Read Magandang Balita Biblia, 2005 Job 24 Bible Online

Job 24 - Magandang Balita Biblia, 2005 bible

Job 24

¹“Bakit di nagtatakda ang Makapangyarihang Diyos ng araw ng paghuhukom, upang masaksihan ng mga matuwid ang kanyang paghatol?

²“Binabago ng mga tao ang hangganan ng mga lupa, nagnanakaw ng mga hayop na iba ang nag-alaga.

³Tinatangay nila ang asno ng mga ulila, kinakamkam sa mga biyuda ang bakang isinangla.

⁴Ang mahirap ay itinataboy sa lansangan; at dahil sa takot, naghahanap ito ng taguan.

⁵“Kaya ang dukha, tulad ay asnong mailap, hinahalughog ang gubat, mapakain lang ang anak.

⁶Gumagapas sila sa bukid na hindi kanila, natirang ubas ng mga masasama pinupulot nila.

⁷Kanilang katawan ay walang saplot; sa lamig ng gabi, wala man lamang kumot.

⁸Nauulanan sila doon sa kabundukan; mga pagitan ng bato ang kanilang silungan.

⁹“Inaalipin ng masasama ang mga ulila; mga anak ng may utang, kanilang kinukuha.

¹⁰Hubad na pinaglalakad ang mga mahirap, labis ang gutom habang sila'y pinapagapas.

¹¹Sila ang nagkakatas ng ubas at olibo, ngunit di man lamang makatikim ng alak at langis nito.

¹²Mga naghihingalo at mga sugatan, sa loob ng lunsod ay nagdadaingan, ngunit di pa rin pansin ng Diyos ang kanilang panawagan.

¹³“May mga taong nagtatakwil sa liwanag; di nila ito maunawaan, patnubay nito'y ayaw sundan.

¹⁴Bumabangon ang mamamatay-tao sa madaling araw, at ang kawawang dukha'y kanyang pinapaslang. Pagsapit naman ng gabi, siya ay nagnanakaw.

¹⁵Ang nakikiapid ay naghihintay na dumilim, nagtatakip ng mukha upang walang makapansin.

¹⁶Kung gabi naman sumasalakay ang mga magnanakaw; ayaw nila sa liwanag kaya't nagtatago pagsikat ng araw.

¹⁷Liwanag ng araw ay kanilang kinatatakutan, ngunit di sila nasisindak sa matinding kadiliman.”

¹⁸Sinabi ni Zofar, “Ang masamang tao'y tinatangay ng baha, sinumpa ng Diyos ang kanilang lupa; sa ubasan nila'y ni walang mangahas magsaka.

¹⁹Kung paanong ang yelo ay natutunaw sa tag-init, gayundin ang masama, naglalaho sa daigdig.

²⁰Kahit ang kanyang ina sa kanya'y nakakalimot; parang punong nabuwal, inuuod at nabubulok.

²¹Pagkat inapi niya ang babaing di nagkaanak, at ang mga biyuda ay kanyang hinamak.

²²Winawasak ng Diyos ang buhay ng malalakas; kapag siya ay kumilos, ang masama'y nagwawakas.

²³Hayaan man ng Diyos na mabuhay ito nang tiwasay, sa bawat sandali, siya'y nagbabantay.

²⁴Umunlad man ang masama, ngunit panandalian lamang, natutuyo ring tulad ng damo at halaman, parang bungkos ng inani na binunot sa taniman.

²⁵Kasinungalingan ba ang sinasabi ko? Sinong makapagpapatunay na ito'y di totoo?”