Read Magandang Balita Biblia, 2005 Mga Awit 34 Bible Online

Mga Awit 34 - Magandang Balita Biblia, 2005 bible

Mga Awit 34

¹Katha ni David nang siya'y palayasin ni Abimelec matapos magkunwang nasisiraan siya ng bait. Sa lahat ng pagkakataon si Yahweh ay aking pupurihin; pagpupuri ko sa kanya'y hindi ko papatigilin.

²Aking pupurihin kanyang mga gawa, kayong naaapi, makinig, matuwa!

³Ang kadakilaan niya ay ihayag, at ang ngalan niya'y purihin ng lahat!

⁴Ang aking dalangi'y dininig ng Diyos, inalis niya sa akin ang lahat kong takot.

⁵Nagalak ang aping umasa sa kanya, pagkat di nabigo ang pag-asa nila.

⁶Tumatawag sa Diyos ang walang pag-asa, sila'y iniligtas sa hirap at dusa.

⁷Anghel ang siyang bantay sa may takot sa Diyos, sa mga panganib, sila'y kinukupkop.

⁸Tingnan mo at lasapin ang kabutihan ni Yahweh; mapalad ang mga taong nananalig sa kanya.

⁹Matakot kay Yahweh, kayo na kanyang bayan, nang makamtan ninyo ang lahat ng bagay.

¹⁰Kahit mga leon ay nagugutom din, sila'y nagkukulang sa hustong pagkain; ngunit ang sinumang kay Yahweh ay sumunod, mabubuting bagay, sa kanya'y di mauudlot.

¹¹Lapit, ako'y dinggin mga kaibigan, at kayo ngayo'y aking tuturuan na si Yahweh ay dapat sundi't igalang.

¹²Sinong may gusto ng mahabang buhay; sinong may nais ng masaganang buhay?

¹³Dila mo'y pigilan sa paghabi ng kasamaan.

¹⁴Mabuti ang gawi't masama'y layuan pagsikapang kamtin ang kapayapaan.

¹⁵Mga mata ni Yahweh, sa mat'wid nakatuon, sa kanilang pagdaing, lagi siyang tumutugon.

¹⁶Sa mga masasama, siya'y tumatalikod, at sa alaala, sila'y mawawala.

¹⁷Agad dinirinig daing ng matuwid; inililigtas sila sa mga panganib.

¹⁸Tinutulungan niya, mga nagdurusa at di binibigo ang walang pag-asa.

¹⁹Ang taong matuwid, may suliranin man, sa tulong ni Yahweh, agad maiibsan.

²⁰Kukupkupin siya nang lubus-lubusan, kahit isang buto'y hindi mababali.

²¹Ngunit ang masama, ay kasamaan din sa taglay na buhay ang siyang kikitil.

²²Mga lingkod niya'y kanyang ililigtas, sa nagpapasakop, siya ang mag-iingat!