Read Magandang Balita Biblia, 2005 Job 21 Bible Online

Job 21 - Magandang Balita Biblia, 2005 bible

Job 21

¹Ang sagot ni Job,

²“Pakinggan ninyong mabuti itong aking sasabihin; ituturing ko nang ito'y pag-aliw sa akin.

³Ako muna'y inyong pagsalitain, at pagkatapos nito, saka na ninyo laitin.

⁴“Di laban sa tao itong aking hinanakit, may sapat akong dahilan, kung bakit hindi makatiis.

⁵Tingnan ninyo ang hitsura ko, hindi pa ba ito sapat upang tumahimik na kayo at walang salitang mabigkas?

⁶Tuwing iisipin ko itong sinapit ko, ako'y nanginginig at nanlulumo.

⁷Bakit kaya ang masama'y hinahayaan pang mabuhay, tumatanda pa at nagtatagumpay?

⁸Mayroon silang mga anak at mga apo, naabutan pa nila ang paglaki ng mga ito.

⁹Hindi pinipinsala ang kanilang mga tahanan; parusa ng Diyos ay di nila nararanasan.

¹⁰Ang pagdami ng kanilang mga hayop ay mabilis, ang inahin nilang baka'y nasa ayos kung magbuntis.

¹¹Ang kanilang mga anak ay naghahabulan, parang tupang naglalaro at mayroon pang sayawan.

¹²Umaawit sa saliw ng tamburin at lira, umiindak, nagsasayaw sa tunog ng mga plauta.

¹³Ang buong buhay nila'y puspos ng kasaganaan; at mapayapa ang kanilang pagharap sa kamatayan.

¹⁴“Sinasabi nila sa Diyos, ‘Huwag mo kaming pakialaman. Ayaw naming alamin ang iyong kalooban!

¹⁵Sino ba ang Makapangyarihang Diyos upang sambahin namin? At ano bang mapapala kung sa kanya'y mananalangin?’

¹⁶Ang akala nila, sa sariling lakas galing ang tagumpay, ngunit di ako sang-ayon sa kanilang palagay.

¹⁷“Ilawan ba ng masama'y pinatay nang minsan? Sila ba ay dumanas ng matinding kahirapan, at ang parusa ng Diyos, sa kanila ba'y ipinataw?

¹⁸Itinulad ba sa dayaming nililipad nitong hangin o ipang walang laman, tinatangay sa papawirin?

¹⁹“Sinasabi ninyong ang anak ay pinaparusahan dahil sa sala ng kanyang magulang. Parusahan sana ng Diyos ang mismong may kasalanan!

²⁰Sa gayo'y mararanasan nila ang kahirapang sasapitin; sa parusa ng Makapangyarihang Diyos, sila ang pagdanasin.

²¹Kapag ang isang tao'y binawian ng buhay, ano pang pakialam niya sa pamilyang naiwan?

²²Sinong makakapagturo ng dapat gawin ng Diyos, na siyang humahatol sa buong sansinukob?

²³“May taong namamatay sa gitna ng kasaganaan, panatag ang katayuan, maginhawa ang kabuhayan.

²⁴Katawan niya ay malusog, at malalakas ang tuhod.

²⁵Mayroon namang namamatay sa kahirapan, ni hindi nakalasap kahit kaunting kaligayahan.

²⁶Ngunit pareho silang sa alabok nahihimlay, at kapwa inuuod ang kanilang katawan.

²⁷“Alam ko kung ano ang binabalak ninyong gawin at ang masamang iniisip ninyo laban sa akin.

²⁸Tiyak na itatanong ninyo kung nasaan ang tahanan ng taong namuhay sa kasamaan.

²⁹“Hindi ba ninyo naitatanong sa mga manlalakbay, mga ulat nila'y hindi ba ninyo pinaniniwalaan?

³⁰Sa panahon ng kahirapan at kasawiang-palad, di ba't ang masama ay laging naliligtas?

³¹Sa kanyang kasamaa'y walang nagpapamukha, walang naniningil sa masama niyang gawa.

³²Kapag siya ay namatay at inihatid na sa hukay, maraming nagbabantay sa kanyang libingan.

³³Napakaraming sa kanya'y maghahatid sa libing, pati lupang hihigan niya, sa kanya ay malambing.

³⁴Ngunit pang-aaliw ninyo'y walang kabuluhan, pagkat lahat ng sagot ninyo'y pawang kasinungalingan!”