Read Magandang Balita Biblia, 2005 Job 38 Bible Online

Job 38 - Magandang Balita Biblia, 2005 bible

Job 38

¹Pagkatapos nito, sumagot ang Diyos kay Job sa pamamagitan ng malakas na bagyo,

²“Sino kang mag-aalinlangan sa aking kaalaman? Lalo lamang lumilitaw ang iyong kamangmangan.

³Tumayo ka riyan at magpakalalaki, tanong ko'y sagutin, ikaw ay magsabi.

⁴Nasaan ka nang likhain ko ang mundo? Kung talagang may alam ka, lahat ay sabihin mo.

⁵Sino ang nagpasya tungkol sa lawak nito? Sino ang sumukat, alam mo ba ito?

⁶Sino ang may hawak ng mga haligi ng mundo? Sino ang naglagay ng mga panulukang-bato?

⁷Noong umagang iyon, ang mga bitui'y nag-awitan, at mga nilalang sa langit, sa tuwa'y nagsigawan.

⁸“Sino ang humarang sa agos ng dagat, nang mula sa kalaliman ito'y sumambulat?

⁹Tinakpan ko ang dagat ng ulap na makapal, at binalutan ito ng kadiliman.

¹⁰Ang dagat ay nilagyan ko ng hangganan, upang ito'y manatili sa likod ng mga harang.

¹¹Sinabi kong sila'y hanggang doon na lang, at huwag lalampas ang alon na naglalakihan.

¹²Job, nakalikha ka ba kahit isang bukang-liwayway?

¹³Ang daigdig ba ay naigawa mo ng tanglaw, upang ang masasama'y mabulabog sa taguan?

¹⁴Malinaw na gaya ng tatak sa putik, nang makulayan ay tumingkad gaya ng damit.

¹⁵Masasamang tao'y nasisilaw sa liwanag ng araw, sa paggawa ng karahasan sila'y napipigilan.

¹⁶“Nakapunta ka na ba sa mga bukal ng karagatan? Ang sahig ng dagat ay iyo bang nalakaran?

¹⁷May nakapagturo na ba sa iyo sa mga pintuan na pasukan tungo sa madilim na daigdig ng mga patay?

¹⁸Alam mo ba kung gaano kalaki itong mundo? Sumagot ka kung alam mo.

¹⁹“Alam mo ba kung saan nanggagaling ang liwanag, at ang kadiliman, saan ba ito nagbubuhat?

²⁰Masasabi mo ba kung hanggang saan dapat makarating, at mula doon sila'y iyong pabalikin?

²¹Ikaw ay matanda na, baka nga iyong kaya, pagkat nang likhain ang daigdig, ikaw ay nariyan na!

²²“Napuntahan mo na ba ang aking mga imbakan ng niyebe at ng yelong ulan?

²³Ang mga ito'y aking inilalaan, sa panahon ng digmaan at ng kaguluhan.

²⁴Nakapunta ka na ba sa sikatan ng araw, o sa pinagmumulan ng hanging silangan?

²⁵“Sino nga ba ang humukay ng daanan ng baha? Ang landas ng kulog ay sino ang gumawa?

²⁶Sino ang nagbibigay ng ulan sa disyerto, kahit na doo'y wala namang nakatirang tao?

²⁷Sino ang dumidilig sa tigang na lupa, upang dito'y tumubo ang damong sariwa?

²⁸Ang ulan ba o ang hamog ay mayroong ama?

²⁹Ang yelong malamig, mayroon bang ina? Sino nga kaya ang nagsilang sa kanila?

³⁰Sa labis na lamig, tubig ay tumitigas, nagiging parang bato ang ibabaw ng dagat.

³¹“Ang Pleyades ba'y iyong matatalian, o ang Orion kaya'y iyong makakalagan?

³²Mapapatnubayan mo ba ang mga bituin, o maituturo ang daan ng malaki't maliit na diper?

³³Alam mo ba ang mga batas sa langit, ito ba'y maiaangkop mo sa daigdig?

³⁴“Ang mga ulap ba'y iyong mauutusan upang sa lupa ay magbuhos ng malakas na ulan?

³⁵Mauutusan mo ba ang kidlat na ito'y kumislap, sumunod naman kaya sa iyong mga atas?

³⁶Sino ang nagsasabi sa ibong Ibis kung kailan tataas ang Ilog Nilo, at sino ang nagpapabatid sa tandang upang ibadya ang pagdating ng bukang-liwayway?

³⁷Sinong makakabilang sa ulap na makapal, o makakapagtaob nito upang bumuhos ang ulan?

³⁸Ang ulan na sa alabok ay babasa, kapag iyon ay natuyo, magiging matigas na lupa.

³⁹“Maihahanap mo ba ng pagkain ang mga leon, upang mapawi ang kanilang gutom?

⁴⁰Habang sila'y naroon sa kanilang taguan, at wari bang pagkai'y kanilang hinihintay?

⁴¹Sino ang nagbibigay ng pagkain sa mga ibon, sino ang bumubusog sa kanilang inakay na nagugutom?