Read Magandang Balita Biblia, 2005 Mga Kawikaan 26 Bible Online

Mga Kawikaan 26 - Magandang Balita Biblia, 2005 bible

Mga Kawikaan 26

¹Ang papuri'y di angkop sa taong mangmang, parang ulan ng yelo sa tag-araw o panahon ng anihan.

²Ang sumpang di nararapat ay hindi tatalab, tulad lang ito ng ibong di dumadapo at lilipad-lipad.

³Ang latigo'y para sa kabayo, ang bokado'y para sa asno, ang pamalo naman ay sa mangmang na tao.

⁴Huwag mong papatulan ang isang mangmang at baka lumabas na higit ka pang mangmang.

⁵Sagutin mo ang mangmang ayon sa kanyang kahangalan, upang hindi niya isipin na siya'y may katuwiran.

⁶Ang magpadala ng balita sa mangmang ay napakadelikado, para mo na ring tinaga ang mga paa mo.

⁷Kung ang paang pilay ay walang kabuluhan, ganoon din ang kawikaan sa bibig ng mangmang.

⁸Ang isang papuring sa mangmang iniukol ay parang batong nakatali sa balat ng tirador.

⁹Ang isang kawikaan sa bibig ng mangmang, ay tulad ng tinik sa kamay ng lasing.

¹⁰Tulad ng isang namamana ng kahit na sino ang isang taong umupa ng mangmang o lasenggo.

¹¹Ang taong nananatili sa kanyang kahangalan ay tulad ng aso, ang sariling suka ay binabalikan nito.

¹²Nakakita na ba kayo ng taong nag-aakalang siya ang pinakamatalino? Mas may pag-asa pa ang mangmang kaysa taong ito.

¹³Ano ang idinadahilan ng taong batugan? “May leon sa daan, may leon sa lansangan.”

¹⁴Kung paano lumalapat ang pinto sa hamba, ang batugan naman ay sa kanyang kama.

¹⁵Ang kamay ng tamad ay nadidikit sa pinggan, ni hindi mailapit sa bibig dahil sa katamaran.

¹⁶Ang palagay ng tamad, siya ay mas marunong kaysa pitong taong wasto kung tumugon.

¹⁷Ang nakikisali sa gulo ng may gulo ay tulad ng taong dumadakma sa tainga ng aso.

¹⁸Ang taong nandaraya saka sasabihing nagbibiro lang ay tulad ng baliw na naglalaro ng sandatang nakamamatay.

²⁰Namamatay ang apoy kung ubos na ang kahoy; nahihinto ang away kapag walang nanunulsol.

²¹Kung ang baga'y nagdidikit dahil sa pag-ihip, at nagliliyab ang apoy kung maraming gatong, patuloy ang labu-labo kung maraming mapanggulo.

²²Ang tsismis ay tulad ng masarap na pagkain; masarap pakinggan, masarap namnamin.

²³Ang matamis ngunit pakunwaring salita ay parang pintura ng mumurahing banga.

²⁴Ang tunay na damdamin ng mapagkunwari ay maitatago sa salitang mainam.

²⁵Matamis pakinggan ngunit huwag paniwalaan sapagkat iyon ay bunga ng kanyang pagkasuklam.

²⁶Maaaring ang galit niya'y maitago sa magandang paraan ngunit nalalantad din sa mata ng lahat.

²⁷Ang nag-uumang ng bitag ay siya ring mahuhuli roon. Ang nagpapagulong ng bato ang siyang tatamaan niyon.

²⁸Ang taong sinungaling ay galit sa kapwa. Ang madayang salita ay nagpapahamak sa iba.