Read Magandang Balita Biblia, 2005 Job 33 Bible Online

Job 33 - Magandang Balita Biblia, 2005 bible

Job 33

¹“At ngayon, Job, makinig ka sa aking sasabihin, at mga salita ko'y bigyan mo ng pansin.

²Sasabihin ko na ang laman ng aking isipan,

³lahat ng ilalahad ko ay pawang katapatan, lahat ng ihahayag ay pawang katotohanan.

⁴Ang Espiritu ng Diyos ang gumawa sa akin, buhay na taglay ko ay sa Makapangyarihang Diyos nanggaling.

⁵“Kung kaya mo'y sagutin mo itong aking sasabihin, ang iyong mga katuwiran ay ihanda mo na rin.

⁶Ikaw at ako'y iisa sa harap ng Diyos natin, parehong sa putik tayo nanggaling.

⁷Kaya sa aki'y wala kang dapat alalahanin, huwag mong isiping ika'y aking gagapiin.

⁸“Ito ang narinig kong sinabi mo:

⁹‘Ako'y malinis at walang nagawang kasalanan, ako'y walang sala at walang kasamaan.

¹⁰Gumagawa lamang ang Diyos ng dahilan upang ako'y parusahan, at itinuturing niya akong isang kaaway.

¹¹Mga paa ko ay kanyang iginapos, at binabantayan ang aking mga kilos.’

¹²“Ngunit ang sagot ko nama'y nagkakamali ka, Job, sapagkat sa sinumang tao ay mas dakila ang Diyos.

¹³Bakit ang Diyos ay iyong pinagbibintangan na di marunong makinig sa iyong karaingan?

¹⁴Magsalita man siya sa iba't ibang paraan, hindi pa rin natin ito lubos na mauunawaan.

¹⁵Nagsasalita siya sa panaginip at pangitain, sa kalaliman ng gabi, kapag ang tao'y nahihimbing.

¹⁶Ipinapaunawa niya ang kanyang saloobin, nagbibigay ng babala sa kanilang pangitain.

¹⁷Nagsasalita ang Diyos upang sila ay pigilan sa paggawa ng masama at sa kapalaluan.

¹⁸Hindi nais ng Diyos na sila'y mamatay kaya sila'y iniligtas niya mula sa hukay.

¹⁹Pinadadalhan niya ang tao ng iba't ibang sakit, upang sa pamamagitan ng kirot ang tao'y maituwid.

²⁰Ang taong may sakit ay walang panlasa, masarap man ang pagkain, wala pa ring gana.

²¹Nauubos ang kanyang laman, natitira'y buto't balat na lamang.

²²At parang handang handa nang pumunta sa daigdig ng mga patay.

²³“O baka siya'y tulungan ng isa sa libong mga anghel, na nagpapaalala sa tao ng kanyang mga tungkulin.

²⁴Maaaring itong anghel na puspos ng kahabagan, ay magsabi ng ganito: ‘Siya ay pawalan, hindi siya dapat humantong sa libingan, narito ang bayad para sa kanyang kalayaan.’

²⁵Siya ay gagaling, muling sisigla; tataglayin muli ang lakas noong kabataan niya.

²⁶Mananalangin siya sa Diyos at siya'y papakinggan. Ang pagsamba niya'y mapupuno ng kasiyahan, muli siyang ilalagay ng Diyos sa mabuting katayuan.

²⁷Sasabihin niya sa madla, ‘Sa Diyos ako'y nagkasala, walang matuwid na nagawa subalit pinatawad niya.’

²⁸Hindi niya itinulot na ako'y mamatay, magpahanggang ngayon ako'y nabubuhay.

²⁹Hindi lang minsan na ito'y ginawa ng Diyos,

³⁰na iligtas ang tao sa kanyang pagkakalugmok, at ang buhay nito'y punuin ng lugod.

³¹“Job, tumahimik ka at makinig nang mabuti, pakinggan mo't unawain itong aking sinasabi.

³²Kung mayroon ka namang nais sabihin, huwag mag-atubili't papakinggan ko rin, at kung may katuwiran ka'y aking tatanggapin.

³³Kung wala naman, makinig ka na lang, manahimik ka't, ika'y aking tuturuan.”