Read Magandang Balita Biblia, 2005 Mga Awit 21 Bible Online

Mga Awit 21 - Magandang Balita Biblia, 2005 bible

Mga Awit 21

¹Katha ni David upang awitin ng Punong Mang-aawit. Natutuwa ang hari, Yahweh, dahil sa bigay mong lakas, dahil sa iyong tulong siya ay nagagalak.

²Iyong ibinigay ang kanyang inaasam, ipinagkaloob mo ang kanyang kahilingan. (Selah) [18]

³Nilapitan mo siya't lubos na binasbasan, dalisay na gintong korona, sa ulo niya'y inilagay.

⁴Humiling siya ng buhay at iyong ibinigay, ng mahabang buhay, na magpakailanman.

⁵Dahil sa tulong mo, dakila ang kanyang karangalan, dangal at kadakilaan sa kanya'y iyong ibinigay.

⁶Pagpapala mo'y nasa kanya magpakailanman, ang iyong patnubay, dulot sa kanya'y kagalakan.

⁷Sa Kataas-taasang Diyos ang hari ay nagtitiwala, dahil sa tapat na pag-ibig ni Yahweh, di siya nababahala.

⁸Dadakpin ng hari ang lahat niyang mga kaaway, bibihagin niya ang bawat isa na sa kanya'y nasusuklam.

⁹Sa kanyang pagdating, sa apoy sila'y susunugin, sa galit ni Yahweh, sa apoy sila'y tutupukin.

¹⁰Walang matitira sa kanilang lahi, sapagkat sila'y lilipulin ng hari.

¹¹Sa masasamang balak nilang gawin laban sa kanya, walang anumang magtatagumpay sa mga plano nila.

¹²Sila'y kanyang papanain, sila'y uurong at patatakbuhin.

¹³Pinupuri ka namin, Yahweh, sa taglay mong kalakasan! Aawit kami at magpupuri dahil sa iyong kapangyarihan.