Read Magandang Balita Biblia, 2005 Mga Awit 109 Bible Online

Mga Awit 109 - Magandang Balita Biblia, 2005 bible

Mga Awit 109

¹Pinupuri kita; O Diyos, huwag ka sanang manahimik,

²ako ngayo'y nilulusob niyong mga malulupit, mga taong sinungaling na manira lang ang nais.

³Kay rami ng sinasabing pangungusap na di tunay, kinakalaban nga ako kahit walang madahilan.

⁴Bagaman sila'y minahal ko, masama rin ang paratang, kahit ko pa idalangin, masama pa rin yaong bintang.

⁵Sa mabuting ginawa ko, iginanti ay masama, kapalit ng pag-ibig ko ay galit at alipusta.

⁶Ang itapat mo sa kanya'y masama ring tulad niya, kaaway ang pausigin, nang magtamo ng parusa,

⁷pagkatapos na malitis, bayaan mo na magdusa, kahit siya manalangin, huwag mo nang dinggin pa.

⁸Ang dapat ay paikliin tinataglay niyang buhay, kuhanin ng ibang tao maging kanyang katungkulan.

⁹Silang mga anak niya ay dapat na maulila, hayaan mong maging biyuda, itong giliw nilang ina.

¹⁰Bayaan ang mga supling, maglakad at mamalimos, sa nawasak na tahanan palayasin silang lubos.

¹¹Ang lahat ng yaman niya'y ilitin ng nagpautang, agawin ng ibang tao, ang bunga ng pagpapagal.

¹²Hindi siya nararapat kahabagan nino pa man, kahit anak na ulila sa hirap ay pabayaan.

¹³Pati angkan niya't lahi, ay bayaang mamatay, sa sunod na lahi niya, ngalan niya ay maparam.

¹⁴Gunitain sana ni Yahweh ang sala ng kanyang angkan, at ang sala nitong ina ay di dapat malimutan.

¹⁵Huwag din sanang malimutan ni Yahweh ang sala nila, ngunit sila naman mismo ay dapat na malimot na!

¹⁶Pagkat mga taong iyo'y wala namang natulungan, bagkus pa ang mahirap inuusig, pinapatay.

¹⁷Mahilig sa pagsumpa, kaya dapat na sumpain, yamang ayaw na magpala, di dapat pagpalain.

¹⁸Ang pagsumpa sa kapwa sa kanya ay parang damit, kasuotang oras-oras nagagawa ang magbihis; sana'y siya ang ginawin, katulad ng nasa tubig tumagos sa buto niya, iyong sumpang parang langis.

¹⁹Sana'y maging kasuotang nakabalot sa katawan, na katulad ng sinturong nakabigkis araw-araw.

²⁰Ang ganitong kaaway ko, Yahweh, iyong parusahan, sa dami ng ginagawa't sinasabing kasamaan.

²¹Katulad ng pangako mo, Yahweh, ako ay tulungan, yamang ika'y mapagmahal, ako'y ipagtanggol naman.

²²Pagkat ako ay mahirap, laging nangangailangan, labis akong naghihirap sa ganitong kalagayan.

²³Anino ang katulad ko na kung gabi'y nawawala, parang balang na lumipad, kapag ako ay inuga.

²⁴Mahina na ang tuhod ko, dahilan sa di pagkain, payat na ang katawan ko, buto't balat sa paningin.

²⁵Ang sinumang makakita sa akin ay nagtatawa, umiiling silang lahat kapag ako'y nakikita.

²⁶Tulungan mo ako, Yahweh, sana naman ay iligtas, dahilan sa pag-ibig mong matatag at di kukupas.

²⁷Bayaan mong makilala na ikaw ang nahahabag, ipakita sa kaaway na ikaw ang nagliligtas.

²⁸Ako'y iyong pagpalain, kung kanilang sinusumpa, sa kanilang pag-uusig bayaan mong mapahiya; ako namang iyong lingkod mabubuhay na may tuwa.

²⁹Silang mga nang-uusig, bayaan mong mabahala, ang damit ng kahihiyan, isuot mo sa kanila.

³⁰Kay Yahweh ay buong puso akong magpapasalamat, sa gitna ng karamiha'y magpupuri akong ganap;

³¹pagkat siya'y laging handang tumulong sa mahihirap, na lagi nang inuusig at ang gusto'y ipahamak.