Read Magandang Balita Biblia Jonas 2 Bible Online

Jonas 2 - Magandang Balita Biblia bible

Jonas 2

¹Habang si Jonas ay nasa tiyan ng isda, nanalangin siya ng ganito:

²“Yahweh, nang ako'y nasa kagipitan, nanalangin ako sa inyo, at sinagot ninyo ako. Mula sa daigdig ng mga patay ako'y tumawag sa inyo, at dininig ninyo ako.

³Itinapon ninyo ako sa kalaliman; sa pusod ng karagatan. Nabalot ako ng malakas na agos ng tubig, at malalaking alon ang sa akin ay tumabon.

⁴Akala ko'y malayo na ako sa inyo, at hindi ko na kailanman makikitang muli ang banal mong Templo.

⁵Hinigop ako ng kalaliman, hanggang sa tuluyang lumubog; napuluputan ang aking ulo ng mga halamang dagat.

⁶Ako'y bumabâ sa paanan ng mga bundok, sa libingan ng mga patay. Ngunit mula roo'y buháy akong iniahon, O Yahweh.

⁷Nang maramdaman kong malalagot na ang aking hininga, naalala ko kayo, Yahweh. Ako'y nanalangin, at mula sa banal ninyong Templo, ako'y inyong narinig.

⁸Ang mga sumasamba sa mga diyus-diyosan ay hindi naging tapat sa inyo.

⁹Ngunit aawit ako ng pasasalamat at sa inyo'y maghahandog; tutuparin ko ang aking mga pangako, O Yahweh na aking Tagapagligtas!”

¹⁰Pagkatapos, inutusan ni Yahweh ang isda na iluwa si Jonas sa dalampasigan.