Read Magandang Balita Biblia, 2005 Job 3 Bible Online

Job 3 - Magandang Balita Biblia, 2005 bible

Job 3

¹Pagkaraan ng matagal na pananahimik, nagsalita si Job at isinumpa ang araw nang siya'y isilang.

²Ito ang kanyang sinabi:

³“Hindi na sana ako ipinanganak pa at hindi na rin sana ako ipinaglihi.

⁴Nabalot na sana ng dilim at huwag mo na sanang maalala pa ang araw na iyon, O Diyos. Huwag mo na sanang pasikatan pa ito ng liwanag.

⁵Nanatili na lamang sana ito sa takip ng kadiliman, at nabalot ng ulap, upang huwag nang sikatan ng araw.

⁶Nalagas sana ito sa tangkay ng panahon, at hindi na napabilang sa aklat ng kasaysayan.

⁷Ang gabing iyon sana'y malumbay; wala na sanang sigaw ng kagalakan,

⁸at sumpain ng mga salamangkerong nagpapaamo ng dambuhalang Leviatan. [15]

⁹Huwag na sanang sumikat ang bituin sa umaga, at huwag na sanang sundan ng umaga ang gabi.

¹⁰Sumpain ang gabi ng aking pagsilang na nagdulot sa akin ng ganitong kahirapan.

¹¹“Bakit hindi pa ako namatay sa tiyan ng aking ina, o kaya'y noong ako'y isilang niya?

¹²Bakit kaya ako ay idinuyan pa, kinalong, inalagaan, at binigyan ng gatas sa dibdib niya?

¹³Kung namatay ako noon, ako sana'y tahimik na, mahimbing na natutulog at nagpapahinga.

¹⁴Katulad ng mga hari at pinunong yumao, na noong panahon nila'y nagtayo ng mga palasyo.

¹⁵Tahimik na sana ako tulad ng mga pinunong nakapag-imbak sa kanilang bahay ng mga ginto at pilak,

¹⁶o tulad ng mga sanggol na patay nang ipanganak at hindi na nakakita pa ng liwanag.

¹⁷Sa libinga'y hindi na makakapanggulo ang mga masasama, at doon ang mga napapagod ay makakapagpahinga.

¹⁸Doon, pati mga bihag ay wala nang ligalig, wala nang mga sigaw at utos na mabagsik.

¹⁹Ang mga abâ at mga dakila ay sama-sama roon, ang mga alipin ay malaya na sa kanilang panginoon.

²⁰“Bakit pa isinilang kung magdurusa rin lamang? At bakit pa binuhay kung daranas din lang ng kahirapan?

²¹Kamataya'y hinahanap ngunit hindi matagpuan, hinuhukay at ninanais higit pa sa kayamanan.

²²Sa kanila'y ubod-tamis nitong kamatayan.

²³Ano kaya ang dahilan at ang tao'y isinilang, kung inilihim naman ng Diyos ang kanyang patutunguhan?

²⁴Karaingan ang aking pagkain, pagtitiis ang aking inumin.

²⁵Ang kinatatakutan ko ang siyang nangyari sa akin, at ang pinakaaayawan ko ang dumating sa akin.

²⁶Hindi ako mapalagay, wala akong kapayapaan, kaguluhan sa buhay ko ay walang katapusan.”