Read Magandang Balita Biblia Mga Bilang 21 Bible Online

Mga Bilang 21 - Magandang Balita Biblia bible

Mga Bilang 21

¹Nabalitaan ng hari ng Arad, isang haring Cananeo sa timog, na magdaraan sa Atarim ang mga Israelita. Sinalakay niya ang mga ito at nakabihag ng ilan.

²Kaya ang mga Israelita'y gumawa ng panata kay Yahweh. Sabi nila, “Tulungan ninyo kaming talunin ang mga taong ito at wawasakin namin ang kanilang mga lunsod para sa iyo.”

³Dininig naman sila ni Yahweh. Kaya, nang mabihag nila ang mga Cananeo ay winasak nga nila ang lunsod ng mga ito, at tinawag nilang Horma[6] ang lugar na iyon.

⁴Mula sa Bundok ng Hor, nagpatuloy ang mga Israelita patungong Dagat na Pula[7] upang iwasan ang Edom. Subalit nainip sila sa pasikut-sikot na paglalakbay.

⁵Nagreklamo sila sa Diyos at kay Moises, “Inilabas mo ba kami sa Egipto upang mamatay lamang sa ilang na ito? Wala kaming makain ni mainom! Suyang-suya na kami sa walang kuwentang pagkaing ito.”

⁶Dahil dito, pinadalhan sila ni Yahweh ng mga makamandag na ahas at maraming Israelita ang natuklaw ng mga ito at namatay.

⁷Kaya, lumapit sila kay Moises. Sinabi nila, “Nagkasala kami kay Yahweh at sa iyo. Ipanalangin mo kami na kanyang paalisin ang mga ahas na ito.” Nanalangin nga si Moises para sa Israel

⁸at ganito ang sagot sa kanya ni Yahweh: “Gumawa ka ng isang ahas na tanso. Ilagay mo iyon sa dulo ng isang mahabang kahoy. Sinumang natuklaw ng ahas at tumingin doon ay hindi mamamatay.”

⁹Ganoon nga ang ginawa ni Moises. Kaya lahat ng natuklaw ng ahas ay tumitingin sa ahas na tanso at hindi nga namamatay.

¹⁰Ang bayang Israel ay nagpatuloy sa paglalakbay at nagkampo sa Obot.

¹¹Mula roon, nagtuloy sila sa mga guho ng Abarim, sa ilang na nasa silangan ng Moab.

¹²Pag-alis doon, nagpatuloy sila sa Libis ng Zared.

¹³Buhat naman dito ay nagtuloy sila sa kabila ng Ilog Arnon, isang lugar na nasa pagitan ng lupain ng mga Amoreo at ng mga Moabita.

¹⁴Kaya natala sa Aklat ng mga Pakikipagdigma ni Yahweh ang ganito: “Parang ipu-ipong sinakop niya ang Waheb at ang kapatagan ng Arnon,

¹⁵at ang kataasan hanggang sa kapatagan ng Ar at sa hangganan ng Moab.”

¹⁶Mula sa Arnon, nagpatuloy sila hanggang sa lugar na tinatawag na Balon. Ang lugar na ito'y tinawag na Balon sapagkat dito sila pinahukay ni Yahweh ng balon para makunan ng tubig.

¹⁷Umawit sila roon ng ganito: “Bumukal ka ng tubig, O balon at sa iyo'y awit ang aming tugon,

¹⁸mga pinuno ang humukay sa iyo na ang gamit ay tungkod at setro.” Mula sa ilang na iyon ay nagtuloy sila sa Matana,

¹⁹nagdaan ng Nahaliel at Bamot.

²⁰Pag-alis doo'y nagtuloy sila sa isang kapatagang sakop din ng Moab, sa tuktok ng Pisga na nakaharap sa ilang.

²¹Ang mga Israelita'y nagsugo kay Haring Sihon, isang Amoreo. Ipinasabi nila,

²²“Maaari po bang makiraan kami sa inyong lupain? Hindi po kami daraan sa alinmang bukirin o ubasan, ni iinom sa inyong balon. Sa Lansangan ng Hari po kami daraan hanggang sa makalampas kami sa inyong nasasakupan.”

²³Subalit hindi sila pinahintulutan ni Haring Sihon; sa halip, tinipon niya ang kanyang hukbo at sinalakay ang mga Israelita sa Jahaz.

²⁴Ngunit nagwagi ang mga Israelita at nasakop ang kanyang lupain, mula sa Ilog Arnon hanggang Jabok, sa may hangganan ng Ammon. Matitibay ang mga kuta ng Ammon.

²⁵Sinakop ng mga Israelita ang mga lunsod ng mga Amoreo, pati ang Lunsod ng Hesbon at ang mga bayang sakop nito. Pagkatapos, sila na ang nanirahan sa mga lunsod na ito ng mga Amoreo.

²⁶Ang Hesbon ang siyang punong-lunsod ni Haring Sihon na lumupig sa hari ng Moab at sumakop sa lupain nito hanggang Ilog Arnon.

²⁷Kaya ang sabi ng mga mang-aawit, “Halikayo sa Hesbon at muling itayo ang lunsod ni Sihon.

²⁸Mula sa Hesbon na lunsod ni Sihon, lumabas na parang apoy ang kanyang hukbo. Tinupok nito ang lunsod ng Ar sa Moab, at nilamon ang kaburulan[8] ng Arnon.

²⁹Kawawa ka, Moab, sapagkat ito na ang iyong wakas! Kawawa ka, bayan ng diyos na si Cemos! Ang mga anak mong lalaki ay hinayaan niyang maging pugante. Ang mga anak mong babae ay nabihag ni Sihon na hari ng mga Amoreo.

³⁰Napuksa pati ang mga sanggol mula sa Hesbon hanggang sa Dibon, mula sa Nasim hanggang sa Nofa na malapit sa Medeba.”

³¹Nanirahan nga ang mga Israelita sa lupaing nakuha nila sa mga Amoreo.

³²Pagkatapos, si Moises ay nagsugo ng mga espiya sa Jazer, at nasakop din nila ito pati ang mga karatig-bayan nito. Pinalayas din nila ang mga Amoreo roon.

³³Hinarap naman nila ang Bashan, ngunit nilabanan sila ni Haring Og sa Edrei.

³⁴Sinabi ni Yahweh kay Moises, “Huwag kang matakot sapagkat ipapalupig ko siya sa iyo. Magagawa mo sa kanya ang ginawa mo kay Haring Sihon ng Hesbon.”

³⁵Napatay nga nila si Og, ang mga anak nito at ang lahat ng kababayan nito, wala silang itinirang buháy. Sinakop nila ang lupaing iyon.