Panginoon, kayong lahat na mga tapat; awitan siya ng papuri at dakilain magpakailanman.

⁶⁵Purihin ninyo ang Panginoon, kayong lahat na mga banal at mapagpakumbaba; awitan siya ng papuri at dakilain magpakailanman.

⁶⁶Purihin ninyo ang Panginoon, Hananias, Azarias, at Misael; awitan siya ng papuri at dakilain magpakailanman. Sapagkat hinango niya tayo sa daigdig ng mga patay; iniligtas niya tayo sa kapangyarihan ng kamatayan. Hinango niya tayo sa nagliliyab na pugon; iniligtas niya tayo sa apoy.

⁶⁷Pasalamatan natin ang Panginoon sapagkat napakabuti niya; nananatili magpakailanman ang kanyang habag.

⁶⁸Purihin ninyo ang Panginoon, kayong lahat na sumasamba sa kanya; awitan siya ng papuri, ang Diyos ng mga diyos. Pasalamatan natin siya dahil sa habag niyang walang hanggan.”