Read Magandang Balita Biblia, 2005 Job 9 Bible Online

Job 9 - Magandang Balita Biblia, 2005 bible

Job 9

¹Ito naman ang tugon ni Job:

²“Matagal ko nang alam ang mga bagay na iyan, ngunit sino bang matuwid sa harap ng Maykapal?

³Mayroon bang maaaring makipagtalo sa kanya? Sa sanlibo niyang tanong, walang makakasagot kahit isa.

⁴Ang Diyos ay matalino at makapangyarihan, sinong lumaban na sa kanya at nagtagumpay?

⁵Walang sabi-sabing inuuga niya ang bundok, sa tindi ng kanyang galit, ito'y kanyang dinudurog.

⁶Ang buong lupa ay kanyang niyayanig, at inuuga niya ang saligan ng daigdig.

⁷Maaari niyang pigilan ang pagsikat ng araw, pati ang mga bituin sa kalangitan.

⁸Mag-isa niyang inilatag ang sangkalangitan, kanyang tinapakan ang dambuhalang karagatan.

⁹Siya ang gumawa ng mga bituin sa kalawakan, sa ‘Oso,’ sa ‘Orion,’ sa ‘Pleyades’ at sa mga kumpol ng mga bituin sa katimugan.

¹⁰Makapangyarihan niyang gawa ay hindi maunawaan, ang kanyang mga himala ay hindi mabibilang.

¹¹Siya'y nagdaraan ngunit hindi ko mamasdan, siya'y kumikilos ngunit hindi ko maramdaman.

¹²Nakukuha niya ang anumang magustuhan, at sa kanya'y walang makakahadlang, walang makakapagtanong, ‘Bakit mo ginawa iyan?’

¹³“Ang poot ng Diyos ay hindi maglulubag sa mga tumulong sa dambuhalang si Rahab.

¹⁴Paano ko masasagot ang tanong niya sa akin? Maghahanap pa ako ng mga salitang aking bibigkasin.

¹⁵Kahit ako'y walang sala, ang tangi kong magagawa, sa harap ng Diyos na hukom ay magmakaawa.

¹⁶Kahit bayaan niyang ako'y magsalita, hindi ko rin matiyak kung ako'y papakinggan nga.

¹⁷Malakas na bagyo at mga sugat ang sa aki'y ibinigay, kahit wala naman siyang sapat na dahilan.

¹⁸Ang hininga ko ay halos kanya nang lagutin, puro kapaitan ang idinulot niya sa akin.

¹⁹Sa lakas niyang taglay hindi siya kayang talunin, hindi siya maaaring pilitin at sa hukuman ay dalhin.

²⁰Ako'y walang kasalanan at tapat na namumuhay, ngunit bawat sabihin ko ay laban sa aking katauhan.

²¹Wala nga akong sala, ngunit hindi na ito mahalaga, wala nang halaga ang aking sarili, pagod na akong mabuhay.

²²Iisa ang pupuntahan ng lahat, ito ang aking nasabi. Kapwa wawasakin ng Diyos ang masama at ang mabuti.

²³Kung ang taong matuwid ay biglang namatay, tinatawanan ng Diyos ang sinapit ng kawawa.

²⁴Hinayaan niyang ang daigdig ay pagharian ng masama, ang paningin ng mga hukom ay tinatakpan niya. Kung di siya ang may gawa nito, sino pa nga kaya?

²⁵“Ang aking mga araw ay mabilis lumilipas, walang mabuting nangyayari kaya't nagmamadaling tumatakas.

²⁶Parang mabilis na bangka ang buhay kong ito, kasing bilis ng agila kung dumadagit ng kuneho.

²⁷Kung kakalimutan ko na lang ang aking pagdurusa, at tatawanan ko na lang ang aking problema,

²⁸nangangamba ako na inyong ipalagay, na ang kasawian ko ay bunga ng aking kasalanan.

²⁹Kung ako'y napatunayan nang nagkasala, anong pagsisikap ang magagawa ko pa?

³⁰Hindi ako malilinis ng kahit anong sabon, hindi na ako puputi kuskusin man ng apog,

³¹matapos mo akong ihagis sa napakaruming balon. Ikinahihiya ako maging ng aking sariling damit.

³²Kung ang Diyos ay tao lang, siya'y aking sasagutin, kahit umabot sa hukuman ang aming usapin.

³³Ngunit sa aming dalawa'y walang tagapamagitan, upang alitan namin ay kanyang mahatulan.

³⁴Ang pamalo ng Diyos sana'y ilayo na sa akin, at huwag na sana niya akong takutin.

³⁵At ihahayag ko ang nais kong sabihin, sapagkat ako ang nakakaalam ng sarili kong damdamin.