Read Magandang Balita Biblia, 2005 Mga Awit 142 Bible Online

Mga Awit 142 - Magandang Balita Biblia, 2005 bible

Mga Awit 142

¹Isang Maskil[112] ni David, nang siya'y nasa kuweba. Ito'y isa ring panalangin. O Yahweh, ako ay humingi ng tulong, ako'y maghihintay sa iyong pagtugon;

²ang aking dinala'y lahat kong hinaing, at ang sinabi ko'y pawang suliranin.

³Nang ako ay halos wala nang pag-asa, ang dapat kong gawi'y nalalaman niya. Sa landas na aking pinagdaraanan, may handang patibong ang aking kaaway.

⁴Sa aking paligid, nang ako'y lumingon, wala ni isa man akong makatulong; wala kahit isa na magsasanggalang, ni magmalasakit na kahit sinuman.

⁵Ako ay humibik, kay Yahweh dumaing, sa Tagapagligtas, ako'y dumalangin; tunay na ikaw lang mahalaga sa akin.

⁶Dinggin ang hibik ko, ako ay tulungan, pagkat halos ako'y di makagulapay; iligtas mo ako sa mga kaaway, na mas malalakas ang mga katawan.

⁷Sa suliranin ko, ako ay hanguin, at ang pangalan mo'y aking pupurihin, sa gitna ng madlang mga lingkod mo rin sa kabutihan mong ginawa sa akin!