Read Magandang Balita Biblia, 2005 Mga Awit 76 Bible Online

Mga Awit 76 - Magandang Balita Biblia, 2005 bible

Mga Awit 76

¹Awit na katha ni Asaf upang awitin ng Punong Mang-aawit: sa saliw ng mga instrumentong may kuwerdas. Tunay na si Yahweh'y kilala sa Juda, sa buong Israel, dakilang talaga;

²nasa Jerusalem ang tahanan niya, sa Bundok ng Zion, doon tumitira.

³Lahat ng sandata ng mga kaaway, mga pana't sundang, baluting sanggalang, doon niya sinirang walang pakundangan. (Selah) [75]

⁴O Diyos, dakila ka, ikaw ay maringal higit pa sa matatag na kabundukan. [76]

⁵Walang magawâ, matatapang na kawal, binawi ng Diyos ang taglay na samsam; nahihimbing sila at nakahandusay, mga lakas nila, lahat ay pumanaw.

⁶Nang ika'y magalit, O Diyos ni Jacob, sakay at kabayo'y pawang nangalugmok.

⁷Ikaw, O Yahweh, kinatatakutan! Sino ang tatayo sa iyong harapan kapag nagalit ka sa mga kinapal?

⁸Sa iyong paghatol na mula sa langit, ang lahat sa mundo'y takot at tahimik.

⁹Nang ika'y tumayo't gawin ang paglitis, naligtas ang mga api sa daigdig. (Selah) [77]

¹⁰Ang matinding galit sa iyo ng tao, hahantong na lahat sa pagpuri sa iyo. Silang nangaligtas sa mga labanan, laging magpupuri at mangagdiriwang.

¹¹Mga pangako mo kay Yahweh, iyong Diyos, ay iyong tuparin nang tapat sa loob; dapat na magdala ng mga kaloob ang lahat ng bansa sa iyong palibot.

¹²Hambog na prinsipe ay ibinababâ, tinatakot niya hari mang dakila.