Read Magandang Balita Biblia, 2005 Mga Kawikaan 27 Bible Online

Mga Kawikaan 27 - Magandang Balita Biblia, 2005 bible

Mga Kawikaan 27

¹Huwag ipagyayabang ang araw ng bukas, pagkat di mo alam kung anong magaganap.

²Hayaan mong iba ang sa iyo'y pumuri at ang sariling bangko'y huwag mong buhatin.

³Ang bato ay mabigat, ang buhangin ay may timbang, ngunit mas mabigat ang kaguluhang dulot ng kamangmangan.

⁴Ang galit ay mabagsik, ang poot ay mabangis, ngunit ang pagseselos ay may ibayong lupit.

⁵Hindi hamak na mabuti ang harapang paninita, kaysa naman sa pag-ibig, ngunit ito'y lihim pala.

⁶May pakinabang sa hampas ng tapat na kaibigan kaysa halik ng isang kaaway.

⁷Ang taong busog ay tatanggi kahit sa pulot-pukyutan, ngunit sa taong gutom, matamis kahit ang ampalaya.

⁸Ang taong lumayas sa kanyang tahanan, tulad ng ibong sa pugad ay lumisan.

⁹Ang langis at pabango'y pampasigla ng pakiramdam ngunit ang kabalisaha'y pampahina ng kalooban.

¹⁰Huwag mong pababayaan ang iyong kaibigan, ni ang kaibigan ng iyong magulang. Kung ikaw ay nagigipit, huwag sa kapatid lalapit. Higit na mabuti ang kapitbahay na malapit, kaysa isang malayong kapatid.

¹¹Magpakatalino ka, anak, upang ako'y masiyahan at sa gayo'y di ako mapahiya sa nangungutya man.

¹²Alam ng matalino kung may panganib at siya'y nag-iingat, ngunit di ito pansin ng mangmang kaya siya'y napapahamak.

¹³Kunin mo ang kasuotan ng sinumang nananagot para sa iba, at siya ang pagdusahin mo dahil sa pag-ako sa di niya kilala.

¹⁴Ang pahiyaw na pagbati bilang panggising sa kaibigan ay para nang sumpang binibitiwan.

¹⁵Nakakayamot ang asawang masalita tulad ng ulan na ayaw tumila.

¹⁶Mahirap siyang patigilin, para kang dumadakot ng langis o pumipigil sa hangin.

¹⁷Bakal ang nagpapatalim sa kapwa bakal at isip ang nagpapatalas sa kapwa isipan.

¹⁸Ang nag-aalaga sa punong igos ay makakakain ng bunga niyon; ang aliping may malasakit ay pararangalan naman ng kanyang panginoon.

¹⁹Kung paanong ang mukha ay nalalarawan sa tubig, sa kilos naman nahahalata ang iniisip.

²⁰Ang nasa ng tao'y walang katapusan, tulad ng libingan, laging naghihintay.

²¹Dinadalisay sa apoy ang ginto at pilak, ngunit ugali ng tao ay makikilala sa gawa araw-araw.

²²Bayuhin mang parang bigas ang isang taong mangmang, hindi rin maaalis ang kanyang kamangmangan.

²³Ang iyong mga hayop ay iyong bantayan, alagaang mabuti ang iyong kawan.

²⁴Di mamamalagi ang yaman, ganoon din ang mga nasa kapangyarihan.

²⁵Putulin muna ang dayami, saka gapasin ang damo sa parang habang hinihintay ang susunod na anihan.

²⁶Sa mga tupa kinukuha ang ginagawang kasuotan, at ang pinagbentahan mo ng iyong kambing ay maaaring ipambili ng bukid.

²⁷Ang gatas ng inahing kambing ay sa ibang kailangan, sa pagkain ng pamilya mo't mga katulong sa bahay.