Read Magandang Balita Biblia, 2005 Job 40 Bible Online

Job 40 - Magandang Balita Biblia, 2005 bible

Job 40

¹Sinabi ni Yahweh kay Job,

²“Ang mapaghanap ba ng mali ay mangangatwiran, at sa Makapangyarihan ay makikipaglaban? Sinumang sa Diyos ay nakikipagtalo, ay dapat sumagot sa tanong na ito.”

³Tumugon naman si Job,

⁴“Narito, ako'y hamak at walang kabuluhan, wala akong maisasagot, bibig ay tatakpan.

⁵Sa panig ko'y nasabi na ang lahat ng sasabihin, ako'y di na kikibo, nasabi'y di na uulitin.”

⁶Buhat sa bagyo, sinagot ni Yahweh si Job,

⁷“Tumayo ka ngayon at magpakalalaki, tanong ko'y sagutin, ikaw ay magsabi.

⁸Ako pa ba ang nais mong palabasing masama upang iyong palitawin na ikaw ang siyang tama?

⁹Ang iyong lakas ba ay katulad ng sa Diyos? Tinig mo ba'y dumadagundong, katulad ng kulog?

¹⁰Kung gayon, balutin mo ang sarili ng dangal at kadakilaan, magbihis ka muna ng luwalhati't kaningningan.

¹¹Ibuhos mo nga ang tindi ng iyong poot, at ang mga palalo'y iyong ilugmok.

¹²Subukin mong pahiyain ang mga palalo, at ang masasama'y tapakan sa kanilang puwesto.

¹³Ibaon mo silang lahat sa ilalim ng lupa, sa daigdig ng mga patay sila'y itanikala.

¹⁴Kung iyan ay magawâ mo, maniniwala ako sa iyo na kaya mong magtagumpay sa sariling kakayahan mo.

¹⁵“Ang dambuhalang hayop ay tingnan mo, gaya mo'y nilikha ko dito sa mundo. Ito'y parang baka kung kumain ng damo.

¹⁶Ang lakas niya'y naiipon sa kanyang katawan; ang kapangyarihan, sa himaymay ng kanyang laman.

¹⁷Ang tigas ng buntot niya ay sedar ang katulad, ang kanyang mga hita'y siksik at matatag.

¹⁸Parang tanso ang kanyang mga buto, sintigas ng bakal ang kanyang mga braso.

¹⁹“Siya ay pangunahin sa mga nilikha, ngunit magagapi nang sa kanya'y lumikha.

²⁰Siya'y nanginginain doon sa mga bundok, doon sa tirahan ng kapwa niya hayop.

²¹Siya'y doon lumalagi sa ilalim ng tinikan, nakatago sa gitna ng mga talahib sa putikan.

²²Sanga ng mga puno ang sa kanya'y tumatakip, sa kanya'y nakapaligid sa tabi nitong batis.

²³Hindi siya natatakot lumakas man ang agos; ang Jordan man ay lumalim, mahinahon pa rin kung kumilos.

²⁴Siya kaya ay mahuli sa pamamagitan ng bingwit, makuha kaya siya sa ilong sa pamamagitan ng kawit?