Read Magandang Balita Biblia, 2005 Mga Awit 112 Bible Online

Mga Awit 112 - Magandang Balita Biblia, 2005 bible

Mga Awit 112

¹Purihin si Yahweh! Mapapalad ang tao na kay Yahweh ay gumagalang, at taus-pusong sumusunod sa kanyang kautusan.

²Ang kanyang lipi'y magiging dakila, pati mga angkan ay may pagpapala.

³Magiging sagana sa kanyang tahanan, pagpapala niya'y walang katapusan.

⁴Ang taong matuwid, may bait at habag, kahit sa madilim taglay ay liwanag.

⁵Ang mapagpautang nagiging mapalad, kung sa hanapbuhay siya'y laging tapat.

⁶Hindi mabibigo ang taong matuwid, di malilimutan kahit isang saglit.

⁷Masamang balita'y hindi nagigitla, matatag ang puso't kay Yahweh'y tiwala.

⁸Wala siyang takot hindi nangangamba, alam na babagsak ang kaaway niya.

⁹Nagbibigay sa mga nangangailangan, pagiging mat'wid niya'y walang hanggan, buong karangalang siya'y itataas.

¹⁰Kung makita ito ng mga masama, lumalayas silang mabagsik ang mukha; pagkat ang pag-asa'y lubos nang nawala.