Read Magandang Balita Biblia, 2005 Job 34 Bible Online

Job 34 - Magandang Balita Biblia, 2005 bible

Job 34

¹Sinabi pa ni Elihu,

²“Makinig kayo, matatalinong tao, itong sinasabi ko ay pakinggan ninyo.

³Tulad ng masarap na pagkaing inyong natikman, salita ng karunungan, nawa'y inyong pakinggan.

⁴Atin ngang talakayin itong usapin, kung ano ang tama ay ating alamin.

⁵Ayon dito kay Job ay wala siyang sala, at katarungan ay ipinagkakait daw sa kanya.

⁶Bagama't matuwid itinuring na sinungaling siya, at tinadtad ng sugat kahit na walang sala.

⁷“May nakita na ba kayong tulad nitong si Job? Kaunti man ay wala siyang paggalang sa Diyos.

⁸Panay na masama ang kanyang kasamahan, nakikisama siya sa mga makasalanan.

⁹Sinabi niya na walang mabuting idudulot ang paglakad at pagsunod sa nais ng Diyos.

¹⁰“Makinig kayo sa akin, mga taong magagaling, ang Makapangyarihang Diyos ba'y maaakay sa masamang gawain?

¹¹Ginagantimpalaan niya ang tao ayon sa gawa, ang iginagawad sa kanila ay iyon lamang tama.

¹²Hindi gumagawa ng masama ang Diyos na Makapangyarihan, hindi niya kailanman binabaluktot ang katarungan.

¹³May nagbigay ba sa Diyos ng kapangyarihan? At sinong naghabilin sa kanya nitong sanlibutan?

¹⁴Kapag binawi ng Diyos ang hininga ng tao, sila'y mamamatay at sa alabok ang kanilang tungo.

¹⁶“Kung matalino kayo, pakinggan ninyo ito.

¹⁷Hindi ba ang Diyos ay makatarungan, bakit hinahatulan siya na parang makasalanan?

¹⁸Sa mga hari, siya ang nagpaparusa, kung sila'y masama at walang halaga.

¹⁹Siya ang lumikha sa sangkatauhan, kaya walang itinatangi, mahirap man o mayaman.

²⁰Sa isang kisap-mata, ang tao'y mamamatay, ang hampasin ng Diyos, bigla na lamang papanaw kahit siya'y malakas o makapangyarihan.

²¹Bawat kilos ng tao'y tinitingnan niya, ang bawat hakbang nito'y di lingid sa kanya.

²²Walang sapat na kadiliman ang mapagtataguan ng mga makasalanan.

²³Hindi na kailangan ng Diyos na magtakda ng panahon, upang ang tao'y lumapit sa kanya at gawaran ng hatol.

²⁴Hindi na rin kailangang siya'y mag-imbestiga, upang mga pinuno'y alisin at palitan ng iba.

²⁵Sapagkat alam niya ang kanilang mga gawain, sa gitna ng dilim, sila'y kanyang wawasakin.

²⁶Pinaparusahan niya ang masasama nang nakikita ng madla,

²⁷sapagkat ang kanyang mga utos ay nilalabag nila.

²⁸Dahil sa masasama, ang mahihirap ay humihibik kaya't sa daing nila ang Diyos ay nakikinig.

²⁹“Kung ipasya ng Diyos na huwag kumibo, walang maaaring sa kanya'y magreklamo. Kung kanyang talikuran ang sangnilikha, ang tao kaya ay may magagawa?

³⁰Walang magagawa ang alinmang bansa upang makaiwas sa pinunong masasama.

³¹“Job, inamin mo na ba sa Diyos ang iyong kasalanan, nangako ka na bang titigil sa kasamaan?

³²Hiniling mo na bang sa iyo'y ipaunawa ang lahat ng iyong masasamang gawa? Nangako ka na bang titigil na nga sa gawang di tama?

³³Sapagkat sa Diyos ikaw ay lumalaban, ibibigay kaya niya ang iyong kailangan? Ikaw ang magsabi ng iyong kapasyahan, sabihin mong lahat ang iyong nalalaman.

³⁴“Ang taong mayroong taglay na talino na makarinig sa aki'y magsasabi ng ganito:

³⁵‘Ang salita ni Job ay bunga ng kamangmangan, at lahat ng sinasabi niya ay walang kabuluhan.’

³⁶Isipin ninyong mabuti ang mga sinasabi niya, ang mga sagot niya ay sagot ng taong masasama.

³⁷Dinaragdagan pa niya ng paghihimagsik ang kanyang mga kasalanan, hinahamak niya ang Diyos sa ating harapan.”