Read Magandang Balita Biblia, 2005 Job 41 Bible Online

Job 41 - Magandang Balita Biblia, 2005 bible

Job 41

¹“Mahuhuli mo ba ang Leviatan [20] sa pamamagitan ng pamingwit? Maitatali mo ba ang dila nito sa pamamagitan ng lubid?

²Matatalian mo kaya ng lubid ang ilong nito? Tatagusan kaya ng kawit ang mga panga nito?

³Siya kaya ay lumapit at lumuhod sa harap mo, magsalita nang malumanay at magmakaawa sa iyo?

⁴Siya kaya'y makiusap at ikaw ay pangakuan, na sa habang buhay ikaw ay paglingkuran?

⁵Siya kaya'y parang ibong tatalian at lalaruin upang mga babaing lingkod mo ay aliwin?

⁶Tawaran kaya siya ng mga mamimili, paghatian kaya siya upang maipagbili?

⁷Tablan kaya ang makapal niyang balat, sa ulo kaya niya'y tumagos ang matulis na sibat?

⁸Hawakan mo siya kahit na minsan lang, hindi mo na uulitin dahil sa inyong paglalaban.

⁹“Ang sinumang sa kanya'y makakakita, sa lupa'y mabubuwal, nawawalan ng pag-asa.

¹⁰Kapag siya'y ginambala, ubod siya ng bagsik. Sa kanyang harapa'y walang nangangahas lumapit.

¹¹Sinong lulusob sa kanya at hindi mamamatay? Walang makakagawa nito sa buong sanlibutan.

¹²“Ang kanyang mga binti ay malaki at matatag, at walang kaparis ang taglay nitong lakas.

¹³Sino ang makakapag-alis sa panlabas niyang kasuotan? May sandata na bang nakatusok sa balat niyang makapal?

¹⁴Sa bibig niya'y sino kaya ang maaaring magbuka? Nakakatakot na mga ngipin nakahanay sa bunganga niya.

¹⁵Maraming kalasag, nakahanay sa kanyang likod; sintigas ng bato at nakalagay nang maayos.

¹⁶Masinsin ang pagkaayos, ito'y dikit-dikit, walang pagitan, ni hangin ay di makasingit.

¹⁸Kung siya ay bumahin, ang ilong ay nag-aapoy, mata niya'y mapula parang araw sa dapit-hapon.

¹⁹Mula sa bibig niya'y may apoy na lumalabas, mga baga ng apoy ang doo'y sumisiklab.

²⁰Sa ilong niya'y nanggagaling ang makapal na usok, parang usok na nagmumula sa kumukulong palayok at damong sinusunog.

²¹Hininga niya'y nagbabaga, sa init ay nag-aalab; naglalagablab na apoy sa bibig niya'y nagbubuhat.

²²Ang kanyang leeg nama'y puno ng kalakasan, sinumang makakita sa kanya'y kinikilabutan.

²³Walang mahinang bahagi sa kanyang balat, tulad ng bakal, matigas at makunat.

²⁴Ang tigas ng kanyang puso, bato ang katulad, gaya ng batong gilingan sa tibay at tatag.

²⁵Kapag siya ay tumayo masisindak rin ang pinakamalakas, wala silang magawâ, at sa takot ay tumatakas.

²⁶Pagkat siya'y di tatablan kahit na ng tabak, maging ng palaso, ng punyal o ng sibat.

²⁷Sa kanya ang bakal ay parang dayaming marupok, ang katulad nitong tanso ay kahoy na nabubulok.

²⁸Sa palaso'y hindi siya maaaring mapatakbo, sa kanya'y parang dayami ang tirador at ang bato.

²⁹Kahoy na panghampas sa kanya'y para lamang patpat, tumatawa lamang siya kapag siya'y sinisibat.

³⁰Kaliskis ng kanyang tiyan ay napakatalas, at sa putik na daanan, nag-iiwan ng mga bakas.

³¹Kaya niyang pakuluin ang malalim na tubig, hinahalo niya ang dagat na parang palayok ng langis.

³²Ang kanyang madaana'y kumikislap sa liwanag, ang akala mo sa tubig, puting buhok ang katulad.

³³Dito sa daigdig ay wala siyang katulad, pagkat siya'y walang takot, hindi nasisindak.

³⁴Sa lahat ng mga hayop ay mababa ang tingin niya, at sa kanilang lahat ang naghahari ay siya.”