Read Magandang Balita Biblia, 2005 Mga Kawikaan 22 Bible Online

Mga Kawikaan 22 - Magandang Balita Biblia, 2005 bible

Mga Kawikaan 22

¹Mas mabuting piliin ang malinis na pangalan, kaysa pilak at ginto o anumang kayamanan.

²Kay Yahweh ay pareho ang mayama't mahirap, pagkat siya ang may lalang sa kanilang lahat.

³Kung may dumarating na panganib, ang matalino'y nag-iingat, ngunit di ito pansin ng mangmang kaya siya'y napapahamak.

⁴Ang paggalang at pagsunod kay Yahweh at ang kapakumbabaan ay nagbubunga ng yaman, buhay at karangalan.

⁵Sa landas ng masama ay may tinik at mga patibong, at ang nagmamahal sa sarili ay umiiwas doon.

⁶Ituro sa bata ang daang dapat niyang lakaran, at hanggang sa paglaki'y di niya ito malilimutan.

⁷Ang mahirap ay nasa kapangyarihan ng mayaman, ang nangangailangan ay alipin ng nagpapahiram.

⁸Ang naghahasik ng kasamaan ay mag-aani ng kamalasan, at hindi magtatagal ang kanyang kasamaan.

⁹Ang mahirap ay bahaginan mo ng pagkain, at tiyak na ikaw ay pagpapalain.

¹⁰Palayasin mo ang mga sulsol at mawawala ang alitan, at matitigil ang kaguluhan pati pag-aaway.

¹¹Ang magiliw mangusap at may pusong dalisay, pati ang hari'y magiging kaibigan.

¹²Binabantayan ni Yahweh ang mga nag-iingat ng kaalaman, ngunit di niya pinagtatagumpay ang salita ng mga mangmang.

¹³Ang tamad ay ayaw lumabas ng bahay, ang idinadahila'y may leon sa daan.

¹⁴Ang salita ng mapang-apid ay isang patibong at ang mga hindi nagtitiwala kay Yahweh ang nahuhulog doon.

¹⁵Likas sa mga bata ang pagiging pilyo, ngunit sa pamamagitan ng palo, sila'y matututo.

¹⁶Ang nagreregalo sa mayaman o umaapi sa mahirap para magpayaman ay mauuwi rin sa karalitaan.

¹⁷Pakinggan mo at pag-aralang mabuti ang aking mga ituturo.

¹⁸Ito'y magdudulot sa iyo ng kaligayahan kung isasaulo mo.

¹⁹Sinasabi ko ito sa iyo sapagkat nais kong si Yahweh ang iyong panaligan.

²⁰Tatlumpu ang kawikaang ito. Bawat isa ay magandang panuntunan at magdudulot ng kaalaman.

²¹Ituturo nito sa iyo kung ano ang katotohanan. Sa gayon, may maisasagot ka kung may magtanong sa iyo.

²²Huwag mong samantalahin ang kahinaan ng mahihirap, ni pagmalabisan ang dukha sa harap ng hukuman.

²³Sapagkat ipagtatanggol sila ni Yahweh, at aagawan niya ang nang-agaw sa mga iyon.

²⁴Huwag kang makipagkaibigan sa taong bugnutin, ni makisama sa taong magagalitin,

²⁵baka mahawa sa kanila at sa bitag ay masilo.

²⁶Huwag kang mangangako para sa utang ng iba, ni gumarantiya para sa kanya.

²⁷Kapag hindi ka nakabayad, hindi ba't kukunin pati ang higaan mo?

²⁸Huwag mong babaguhin ang mga hangganang itinayo, ito'y inilagay doon ng ating mga ninuno.

²⁹Alam ba ninyo kung sino ang pinaglilingkuran ng mga mahusay magtrabaho? Sila'y naglilingkod sa mga hari, hindi sa mga alipin.