Read Magandang Balita Biblia, 2005 Job 23 Bible Online

Job 23 - Magandang Balita Biblia, 2005 bible

Job 23

¹Ito naman ang sagot ni Job:

²“Hanggang ngayon ay masama pa itong aking loob, bagama't ako'y nananangis, pinaparusahan pa rin ng Diyos.

³Kung alam ko lamang kung saan siya matatagpuan, pupuntahan ko siya sa kanyang kinaroroonan.

⁴Ihaharap ko sa kanya ang aking kalagayan at ilalahad kong lahat ang aking katuwiran.

⁵Gusto kong malaman ang isasagot niya sa akin; nais kong maunawaan ang kanyang sasabihin.

⁶Gagamitin kaya sa akin ang lahat niyang kapangyarihan? Hindi! Sa halip, hinaing ko'y kanyang papakinggan.

⁷Sapagkat ako'y taong matuwid na haharap sa kanya, kanyang ipahahayag na ako'y walang sala.

⁸“Sa dakong silangan, hindi ko siya natagpuan; hindi ko rin siya nakita sa gawing kanluran.

⁹Di ko rin siya nakita sa dakong hilaga, at sa bandang timog, ni bakas ay wala.

¹⁰Ngunit alam ng Diyos ang aking bawat hakbang; kapag sinubok niya, lalabas ang kadalisayan.

¹¹Pagkat landas niya'y aking nilakaran, hindi ako lumihis sa ibang daanan.

¹²Ako'y hindi lumalabag sa kanyang kautusan, at ang kanyang mga salita ay aking iniingatan.

¹³“Hindi siya nagbabago at di kayang salungatin, walang makakapigil sa nais niyang gawin.

¹⁴Isasakatuparan niya ang plano niya sa akin, ang marami niyang balak ay kanyang gagawin.

¹⁵Kaya ako'y natatakot na sa kanya'y humarap; isipin ko lamang ito, ako ay nasisindak.

¹⁶Pinanghihina ng Diyos ang aking kalooban, tinatakot ako ng Makapangyarihan.

¹⁷Sapagkat kadiliman ang nasa aking palibot, dilim nitong taglay sa mukha ko ay bumalot.