Read Magandang Balita Biblia Josue 15 Bible Online

Josue 15 - Magandang Balita Biblia bible

Josue 15

¹Ang lupaing napapunta sa lipi ni Juda ay mula sa dulo ng Edom at hanggang sa ilang ng Zin sa kaduluhan sa gawing timog. Ito ang pinaghati-hatian ng mga angkang bumubuo ng lipi.

²Nagmula ang hangganan ng lupaing ito sa timog ng Dagat na Patay,

³nagtuloy sa Landas ng Acrabim, at lumampas patungo sa ilang ng Zin. Buhat doo'y umahon sa Kades-barnea, nagdaan ng Hezron, nagtuloy sa Adar at lumikong patungo sa Carca.

⁴Matapos tahakin ang Asmona, tinunton ang batis ng Egipto at nagtapos sa Dagat Mediteraneo. Ito ang hangganan ng Juda sa timog.

⁵Sa gawing silangan ang hangganan ng lupaing ito'y ang Dagat na Patay hanggang sa bunganga ng Jordan. Dito naman nagsimula ang hangganang hilaga.

⁶Umahon ito sa balikat ng Beth-hogla, dumaan sa hilaga ng Beth-araba at nagtuloy sa Bato ni Bohan, na anak ni Ruben.

⁷Buhat sa Libis ng Kaguluhan, umahon sa Debir at nagtuloy sa hilaga. Lumiko ito patungong Gilgal na nasa tapat ng Pag-ahon sa Adumim sa timog ng libis, tumawid ng batis ng En-shemes at nagtuloy sa Batis ng En-rogel.

⁸Buhat dito'y paahong tinahak ang Libis ng Ben Hinom na nasa timog ng burol ng mga Jebuseo (na tinatawag ding Jerusalem). Umahon uli patungo sa taluktok ng bundok na nasa tapat ng kanluran ng Libis ng Ben Hinom at sa dulong hilaga ng Libis ng Refaim.

⁹Buhat sa taluktok ng bundok ay lumikong patungo sa Batis ng Neftoa, at lumabas sa mga lunsod sa Bundok ng Efron, at bumaling na papuntang Baala (na tinatawag ding Lunsod ng Jearim).

¹⁰Umikot sa kanluran ng Baala patungo sa Bundok ng Seir, nagdaan sa libis na hilaga ng Bundok Jearim (na tinatawag ding Kesalon), lumusong na patungong Beth-semes, at nagtuloy sa Timna.

¹¹Buhat naman dito, umahon sa libis ng Bundok sa hilaga ng Ekron at bumaling na papuntang Sicron. Tinahak ang Bundok ng Baala, lumabas sa Jabneel, at nagtapos sa Dagat Mediteraneo na siyang naging

¹²hangganan sa kanluran. Ito ang mga hangganan ng lupaing napapunta sa lipi ni Juda na pinaghati-hatian ng mga angkang bumubuo ng lipi.

¹³Gaya ng sinabi ni Yahweh kay Josue, isang bahagi ng lupaing kaparte ng lipi ni Juda ay ibinigay kay Caleb na anak ni Jefune. Ibinigay sa kanya ang Hebron, ang lunsod na dating sakop ni Arba na ama ni Anac.

¹⁴Pinalayas ni Caleb sa lupaing iyon ang tatlong anak na lalaki ni Anac: sina Sesai, Ahiman at Talmai.

¹⁵Pagkatapos, nilusob niya ang Debir, na noong una'y tinatawag na Lunsod ng Sefer.

¹⁶At sinabi ni Caleb, “Ipakakasal ko ang anak kong si Acsa sa sinumang sumalakay at sumakop sa Lunsod ng Sefer.”

¹⁷Si Otniel na anak ni Kenaz na kapatid ni Caleb ang nakagawa niyon, kaya't si Acsa'y ipinakasal ni Caleb kay Otniel.

¹⁸Nang makasal na ang dalawa, sinabi ni Otniel sa asawa na humingi ng isang bukirin kay Caleb na kanyang ama. Pumunta nga si Acsa kay Caleb, at pagkababa sa asnong sinasakyan, tinanong siya ni Caleb, “Anong kailangan mo?”

¹⁹Sumagot si Acsa, “Bigyan mo po ako ng makukunan ng tubig, sapagkat lupang tigang ang ibinigay mo sa akin.” Kaya't ibinigay sa kanya ni Caleb ang mga bukal sa gawing itaas at sa gawing ibaba.

²⁰Ito ang mga lupaing napapunta sa lipi ni Juda, at pinaghati-hatian ng mga angkang bumubuo ng lipi.

²¹Ang mga lunsod na nasa kadulu-duluhang timog, sa may hangganan ng Edom ay ang Cabzeel, Eder at Jagur;

²²Cina, Dimona at Adada;

²³Kades, Hazor at Itnan;

²⁴Zif, Telem at Bealot;

²⁵Hazor-hadata, Kiryot-hesron (na tinatawag ding Hazor);

²⁶Amam, Shema at Molada;

²⁷Hazar-gada, Hesmon at Beth-pelet;

²⁸Hazar-shual, Beer-seba at Bizotia;

²⁹Baala, Iyim at Ezem;

³⁰Eltolad, Cesil at Horma;

³¹Ziklag, Madmana at Sansana;

³²Lebaot, Silhim, Ayin at Rimon; dalawampu't siyam na lunsod, kasama ang mga nayon sa palibot.

³³Ang mga lunsod sa kapatagan ay ang sumusunod: Estaol, Zora at Asena;

³⁴Zanoa, En-ganim, Tapua at Enam;

³⁵Jarmut, Adullam, Soco at Azeka;

³⁶Saaraim, Aditaim, Gedera at Gederotaim. Lahat-lahat ay labing-apat na lunsod pati ang mga nayong nasa paligid.

³⁷Kasama rin ang mga sumusunod: Zenan, Hadasa at Migdal-gad;

³⁸Dilan, Mizpa at Jokteel;

³⁹Laquis, Bozcat at Eglon;

⁴⁰Cabon, Lamam at Kitlis;

⁴¹Gederot, Beth-dagon, Naama at Makeda; labing-anim na lunsod, kasama ang mga nayong nasa paligid.

⁴²Kabilang din ang Libna, Eter at Asan;

⁴³Jefte, Asena at Nezib;

⁴⁴Keila, Aczib at Maresa—siyam na lunsod at ang mga nayon sa palibot.

⁴⁵Gayon din ang lunsod ng Ekron at ang mga bayan at nayon sa paligid;

⁴⁶ang lahat ng mga lunsod sa malapit sa Asdod buhat sa Ekron hanggang sa Dagat Mediteraneo.

⁴⁷Kasama rin ang mga lunsod ng Asdod at Gaza, at ang mga bayan at nayong sakop nila, hanggang sa batis ng Egipto at baybayin ng Dagat Mediteraneo.

⁴⁸Sa kaburulan naman ay ang mga lunsod ng Samir, Jatir, Soco;

⁴⁹Dana, Kiryat Sanna (na tinatawag ding Debir),

⁵⁰Anab, Estemoa at Anim;

⁵¹Goshen, Holon at Gilo—labing-isang lunsod, kasama pati ang kanilang mga nayon.

⁵²Gayon din ang Arab, Duma at Eshan,

⁵³Janim, Beth-tapua at Afeca;

⁵⁴Humta, Lunsod ng Arba o Hebron at Sior—siyam na lunsod kasama ang mga nayon sa paligid.

⁵⁵Kabilang pa rin ang Maon, Carmelo, Zif at Juta;

⁵⁶Jezreel, Jocdeam at Zanoa,

⁵⁷Cain, Gabaa at Timna—sampung lunsod at ang mga nayon sa paligid.

⁵⁸Halhul, Beth-sur at Gedor,

⁵⁹Meara, Beth-anot at Eltecon—anim na lunsod, kasama ang kanilang mga nayon.

⁶⁰Kasama rin ang lunsod ng Baal (o Lunsod ng Jearim), at ang Rabba—dalawang lunsod kasama ang kanilang mga nayon.

⁶¹Sa ilang naman, ang Beth-araba, Midin at Secaca;

⁶²Nibsan, ang Lunsod ng Asin at En-gedi—anim na lunsod, kasama pati ang mga nayon sa paligid nila.

⁶³Ngunit hindi napaalis ng lipi ni Juda ang mga Jebuseo na naninirahan sa Jerusalem, kaya hanggang ngayo'y kasama nilang naninirahan doon ang mga ito.