Read Magandang Balita Biblia, 2005 Mga Awit 102 Bible Online

Mga Awit 102 - Magandang Balita Biblia, 2005 bible

Mga Awit 102

¹Panalangin ng isang dumaranas ng hirap at humihingi ng tulong kay Yahweh. Dinggin mo, O Yahweh, ang aking dalangin, lingapin mo ako sa aking pagdaing.

²O huwag ka sanang magkubli sa akin, lalo sa panahong may dusa't bigatin. Kapag ako'y tumawag, ako'y iyong dinggin sa sandaling iyo'y agad mong sagutin.

³Nanghihina akong usok ang katulad, damdam ko sa init, apoy na maningas.

⁴Katulad ko'y damong natuyo sa parang, pati sa pagkai'y di ako ganahan.

⁵Kung ako'y tumaghoy ay ubod nang lakas, yaring katawan ko'y buto na at balat.

⁶Tulad ko'y mailap na ibon sa ilang, para akong kuwago sa dakong mapanglaw;

⁷ang aking katulad sa hindi pagtulog, ibon sa bubungang palaging malungkot.

⁸Sa buong maghapon, ang kaaway ko, nililibak ako, kinukutyang todo; gamit sa pagsumpa'y itong pangalan ko.

⁹Pagkain ko'y abo at hindi tinapay, luha'y hinahalo sa aking inuman.

¹⁰Dahil sa galit mo, aking Panginoon, dinaklot mo ako't iyong itinapon.

¹¹Ang buhay kong taglay ay parang anino; katulad ko ngayo'y natuyo nang damo.

¹²Ngunit ikaw, Yahweh, ay haring walang hanggan, di ka malilimot ng buong kinapal.

¹³Ikaw ay mahabag, tulungan ang Zion, pagkat dumating na ang takdang panahon, sa kalagayan niya ay dapat tumulong.

¹⁴Mahal pa rin siya ng iyong mga lingkod bagama't nawasak at gumuhong lubos.

¹⁵Ang lahat ng bansa kay Yahweh ay takot, maging mga hari sa buong sinukob.

¹⁶Itatayong muli ni Yahweh ang Zion, kaluwalhatian niya'y mahahayag doon.

¹⁷Daing ng mahirap ay iyong papakinggan, di mo tatanggihan ang kanilang kahilingan.

¹⁸Ito'y masusulat upang matunghayan, susunod na lahing di pa dumarating; ikaw nga, O Yahweh, ang siyang pupurihin.

¹⁹Mula sa itaas, sa trono mong banal, ang lahat sa lupa'y iyong minamasdan.

²⁰Iyong dinirinig ang pagtataghuyan ng mga bilanggong ang hatol ay bitay, upang palayain sa hirap na taglay.

²¹Anupa't ang iyong ngala'y mahahayag, sa Zion, O Yahweh, ika'y itatanyag; at sa Jerusalem pupurihing ganap

²²kapag ang mga bansa ay nagsasama-sama sa banal na lunsod upang magsisamba.

²³Ako'y pinanghina, sa aking kabataan; pakiramdam ko ay umikli ang buhay.

²⁴Itong aking hibik, O aking Diyos, huwag mo sanang kunin sa ganitong ayos! Ang buhay mo, Yahweh, walang katapusan;

²⁵nang pasimula'y nilikha mo ang sanlibutan, at ang mga kamay mo ang siyang lumikha sa kalangitan.

²⁶Maliban sa iyo, lahat ay lilipas, at tulad ng damit, lahat ay kukupas; sila'y huhubaring parang kasuotan.

²⁷Ngunit mananatili ka't hindi magbabago, walang katapusan ang mga taon mo.

²⁸At ang mga anak ng iyong mga lingkod, mamumuhay namang panatag ang loob; magiging matatag ang kanilang angkan, sa pag-iingat mo, sila'y mananahan.