Read Magandang Balita Biblia, 2005 Mga Awit 83 Bible Online

Mga Awit 83 - Magandang Balita Biblia, 2005 bible

Mga Awit 83

¹Awit ni Asaf. Huwag kang manahimik, O Diyos, huwag kang magpabaya, ikaw ay kumilos.

²Hayun! Ang kaaway nagsisipag-alsa, at ang namumuhi'y kinakalaban ka.

³Sila'y nagbabalak laban sa hinirang, laban sa lahat ng iyong iningatan.

⁴Ganito ang sabi, “Ating papawiin, ang kanilang bansa'y ating lilipulin; upang ang Israel, malimutan na rin!”

⁵Nagkakaisang lahat, sila ay nagplano, kanilang pasya ay lumaban sa iyo.

⁶Ang lahi ni Edom at ang Ismaelita, Moab at Agarenos lahat nagkaisa.

⁷Ang Gebal at Ammon gayon din ang pasya, Amalek at Tiro at ang Filistia.

⁸Pati ang Asiria'y nakipagsabwatan, sa lahi ni Lot, nakipagtulungan. (Selah) [85]

⁹Mga bansang ito'y iyong parusahan, tulad ng parusang ginawa sa Midian, kay Jabi't Siserang nalupig sa laban nang sa Ilog Kison, buhay winakasan.

¹⁰Pinatay lahat at ang hukbo'y nawasak, sa Endor, ang bangkay nila ay nagkalat.

¹¹Yaong mga bantog nilang punong-kawal, kay Oreb at Zeeb iparis ang buhay. Lupigin mong lahat ang pinuno nila tulad ng sinapit ni Zeba't Zalmuna,

¹²sila ang nagsabing, “Ang pastulan ng Diyos ay ating kamkami't maging ating lubos.”

¹³Ikalat mo silang parang alikabok, tulad ng dayami na tangay ng unos.

¹⁴Tulad ng pagtupok ng apoy sa gubat, nang ang kaburula'y kubkob na ng ningas,

¹⁵gayon mo habulin ng bagyong malakas, ito ang gawin mo't nang sila'y masindak.

¹⁶Mga taong yaon sana'y hiyain mo, upang matutong maglingkod sa iyo.

¹⁷Lupigin mo sila't takuting lubusan, lubos mong hiyain hanggang sa mamatay.

¹⁸Sana ikaw, Yahweh, kanilang mabatid, ang tangi't dakilang hari ng daigdig!