Read Magandang Balita Biblia, 2005 Mga Awit 55 Bible Online

Mga Awit 55 - Magandang Balita Biblia, 2005 bible

Mga Awit 55

¹Isang Maskil[47] ni David, upang awitin ng Punong Mang-aawit; sa saliw ng mga instrumentong may kuwerdas. Ang panalangin ko, O Diyos, pakinggan, mga daing ko ay huwag namang layuan.

²Lingapin mo ako, ako ay sagipin, sa bigat ng aking mga suliranin.

³Sa maraming banta ng mga kaaway, nalilito ako't hindi mapalagay. Ang dulot sa akin nila'y kaguluhan, namumuhi sila't may galit ngang tunay.

⁴Itong aking puso'y tigib na ng lumbay, sa aking takot na ako ay pumanaw.

⁵Sa tindi ng takot, ako'y nanginginig, sinasaklot ako ng sindak na labis.

⁶Wika ko, “Kung ako lamang ay may pakpak, parang kalapati, ako ay lilipad; hahanapin ko ang dakong panatag.

⁷Aking liliparin ang malayong lugar, at doon sa ilang ako mananahan. (Selah) [48]

⁸Ako ay hahanap agad ng kanlungan upang makaiwas sa bagyong darating.”

⁹Sila ay wasakin, Yahweh, guluhin mo; pag-uusap nila'y bayaang malito, yamang karahasan ang nakikita ko, at sa lunsod nila ay nagkakagulo.

¹⁰Sa lunsod na puno ng sama't ligalig, araw-gabi'y doon sila lumiligid;

¹¹Sa gitna ng lunsod na wasak nang tunay, naghahari pa rin ang katiwalian; pati pang-aapi ay nasasaksihan.

¹²Kaya kong mabata at mapagtiisan, kung ang mangungutya ay isang kaaway; kung ang maghahambog ay isang kalaban, kayang-kaya ko pang siya'y pagtaguan!

¹³Ang mahirap nito'y tunay kong kasama, aking kaibigang itinuturing pa!

¹⁴Dati'y kausap ko sa bawat sandali at maging sa templo, kasama kong lagi.

¹⁵Biglang kamatayan nawa ay dumating, ihuhulog ng buháy, sa daigdig ng mga patay; sa kanilang puso't maging sa tahanan, yaong naghahari'y pawang kasamaan.

¹⁶Kay Yahweh lang ako hihingi ng saklolo; aking natitiyak, ililigtas ako.

¹⁷Sa umaga't hapon, maging sa gabi rin. Aking itataghoy ang mga hinaing, at ang aking tinig ay kanyang diringgin.

¹⁸Ililigtas ako mula sa labanan, at pababaliking taglay ang tagumpay, matapos gapiin ang mga kaaway.

¹⁹Ang Diyos na hari sa mula't mula pa ay diringgin ako, lulupigin sila; (Selah) [49] pagkat ni sa kanya'y wala silang takot, ayaw nang magbago at magbalik-loob.

²⁰Itong taong dati'y aking kasamahan, mga kaibiga'y kanyang kinalaban; at hindi tumupad sa 'ming kasunduan.

²¹Ang dulas ng dila'y parang mantekilya, ngunit nasa puso pagkapoot niya; ang mga salita niya'y tulad ng langis, ngunit parang tabak ang talas at tulis.

²²Ilagak kay Yahweh iyong suliranin, aalalayan ka't ipagtatanggol rin; ang taong matuwid, di niya bibiguin.

²³Ngunit ang bulaan at mamamatay-tao, O Diyos, sa hukay, sila'y itapon mo. Hindi magtatagal, ang buhay nila sa daigdig, ngunit tanging sa Diyos ako ay mananalig.