Read Magandang Balita Biblia, 2005 Job 30 Bible Online

Job 30 - Magandang Balita Biblia, 2005 bible

Job 30

¹“Ngayon ako'y kinukutya na ng mga kabataan, na mga anak ng mga taong di ko pinayagan na sumama sa mga asong nagbantay sa aking kawan.

²Mga bisig nila ay hindi ko inasahan, walang gawaing kanilang nakayanan.

³Sa gitna ng gutom at kasalatan, kanilang kinakain mga tuyong ugat sa ilang.

⁴Nangunguha sila ng usbong ng halaman sa dawagan, at ugat ng mga tambo ang panlaman nila sa tiyan.

⁵Ang mga taong ito'y itinakwil ng lipunan, at ang turing sa kanila'y mistulang mga tulisan.

⁶Mga kuweba't mga kanal ang kanilang tinitirhan, ang iba nama'y sa lungga, at ang iba'y sa batuhan.

⁷Ungol nila'y naririnig mula roon sa dawagan, sila'y nagyayakap-yakap sa gitna ng katinikan.

⁸Sila'y parang mga yagit na walang kabuluhan pagkat mula sa lupain, sila'y ipinagtatabuyan.

⁹“Ngayo'y ako naman ang kanilang pinagtatawanan, siyang laging binibiro at pinag-uusapan.

¹⁰Kinukutya nila ako at kanilang iniiwasan, at di nag-aatubiling ako'y kanilang duraan.

¹¹Pagkat inalis ng Diyos ang lakas ko at kakayahan, kaya naman ako'y kanilang nilalapastangan.

¹²Sinalakay nila ako nang walang pakundangan, hinahabol nila ako upang tapusin nang tuluyan.

¹³Pilit akong sinusukol upang ako'y pahirapan, sa ginagawa nila'y wala man lang humadlang.

¹⁴Isang pader na may bitak ang katulad ng aking buhay, sinalakay nila ako at tinapak-tapakan.

¹⁵Ang buo kong pagkatao ay nilukuban ng takot, dangal ko'y naglaho parang bulang pumutok, at ang aking kasaganaan, parang ulap na sumabog.

¹⁶‘Halos mapatid na ang aking hininga, hindi na maibsan ang hirap kong dala.

¹⁷Sa buong magdamag, mga buto ko ay masakit, ginhawa'y di madama kahit isang saglit.

¹⁸Hinablot ng Diyos ang aking kasuotan, at ako'y kaawa-awang kanyang kinwelyuhan.

¹⁹Pagkatapos noon, ako'y kanyang inihagis lumubog sa putik, parang isang yagit.

²⁰“Di mo pinakinggan, O Diyos, ang aking pagdaing, aking panalangin, hindi mo man lang pinansin.

²¹Bakit ako'y iyong pinagmamalupitan, at pinag-uusig ng iyong buong kapangyarihan?

²²Bakit hinayaang ang buhay kong angkin, bayuhin ng bagyo at malalakas na hangin?

²³Alam kong dadalhin mo ako sa kamatayan, na huling hantungan ng bawat nilalang.

²⁴Taong bumagsak, bakit mo pa pinahihirapan, wala naman siyang magagawa kundi magmakaawa lamang?

²⁵Di ba ako ay dumamay sa mga nangangailangan, at nagmalasakit din sa mahirap ang kabuhayan?

²⁶Tuwa at liwanag ang aking inaasahan; subalit ang dumating ay hirap at kadiliman.

²⁷Kahirapan at sakit ang kayakap ko sa buhay, at siyang nakakasama sa bawat araw.

²⁸Ang landas ko ay madilim at walang kapanatagan; ako'y nagmamakaawa sa lahat kong kababayan.

²⁹Ang tinig ko'y walang sigla at namamalat, parang boses ng uwak at ng asong gubat.

³⁰Ang balat ko'y nangingitim at natutuklap, sagad hanggang buto itong aking lagnat.

³¹Ang dati kong naririnig ay masasayang tugtugan, ngayo'y tunog ng pagluluksa at pag-iiyakan.