Read Magandang Balita Biblia, 2005 Genesis 25 Bible Online

Genesis 25 - Magandang Balita Biblia, 2005 bible

Genesis 25

¹Muling nag-asawa si Abraham at ang pangalan ng babae ay Ketura.

²Ang mga anak niya rito ay sina Zimran, Jocsan, Medan, Midian, Isbak at Suah.

³Si Jocsan ang ama nina Seba at Dedan. Kay Dedan nagmula ang mga Asurim, Letusim at Leumim.

⁴Ang mga anak naman ni Midian ay sina Efa, Efer, Enoc, Abida at Eldaa. Lahat sila'y buhat kay Ketura.

⁵Kay Isaac ipinamana ni Abraham ang lahat niyang ari-arian.

⁶Ngunit bago siya namatay, pinagbibigyan na niya ng regalo ang mga anak niya sa ibang asawa, at pinapunta sa lupain sa dakong silangan para mapalayo kay Isaac.

⁷Si Abraham ay nabuhay nang 175 taon.

⁸Matandang-matanda na siya nang mamatay.

⁹At inilibing siya nina Isaac at Ismael sa yungib ng Macpela sa silangan ng Mamre, sa parang na dating kay Efron, anak ni Zohar na Heteo.

¹⁰Ang lugar na iyon ang binili ni Abraham sa mga Heteo at doon sila nalibing ni Sara.

¹¹Pagkamatay ni Abraham, pinagpala ng Diyos si Isaac. Doon siya tumira sa Beer-lahai-roi.

¹²Ito naman ang lahi ni Ismael na anak ni Abraham kay Hagar, ang taga-Egiptong alipin ni Sara.

¹³Si Nebayot ang panganay, sumunod sina Kedar, Abdeel at Mibsam.

¹⁴Sumunod sina Misma, Duma at Massa;

¹⁵pagkatapos ay sina Hadad, Tema, Jetur, Nafis at Kedema.

¹⁶Sila ang labindalawang anak ni Ismael na naging pinuno ng kani-kanilang lipi. Isinunod sa kanilang mga pangalan ang mga bayan at pinagkampuhan ng kani-kanilang mga lipi.

¹⁷Namatay si Ismael sa gulang na 137 taon, at siya'y inilibing.

¹⁸Ang lahi ni Ismael ay tumira sa lupain sa pagitan ng Havila at Shur, sa daang patungo sa Asiria sa silangan ng Egipto. Nakabukod sila sa ibang mga lipi ni Abraham.

¹⁹Ito naman ang kasaysayan ni Isaac na anak ni Abraham.

²⁰Apatnapung taon na si Isaac nang mapangasawa niya si Rebeca, anak na dalaga ni Bethuel, isang Arameong taga-Mesopotamia. Si Rebeca'y kapatid ni Laban, isa ring Arameo.

²¹Hindi magkaanak si Rebeca, kaya't nanalangin kay Yahweh si Isaac. Dininig naman siya at si Rebeca'y naglihi.

²²Kambal ang kanyang dinadala at nasa tiyan pa'y nagtutulakan na ang dalawa. Kaya't nasabi ng ina, “Kung ngayon pa'y ganito na ang nangyayari sa akin, bakit pa ako mabubuhay?” Kaya't siya'y nagtanong kay Yahweh.

²³Ganito naman ang sagot ni Yahweh: “Dalawang sanggol ang dala mo sa loob ng iyong tiyan, larawan ng dalawang bansa na magiging magkalaban; magiging higit na malakas ang mas bata kaysa sa nauna, kaya maglilingkod ang mas matanda sa bata niyang kapatid.”

²⁴Dumating ang panahon at nanganak nga siya ng kambal.

²⁵Mamula-mula ang kutis at mabalahibo ang katawan ng panganay, kaya't Esau [32] ang ipinangalan dito.

²⁶Nang lumabas ang pangalawa, nakahawak ito sa sakong ng kanyang kakambal, kaya Jacob [33] naman ang itinawag sa kanya. Animnapung taon si Isaac noon.

²⁷Lumaki ang mga bata. Naging mahusay na mangangaso si Esau at sa kaparangan na halos tumitira. Si Jacob naman ay tahimik at lagi sa bahay.

²⁸Higit ang pagtingin ni Isaac kay Esau, palibhasa'y kinawiwilihan niyang kainin ang mga nahuhuli nito sa pangangaso, samantalang si Jacob naman ang mas mahal ni Rebeca.

²⁹Minsan, si Jacob ay nagluluto ng sinabawang pulang patani; siya namang pagdating ni Esau mula sa pangangaso.

³⁰Sinabi niya, “Gutom na gutom na ako, bigyan mo naman ako niyang mapulang niluluto mo.” At dahil dito'y tinawag siyang Edom. [34]

³¹Sumagot si Jacob, “Ibigay mo muna sa akin ang iyong karapatan bilang panganay.”

³²“Payag na ako,” sabi ni Esau, “aanhin ko pa ang pagiging panganay kung mamamatay naman ako sa gutom?”

³³“Kung gayon,” sabi ni Jacob, “sumumpa ka muna.” Sumumpa nga si Esau, at ibinigay kay Jacob ang karapatan ng pagiging panganay.

³⁴Ibinigay naman ni Jacob kay Esau ang niluto niyang gulay at binigyan pa ito ng tinapay. Matapos kumai't uminom, umalis na agad si Esau. Iyon lamang ang halaga sa kanya ng kanyang karapatan bilang panganay.