Read Magandang Balita Biblia, 2005 Job 17 Bible Online

Job 17 - Magandang Balita Biblia, 2005 bible

Job 17

¹Gulung-gulo ang aking isipan, bilang na ang aking mga araw, hinihintay na ako ng libingan.

²Pinagmamasdan ko ang sa akin ay lumalait, mga salita nila'y lubhang masasakit.

³O Diyos, ako'y tapat, kaya sa aki'y magtiwala, ikaw lang ang makapagpapatunay sa aking mga salita.

⁴Isip nila'y sinarhan mo upang di makaunawa; laban sa akin, huwag nawa silang magtagumpay.

⁵Siyang dahil sa salapi ay nagtataksil sa mga kaibigan, kanyang mga anak ang siyang mawawalan.

⁶Ako ngayo'y pinag-uusapan ng buong bayan, pinupuntahan pa upang maduraan lamang.

⁷Halos ako'y mabulag dahil sa kalungkutan, kasingnipis ng anino ang buo kong katawan.

⁸Mga nagsasabing sila'y tapat sa akin ay nagulat, ang mga walang sala, sa aki'y nanunumbat. [17]

⁹Ngunit ang mga matuwid ay lalong naniniwala, at lalo pang nahikayat na sila nga ang tama.

¹⁰Subalit silang lahat, humarap man sa akin, wala akong maituturo na may talinong angkin.

¹¹“Tapos na ang mga araw ko, bigo ang aking mga plano, ang aking pag-asa'y tuluyan nang naglaho.

¹²Sabi nila, ang gabi ay araw na rin, malapit na raw ang liwanag, ngunit alam kong ako'y nasa dilim pa rin.

¹³Ang tanging pag-asa ko'y ang daigdig ng mga patay, at sa kadiliman doon ako mahihimlay.

¹⁴Ang hukay ay tatawagin kong ama, at ang mga uod ay ituturing kong mga kapatid at ina.

¹⁵Nasaan nga ang aking pag-asa, sino ang dito ay makakakita?

¹⁶Madadala ko ba ito sa daigdig ng mga patay, sasama ba ito sa alabok na hantungan?”