Read Magandang Balita Biblia, 2005 Job 8 Bible Online

Job 8 - Magandang Balita Biblia, 2005 bible

Job 8

¹Ito naman ang sagot ni Bildad na Suhita:

²“Hanggang kailan ka magsasalita ng ganyan, mga salitang parang hangin at walang kabuluhan?

³Hindi pinipilipit ng Diyos ang katarungan; hindi binabaluktot ng Makapangyarihan ang katuwiran.

⁴Maaaring nagkasala sa Diyos ang iyong mga anak, kaya't ibinigay niya sa kanila ang parusang nararapat.

⁵Ngunit kung ikaw ay lalapit at makiusap sa Diyos na Makapangyarihan,

⁶kung ikaw ay talagang tapat, at malinis ang kalooban, tutulungan ka ng Diyos; gagantimpalaan at ibabalik niya ang iyong sambahayan.

⁷Maliit na bagay ang mga nawala mong kayamanan, kung ihahambing ang sa iyo'y kanyang ibibigay.

⁸“Alamin mo ang mga nagdaang kasaysayan, itanong sa matatanda ang kaalamang natuklasan.

⁹Buhay nati'y maikli lang, at kaalaman nati'y kulang; parang anino lamang tayong dumaan sa ibabaw ng sanlibutan.

¹⁰Pakaisipin mo ang kanilang mga aral, ang kanilang sinasabi ay iyong pakinggan.

¹¹“Ang halaman sa tubigan ay di mabubuhay, kundi sa matubig at malamig na lugar lamang.

¹²Ito'y unang nalalanta kapag ito ay natuyuan, kahit bagong tubo pa lang at di pa napuputulan.

¹³Ganyan ang katulad ng mga taong walang Diyos, pag-asa ay mawawala kapag ang Diyos ay nilimot.

¹⁴Ang mga bagay na pinagkakatiwalaan nila'y kasingrupok lamang ng sapot ng gagamba.

¹⁵Kapag ito'y sinandalan, agad itong nalalagot, kapag ito'y hinawakan, tiyak itong masisira.

¹⁶“Ang masasamang tao'y parang damong nagsusulputan, tulad ng masamang damong kumakalat sa halamanan.

¹⁷Bumabalot sa mga bato ang kanilang mga ugat, at sa bawat bato sila'y humahawak.

¹⁸Ngunit kapag sila'y nabunot sa kinatatamnan, wala nang nakakaalala sa dati nilang kalagayan.

¹⁹Ganyan ang kasiyahan ng masasamang tao, may iba namang lilitaw at kukuha ng kanilang puwesto.

²⁰“Hindi pababayaan ng Diyos ang mabuting tao, ngunit sa masama'y hindi siya sasaklolo.

²¹Patatawanin ka niya at pasisigawin sa tuwa,

²²ngunit ang mga kaaway mo'y kanyang ipapahiya, at ang tahanan ng masasama ay ganap na mawawala.”