Read Magandang Balita Biblia, 2005 Exodo 25 Bible Online

Exodo 25 - Magandang Balita Biblia, 2005 bible

Exodo 25

¹Sinabi ni Yahweh kay Moises,

²“Sabihin mo sa mga Israelita na maghandog sila ng kaloob sa akin at tanggapin mo ang mga buong pusong inihandog nila.

³Ito ang kanilang ihahandog: ginto, pilak, tanso;

⁴lanang kulay asul, kulay ube at kulay pula; mga pinong telang lino at hinabing balahibo ng kambing;

⁵balat ng lalaking tupa na kinulayan ng pula, mainam na balat, at kahoy na akasya;

⁶langis para sa ilawan at pabangong panghalo para sa langis na pampahid at para sa insenso.

⁷Maghahandog din sila ng mga alahas na kornalina at mga mamahaling alahas na pampalamuti sa efod at sa pektoral ng pinakapunong pari.

⁸Ipagpagawa mo ako ng santuwaryo na titirhan kong kasama nila.

⁹Ang santuwaryo at ang lahat ng kagamitang ilalagay roon ay gagawin mo ayon sa planong ibibigay ko sa iyo.

¹⁰“Gumawa kayo ng isang kaban na yari sa akasya: 1.1 metro ang haba, 0.7 metro ang luwang, at 0.7 metro ang taas.

¹¹Balutin ninyo ito ng lantay na ginto sa loob at labas, ang mga labi naman ay lagyan ninyo ng muldurang ginto.

¹²Gagawa rin kayo ng apat na argolyang ginto na ikakabit sa apat na paa ng kaban, tigalawa sa magkabila.

¹³Gumawa rin kayo ng kahoy na pampasan na yari sa akasya, babalutin din ito ng ginto

¹⁴at isuot ninyo ang mga ito sa mga argolya sa magkabilang gilid ng kaban upang maging pasanan nito.

¹⁵Huwag ninyong aalisin sa argolya ang mga pasanan.

¹⁶Ang dalawang tapyas na bato ng kasunduang ibibigay ko sa iyo ay ilalagay mo sa kaban.

¹⁷“Gumawa ka ng Luklukan ng Awa na yari sa purong ginto. Ang haba nito'y 1.1 metro, at 0.7 metro naman ang luwang.

¹⁸Lalagyan mo ng dalawang kerubing ginto ang dalawang dulo nito,

¹⁹tig-isa sa magkabilang dulo. Ihihinang ang mga kerubin upang ito at ang Luklukan ng Awa ay maging iisang piraso.

²⁰Gawin mong magkaharap ang dalawang kerubin na parehong nakatungo, at nakabuka ang mga pakpak na nilulukuban ang Luklukan ng Awa.

²¹Ilalagay mo ito sa ibabaw ng kaban na kinalalagyan ng dalawang tapyas na bato ng kautusang ibibigay ko sa iyo.

²²Doon tayo magtatagpo sa Luklukan ng Awa, sa pagitan ng dalawang kerubin; doon ko ibibigay sa iyo ang kautusan ko sa mga Israelita.

²³“Gagawa ka rin ng isang mesang yari sa akasya na 0.9 metro ang haba, 0.5 metro ang lapad, at 0.7 metro ang taas.

²⁴Balutan mo ito ng purong ginto at paligiran mo ng muldurang ginto.

²⁵Lagyan mo ang gilid nito ng sinepa na singlapad ng isang palad at paligiran din ng muldurang ginto.

²⁶Gumawa ka ng apat na argolyang ginto at ikabit mo sa apat na sulok, sa may tapat ng paa nito.

²⁷Ang mga argolyang pagkakabitan ng mga kahoy na pampasan ay malapit sa sinepa.

²⁸Gumawa rin kayo ng pampasan na yari sa akasya at babalutin din ito ng ginto.

²⁹Gumawa rin kayo ng mga kagamitang ginto: plato, tasa, banga at mangkok para sa mga handog na inumin.

³⁰Ang mga tinapay na handog ninyo sa akin ay ilalagay ninyo sa mesa sa harapan ko.

³¹“Gumawa kayo ng ilawang yari sa purong ginto. Ang patungan at tagdan nito'y yari sa pinitpit na purong ginto. Ang mga palamuti nitong bulaklak, ang buko at mga talulot ay parang iisang piraso.

³²Lalagyan mo ito ng anim na sanga, tatlo sa magkabila.

³³Bawat sanga'y lagyan mo ng tatlong magagandang bulaklak na parang almendra, may usbong at may talulot.

³⁴Ang tangkay naman ay lagyan mo rin ng apat na bulaklak na tulad ng nasa sanga.

³⁵Lalagyan mo ng usbong sa ilalim ng mga sanga, isa sa ilalim ng bawat dalawang sanga.

³⁶Ang mga usbong, mga sanga, at ang tagdan ng ilawan ay gagawin ninyong isang piraso na gawa sa purong ginto.

³⁷Gagawa kayo ng pitong ilaw para sa mga patungang ito. Iayos ninyo ito upang ang liwanag nito'y nasa harap ng ilawan.

³⁸Ang pang-ipit ng mitsa at ang patungan ay dalisay na ginto rin.

³⁹Sa lahat ng ito ay 35 kilong purong ginto ang gagamitin ninyo.

⁴⁰Sundin mong mabuti ang planong ipinakita ko sa iyo sa bundok.