Read Magandang Balita Biblia, 2005 2 Samuel 22 Bible Online

2 Samuel 22 - Magandang Balita Biblia, 2005 bible

2 Samuel 22

¹Inawit ni David ang awit na ito para kay Yahweh nang araw na iniligtas siya ni Yahweh mula sa kamay ng kanyang mga kaaway at sa kamay ni Saul.

²“Si Yahweh ang aking tagapagligtas, matibay na muog na aking sanggalang.

³Ang Diyos ang bato na aking kanlungan, aking kalasag at tanging kaligtasan. Siya ang aking pananggalang, sa mga marahas ay siya kong tanggulan.

⁴Kay Yahweh ako'y tumatawag, sa mga kaaway ako'y kanyang inililigtas. Purihin si Yahweh!

⁵“Pinapalibutan ako ng alon ng kamatayan, tinutugis ako nitong agos ng kapahamakan.

⁶Daigdig ng mga patay, ako'y pinupuluputan, patibong ng kamatayan, ang aking dinaraanan.

⁷“Sa kagipitan ko, ako ay tumawag, ang Diyos na si Yahweh ay aking hinanap. Mula sa templo niya ay kanyang dininig, ang aking pagsamo at ang aking hibik.

⁸“Nayanig ang lupa nang siya'y magalit, at nauga pati sandigan ng langit.

⁹Nagbuga ng usok ang kanyang ilong, at mula sa bibig, lumabas ang apoy.

¹⁰Hinawi ang langit, bumabâ sa lupa makapal na ulap ang tuntungang pababa.

¹¹Sakay ng kerubin mabilis lumipad; sa bilis ng hangin siya ay naglayag.

¹²Nagtago sa likod ng dilim, naipong tubig, ulap na maitim.

¹³At magmula roon gumuhit ang kidlat, at sa harap niya'y biglang nagliwanag.

¹⁴Nagpakulog si Yahweh mula sa langit, tinig ng Kataas-taasang Diyos ay narinig.

¹⁵Mga palaso niya'y pinakawalan, dahil sa kidlat mga kaaway niya'y nagtakbuhan.

¹⁶Sa sigaw ni Yahweh sa mga kaaway, sa apoy ng galit niyang nag-aalab, ang tubig sa dagat ay halos maparam, mga pundasyon ng mundo'y naglitawan.

¹⁷“Mula sa ilalim ng tubig sa dagat, iniahon ako't kanyang iniligtas.

¹⁸Iniligtas ako sa mga kaaway na di ko makayang mag-isang labanan.

¹⁹Sa kagipitan ko, ako'y sinalakay, subalit para sa akin si Yahweh ang lumaban.

²⁰Sapagkat sa akin siya'y nasiyahan, iniligtas niya ako sa kapahamakan.

²¹“Ginantimpalaan ako ni Yahweh pagkat ako'y nasa katuwiran, pinagpapala niya ako dahil ako'y walang kasalanan.

²²Sapagkat ang tuntunin ni Yahweh ay aking sinunod, hindi ako lumihis sa landas ng aking Diyos.

²³Aking sinunod ang buong kautusan, isa mang utos niya'y hindi ko sinuway.

²⁴Nalalaman niyang ako'y walang sala, sa gawang masama'y lumalayo tuwina.

²⁵Kaya't ginantimpalaan ako ni Yahweh pagkat ako'y nasa katuwiran; pinagpapala niya ako dahil ako'y walang kasalanan.

²⁶“Sa mga taong tapat, ikaw rin ay tapat, sa mga matuwid, matuwid kang ganap.

²⁷Sa pusong malinis, bukás ka at tapat, ngunit sa mga baluktot, hatol mo'y marahas.

²⁸Mga nagpapakumbabá'y iyong inililigtas, ngunit ang palalo'y iyong ibinabagsak.

²⁹Ikaw po, O Yahweh, ang aking tanglaw, pinawi mong lubos ang aking kadiliman.

³⁰Sa tulong mo'y nalulupig ko ang mga kaaway, sa pamamagitan mo, Diyos, anumang pader ay nahahakbang.

³¹Mga paraan ng Diyos ay walang kapintasan; pangako ni Yahweh ay sadyang maaasahan. Sa nagpapakupkop, siya ay kalasag.

³²“Maliban kay Yahweh, may Diyos pa bang iba? Iisang tanggulan, hindi ba't siya na?

³³Ang Diyos ang aking muog na kanlungan, ang nag-iingat sa aking daraanan.

³⁴Tulad ng sa usa, paa ko'y pinatatag, sa mga bundok iniingatan akong ligtas.

³⁵Sinanay niya ako sa pakikipagdigma, matigas na pana kaya kong mahila.

³⁶“Ako'y iniligtas mo, Yahweh, ng iyong kalinga, at sa tulong mo ako'y naging dakila.

³⁷Binigyan mo ako ng pagtataguan, kaya di mahuli ng mga kalaban.

³⁸Mga kaaway ko ay aking tinugis, hanggang sa malipol, di ako nagbalik.

³⁹Nilipol ko sila at saka sinaksak, at sa paanan ko sila ay bumagsak!

⁴⁰Pinalakas mo ako para sa labanan, kaya't nagsisuko ang aking kalaban.

⁴¹Mga kaaway ko'y iyong itinaboy, mga namumuhi sa aki'y pawang nalipol.

⁴²Humanap sila ng saklolo, ngunit walang matagpuan. Hindi sila pinansin ni Yahweh nang sila'y nanawagan.

⁴³Tinapakan ko sila hanggang sa madurog, pinulbos ko silang parang alikabok; sa mga lansangan, putik ang inabot.

⁴⁴“Sa mga naghimagsik, ako'y iyong iniligtas, pamamahala sa mga bansa sa aki'y iniatas; at marami pang ibang sumuko't nabihag.

⁴⁵Ang mga dayuhan sa aki'y yumuyukod, kapag narinig ang tinig ko, sila'y sumusunod.

⁴⁶Sa laki ng takot ay naglalabasan sa kanilang kutang pinagtataguan.

⁴⁷“Mabuhay si Yahweh! Purihin ang aking batong tanggulan. Dakilain ang aking Diyos! Ang bato ng aking kaligtasan.

⁴⁸Nilulupig niya ang aking kalaban at pinapasuko sa aking paanan.

⁴⁹Iniligtas ako sa aking kaaway, ako'y inilayo sa sumasalakay; sa taong marahas, ipinagsanggalang.

⁵⁰“Sa lahat ng bansa ika'y aking pupurihin, ang karangalan mo'y aking aawitin, ang iyong pangalan, aking sasambahin.

⁵¹Pinagkaloobang magtagumpay lagi, ang abang lingkod mong piniling hari; di mo kailanman pababayaan ang iyong pinili, na si Haring David at ang kanyang mga susunod na lahi.”