Read Magandang Balita Biblia, 2005 Mga Awit 18 Bible Online

Mga Awit 18 - Magandang Balita Biblia, 2005 bible

Mga Awit 18

¹Upang awitin ng Punong Mang-aawit. Awit ni David na lingkod ni Yahweh: inawit niya ito nang siya'y iligtas ni Yahweh mula sa kanyang mga kaaway at kay Saul. O Yahweh, ika'y aking minamahal, ikaw ang aking kalakasan!

²Si Yahweh ang aking batong tanggulan, ang aking Tagapagligtas, Diyos at kanlungan, tagapag-ingat ko at aking sanggalang.

³Kay Yahweh ako'y tumatawag, sa aking mga kaaway ako'y inililigtas. Karapat-dapat purihin si Yahweh!

⁴Ginapos ako ng tali ng kamatayan; tinabunan ako ng alon ng kapahamakan.

⁵Nakapaligid sa akin ang panganib ng kamatayan, nakaumang sa akin ang bitag ng libingan.

⁶Kaya't si Yahweh ay aking tinawag; sa aking paghihirap, humingi ng habag. Mula sa kanyang Templo, tinig ko ay narinig, pinakinggan niya ang aking paghibik.

⁷Ang buong lupa ay nauga at nayanig, pundasyon ng mga bundok ay nanginig, sapagkat ang Diyos ay galit na galit!

⁸Lumabas ang usok sa kanyang ilong, mula sa kanyang bibig ay mga baga at apoy.

⁹Nahawi ang langit at siya'y bumabâ, makapal na ulap ang tuntungan niya.

¹⁰Sa isang kerubin siya ay sumakay; sa papawirin mabilis na naglakbay.

¹¹Ang kadilima'y ginawa niyang takip, maitim na ulap na puno ng tubig.

¹²Gumuhit ang kidlat sa harapan niya, at mula sa ulap, bumuhos kaagad ang maraming butil ng yelo at baga.

¹³Nagpakulog si Yahweh mula sa langit, tinig ng Kataas-taasan, agad narinig.

¹⁴Dahil sa mga palaso na kanyang itinudla, ang mga kaaway ay nangalat sa lupa; nagsala-salabat ang guhit ng kidlat, lahat ay nagulo kaya't nagsitakas.

¹⁵Dahil sa galit mo, O Yahweh, sa ilong mo galing ang bugso ng hangin; kaya't ang pusod ng dagat ay nalantad, mga pundasyon ng lupa ay nahayag.

¹⁶Mula sa kalangitan, itong Panginoon, sa malalim na tubig, ako'y iniahon.

¹⁷Iniligtas ako sa kapangyarihan ng mga kaaway na di ko kayang labanan;

¹⁸Sinalakay nila ako noong ako'y naguguluhan, ngunit si Yahweh ang sa aki'y nagsanggalang.

¹⁹Nang nasa panganib, ako'y kanyang tinulungan, ako'y iniligtas sapagkat kanyang kinalulugdan!

²⁰Pinagpapala ako ni Yahweh pagkat ako'y matuwid, binabasbasan niya ako dahil kamay ko'y malinis.

²¹Mga utos ni Yahweh ay aking sinunod, hindi ko tinalikuran ang aking Diyos.

²²Lahat ng utos niya ay aking tinupad, mga batas niya ay hindi ko nilabag.

²³Nalalaman niyang ako'y walang kasalanan, paggawa ng masama ay aking iniwasan.

²⁴Kaya naman ako'y ginagantimpalaan niya, sapagkat alam niyang ako'y totoong walang sala.

²⁵Tapat ka, O Diyos, sa mga tapat sa iyo, at napakabuti mo sa mabubuting tao.

²⁶Ikaw ay mabait sa taong matuwid, ngunit sa masama, ikaw ay malupit.

²⁷Ang mapagpakumbabá ay inililigtas mo, ngunit iyong ibinabagsak ang mga palalo.

²⁸Ikaw, O Yahweh, ang nagbibigay sa akin ng ilaw; inaalis mo, O Diyos, ang aking kadiliman.

²⁹Pinapalakas mo ako laban sa kaaway, upang tanggulan nito ay aking maagaw.

³⁰Ang Diyos na ito ay sakdal ang gawa, at maaasahan ang kanyang salita! Siya ay kalasag ng mga umaasa, at ng naghahanap ng kanyang kalinga.

³¹Si Yahweh lamang ang Diyos na tunay; tanging Diyos lamang ang batong tanggulan.

³²Ang Diyos na sa aki'y nagbibigay-lakas, sa daraanan ko'y siyang nag-iingat.

³³Tulad ng usa, tiyak ang aking mga hakbang, inaalalayan niya ako sa mga kabundukan.

³⁴Sinasanay niya ako sa pakikipagdigma, upang mabanat ko ang pinakamatigas na pana.

³⁵Iniingatan mo ako at inililigtas; sa iyong pagkalinga, ako ngayo'y tanyag, sa iyong pagtulong, ako'y naging matatag.

³⁶Inalalayan mo sa bawat paghakbang, ang mga paa ko'y ni hindi nadulas.

³⁷Mga kaaway ko'y aking hinahabol, di ako tumitigil hanggang di sila nalilipol.

³⁸Di sila makabangon kapag ako'y sumalakay; sa paanan ko'y bagsak sila at talunan.

³⁹Pinapalakas mo ako para sa labanan, at pinagtatagumpay sa aking mga kaaway.

⁴⁰Mga kaaway ko'y pinapaatras mo, mga napopoot sa akin ay pinupuksa ko.

⁴¹Humihingi sila ng saklolo ngunit walang tumutulong, tumatawag rin kay Yahweh ngunit hindi siya tumutugon.

⁴²Dinurog ko sila, hanggang sa matulad sa pinong alikabok na ipinapadpad; aking itinapon, niyapak-yapakan kagaya ng putik sa mga lansangan.

⁴³Sa mapanghimagsik na bayan ako'y iniligtas mo, sa maraming bansa'y ginawa mo akong pangulo. Ang aking nasasakupan ngayo'y marami na, kahit na nga sila ay hindi ko kilala.

⁴⁴Sa bawat utos ko, sila'y sumusunod, maging mga dayuhan, sa aki'y yumuyukod.

⁴⁵Nawawalan sila ng lakas ng loob, nanginginig papalabas sa kanilang muog.

⁴⁶Buháy si Yahweh, Diyos ko't Tagapagligtas, matibay kong muog, purihin ng lahat! Ang kanyang kadakilaa'y ating ipahayag!

⁴⁷Pinagtatagumpay niya ako sa mga kaaway, mga bansa'y ipinapailalim niya sa aking paanan;

⁴⁸at inililigtas niya ako sa aking mga kalaban. Laban sa mararahas, ako'y pinagtatagumpay, sa aking kaaway, ika'y aking kalasag at patnubay.

⁴⁹Sa lahat ng bansa ika'y aking pupurihin, ang karangalan mo'y aking aawitin, ang iyong pangalan, aking sasambahin.

⁵⁰Dakilang tagumpay ibinibigay ng Diyos sa kanyang hari; tapat na pag-ibig ipinadarama niya sa kanyang pinili, kay David at sa lahat ng kanyang salinlahi.