Read Magandang Balita Biblia, 2005 Mga Kawikaan 18 Bible Online

Mga Kawikaan 18 - Magandang Balita Biblia, 2005 bible

Mga Kawikaan 18

¹Ang taong makasarili ay humihiwalay sa karamihan, at salungat sa lahat ng tamang isipan.

²Walang saysay sa mangmang ang lahat ng bagay, ang nais lang niya'y ipakitang siya'y may alam.

³Pagsipot ng kasamaan, kasunod ay kahihiyan; kapag nawala ang karangalan, kapalit ay kadustaan.

⁴Ang wika ng tao ay bukal ng karunungan, parang dagat na malalim at malamig na batisan.

⁵Ang pagkiling sa may sala ay isang kamalian; gayundin naman kung ipagkakait ang katarungan.

⁶Ang labi ng mangmang, bunga ay alitan, at ang kanyang bibig, hatid ay kaguluhan.

⁷Kanyang bibig, maghahatid sa sariling kasiraan; kanyang labi nama'y isang bitag na kahuhulugan.

⁸Ang tsismis ay masarap pakinggan, gustung-gusto ng lahat na pag-uusapan.

⁹Ang taong batugan ay sinsama ng taong mapanira.

¹⁰Ang pangalan ni Yahweh ay matibay na tanggulan, kanlungan ng matuwid mula sa kapahamakan.

¹¹Ang ari-arian ng isang mayaman ay kanyang kanlungan, akala niya'y maililigtas siya nito sa oras ng kapahamakan.

¹²Ang pagmamataas ay nagbubunga ng kapahamakan, ngunit ang pagpapakumbaba, ay karangalan.

¹³Nakakahiya at isang mangmang ang isang taong sumasagot sa tanong na hindi naman niya nalalaman.

¹⁴Ang matatag na kalooban ay mabuti sa tao, ngunit kung mahina ang loob, anong mangyayari rito?

¹⁵Ang matalino ay nagdaragdag ng kaalaman, ang may unawa'y namumulot pa ng karunungan.

¹⁶Kung nais mapalapit sa maykapangyarihan, magdala ng regalo, sa kanya ay ibigay.

¹⁷Ang unang pahayag ay inaakalang tama, hangga't hindi naririnig, tanong ng kabila.

¹⁸Ang sigalot ay maaaring malutas sa palabunutan, at mapagkasundo ang mahigpit na magkaaway.

¹⁹Ang kaibigang nasaktan ay higit pa sa lunsod na napapaderan, ang di pagkakaunawaan ay mas matibay pa kaysa isang tarangkahan.

²⁰Anumang sabihin ng tao ay kanyang pananagutan, ayon sa kanyang salita siya'y gagantimpalaan.

²¹Ang buhay at kamatayan ay sa dila nakasalalay, makikinabang ng bunga nito ang dito ay nagmamahal.

²²Ang mabuting maybahay ay isang kayamanan; siya'y pagpapala na si Yahweh lang ang may bigay.

²³Ang mahirap ay lumalapit sa diwa ng pakiusap, ngunit ang sagot ng mayama'y salitang mararahas.

²⁴May pagkakaibigang madaling lumamig, ngunit may kaibigang higit pa sa kapatid.