Read Magandang Balita Biblia, 2005 Job 37 Bible Online

Job 37 - Magandang Balita Biblia, 2005 bible

Job 37

¹Kinakabahan ako kapag bumabagyo, at hindi ko malaman ang gagawin ko.

²Pakinggan ninyo ang tinig ng Diyos mula sa bibig niya'y nanggagaling ang kulog.

³Ang kidlat ay kanyang pinaguguhit sa kalangitan, mula sa isang panig ng daigdig hanggang sa kasuluk-sulukan.

⁴Tinig niya'y umuugong, parang dagundong ng kulog, ang pagguhit ng kidlat ay hindi malagut-lagot.

⁵Sa isang salita niya'y may nangyayaring kababalaghan, kahanga-hangang bagay na di natin mauunawaan.

⁶Pinauulan niya ng yelo sa ibabaw ng daigdig, ibinubuhos niya sa lupa ang ulang walang patid.

⁷Pinahihinto niya ang tao sa kanilang gawain, upang malaman nila kung ano ng kaya niyang gawin.

⁸Ang maiilap na hayop ay nasa kanilang mga taguan.

⁹Ang malalakas na hangi'y sa timog nagmumula, at ang malamig na simoy ay galing sa hilaga.

¹⁰Sa hininga ng Diyos nabubuo itong tubig, nagiging yelong matigas at napakalamig.

¹¹Pinabibigat niya itong mga ulap, mula rito'y pinaguguhit ang mga kidlat.

¹²Ito'y bilang pagsunod sa utos ng ating Diyos, sumusunod kahit saang panig nitong sansinukob.

¹³Ang ulang ibinubuhos ng dakilang Diyos, maaaring parusa o kagandahang-loob.

¹⁴“Tumigil ka sandali, Job, at iyong isipin, ang mga gawa ng Diyos na walang kahambing.

¹⁵Alam mo ba kung paano niya inuutusan, na maglabasan ang kidlat sa kalangitan?

¹⁶Alam mo ba kung bakit ang ulap ay lumulutang? Iyan ay gawa ng makapangyarihan niyang kamay. Tunay at ganap ang kanyang kaalaman.

¹⁷Hindi mo nga alam! Sapagkat nadarama mo lamang ang matinding init, kapag ang hanging habagat ay umiihip.

¹⁸Tulad ng ginawa niya, ang langit ba'y iyong mailalatag na parang metal na makinis at matigas?

¹⁹Ituro mo sa amin ang dapat sabihin sa Diyos, isip nami'y walang laman, pang-unawa'y kapos.

²⁰Ang makipag-usap sa Diyos ay di ko na hahangarin, bakit bibigyan ko siya ng pagkakataong ako ay puksain?

²¹“Ngayon ang langit ay nalinis na ng hangin, at nakakasilaw ang kanyang luningning.

²²May malagintong kaningningan sa gawing hilaga, iyon ay kaluwalhatian ng Diyos na dakila.

²³Ang Diyos ay tunay na makapangyarihan, kaya walang makalapit sa kanyang kinalalagyan. Siya ay tapat at makatarungan sa pakikitungo sa sangkatauhan.

²⁴Di kataka-takang siya'y iginagalang ng lahat, at di niya pinapansin ang mga nagkukunwaring mauutak.”