Read Magandang Balita Biblia, 2005 Mga Awit 37 Bible Online

Mga Awit 37 - Magandang Balita Biblia, 2005 bible

Mga Awit 37

¹Katha ni David. Huwag kang mabalisa dahil sa masama; huwag mong kainggitan liko nilang gawa.

²Katulad ng damo, sila'y malalanta, tulad ng halaman, matutuyo sila.

³Umasa ka sa Diyos, ang mabuti'y gawin, at mananahan kang ligtas sa lupain.

⁴Kay Yahweh mo hanapin ang kaligayahan, at ang pangarap mo'y iyong makakamtan.

⁵Ang iyong sarili'y sa kanya italaga, tutulungang ganap kapag ika'y nagtiwala.

⁶Ang kabutihan mo ay magliliwanag, katulad ng araw kung tanghaling-tapat.

⁷Sa harap ni Yahweh ay pumanatag ka, maging matiyagang maghintay sa kanya; huwag mong kainggitan ang gumiginhawa, sa likong paraan, umunlad man sila.

⁸Huwag kang mapopoot ni mababalisa, iyang pagkagalit, iwasan mo sana; walang kabutihang makakamtan ka.

⁹Ang nagtitiwala kay Yahweh, mabubuhay, ligtas sa lupain at doon tatahan, ngunit ang masama'y ipagtatabuyan.

¹⁰Hindi magtatagal, sila'y mapaparam, kahit hanapin mo'y di masusumpungan.

¹¹Tatamuhin ng mga mapagpakumbabá, ang lupang pangako na kanyang pamana; at sa lupang iyon na napakasagana, ang kapayapaa'y matatanggap nila.

¹²Ang taong masama'y laban sa matuwid, napopoot siyang ngipi'y nagngangalit.

¹³Si Yahweh'y natatawa lang sa masama, pagkat araw nila lahat ay bilang na.

¹⁴Taglay ng masama'y pana at patalim, upang ang mahirap dustai't patayin, at ang mabubuti naman ay lipulin.

¹⁵Ngunit sa sariling tabak mamamatay, pawang mawawasak pana nilang taglay.

¹⁶Higit na mabuti ang may kakaunti ngunit matuwid at walang kinakanti, kaysa kayamanan nitong masasama, pagsamahin mang lahat, ito'y bale-wala.

¹⁷Lakas ng masama ay aalisin, ngunit ang matuwid ay kakalingain.

¹⁸Iingatan ni Yahweh ang taong masunurin, ang lupang minana'y di na babawiin.

¹⁹Kahit na sumapit ang paghihikahos, di daranasin ang pagdarahop.

²⁰Ngunit ang masama'y pawang mamamatay; kalaban ni Yahweh, tiyak mapaparam, tulad ng bulaklak at mga halaman; para silang usok na paiilanlang.

²¹Anumang hiramin ng taong masama, di na ibabalik sa kanyang kapwa, ngunit ang matuwid na puso'y dakila, ang palad ay bukás at may pang-unawa.

²²Lahat ng mga taong pinagpala ni Yahweh, lupang masagana, kanilang bahagi; ngunit ang sinuman na kanyang sumpain, sa lupaing iyon ay palalayasin.

²³Ang gabay ng tao sa kanyang paglakad, ay itong si Yahweh, kung nais maligtas; sa gawain niya, ang Diyos nagagalak.

²⁴Kahit na mabuwal, siya ay babangon, pagkat si Yahweh, sa kanya'y tutulong.

²⁵Mula pagkabata't ngayong tumanda na, sa tanang buhay ko'y walang nabalita na sa taong tapat, ang Diyos nagpabaya; o ang anak niya'y naging hampas-lupa.

²⁶Sa lahat ng oras, bukás pa ang palad sa pagkakaloob sa mga mahirap; pagpapala'y laan ng kanilang mga anak.

²⁷Masama'y itakwil, mabuti ang gawin, upang manahan kang lagi sa lupain.

²⁸Ang lahat ng taong wasto ang gawain, ay mahal ni Yahweh, hindi itatakwil. Sila'y iingatan magpakailanman, ngunit ang masama ay ihihiwalay.

²⁹Ang mga matuwid, ligtas na titira, at di na aalis sa lupang pamana.

³⁰Sa bibig ng matuwid namumutawi'y karunungan; at sa labi nila'y pawang katarungan.

³¹Ang utos ng Diyos ang laman ng puso, sa utos na ito'y hindi lumalayo.

³²Ang taong masama'y laging nag-aabang, sa taong matuwid nang ito'y mapatay;

³³ngunit hindi naman siya hahayaang mahulog sa kamay ng mga kaaway; di rin magdurusa kahit paratangan.

³⁴Manalig ka kay Yahweh, utos niya'y sundin; ikaw ay lalakas upang ang lupain ay kamtin, at ang mga taksil makikitang palalayasin.

³⁵Ako'y may nakitang taong abusado, itaas ang sarili ang kanyang gusto; kahoy sa Lebanon ang tulad nito.

³⁶Lumipas ang araw, ang aking napuna, nang ako'y magdaan, ang tao'y wala na; hinanap-hanap ko'y di ko na makita.

³⁷Ang taong matuwid ay inyong pagmasdan, mapayapang tao'y patuloy ang angkan.

³⁸Ngunit wawasaking lubos ang masama, lahi'y lilipulin sa balat ng lupa.

³⁹Ililigtas ni Yahweh ang mga matuwid, iingatan sila kapag naliligalig.

⁴⁰Sasaklolohan sila't kanyang tutulungan laban sa masama, ipagsasanggalang; sapagkat si Yahweh ang kanilang sandigan.