Read Magandang Balita Biblia, 2005 Job 10 Bible Online

Job 10 - Magandang Balita Biblia, 2005 bible

Job 10

¹“Ako'y nagsasawa na sa buhay kong ito, sasabihin ko nang lahat, mapapait kong reklamo.

²Aking Diyos, huwag n'yo muna akong hatulan, sabihin ninyo sa akin ang inyong paratang.

³Tama ba namang iyong pagmalupitan, parusahan at itakwil ang likha ng iyong kamay? At ang gawain ba ng masamang tao ang iyong magugustuhan?

⁴Ang iyo bang nakikita'y tulad din ng nakikita namin?

⁵Ang iyo bang buhay ay maikling tulad ng sa amin?

⁶Kung gayo'y bakit mo ako hinahanapan ng pagkakasala at kamalian?

⁷Alam mo namang wala akong kasalanan, at walang makakapagligtas sa akin mula sa iyong mga kamay.

⁸“Ang mga kamay mo ang sa aki'y lumikha, ngayo'y kamay mo rin ang sa aki'y sumisira.

⁹Di ba't mula sa lupa ay ginawa mo ako, ngayon ba'y pupulbusin at ibabalik dito?

¹⁰Niloob mong ako'y manggaling sa aking ama, inaruga, pinalaki sa tiyan ng aking ina.

¹¹Nilagyan mo ng buto at litid ang aking katawan, saka binalutan ng balat at kalamnan.

¹²Ako'y binigyan mo ng buhay at wagas na pagmamahal, at ang pagkalinga mo ang sa aki'y bumuhay.

¹³Ngunit ngayo'y alam ko na, ang iyong balak, matagal nang panahong gusto akong ipahamak.

¹⁴Kapag ako'y nagkasala, ito'y iyong tinatandaan, upang ipagkait mo sa akin ang kapatawaran.

¹⁵Kapag ako'y nagkasala, may katapat itong parusa, kapag gumawa ako ng mabuti, wala namang gantimpala. Punung-puno ng kahihiyan, itong aking abang buhay.

¹⁶Kung ako'y magtagumpay, parang leon mong tutugisin, gumagamit ka pa ng himala upang ako'y kalabanin.

¹⁷Palagi kang may testigo laban sa akin, ang galit mo sa aki'y tumitindi bawat oras, palagi kang may naiisip na panibagong bitag.

¹⁸“Bakit mo hinayaang ako ay isilang pa? Namatay na sana ako bago pa mayroong sa aki'y nakakita.

¹⁹Bago ako isinilang ako sana'y namatay na, sa libingan sana nagtuloy mula sa tiyan ng aking ina.

²⁰Maikli na ang aking buhay kaya't ako'y tigilan mo na upang sa aking natitirang araw makadama ng kaunting ginhawa.

²¹Ako'y malapit nang pumanaw, at hindi na magbabalik; ang pupuntahan ko'y madilim at mapanglaw na daigdig.

²²Isang lupain ng anino at kaguluhan, na ang pinakailaw ay ang kadiliman.”